Gonzisa muswa wa wena a ku tirela Jehova

1, 2. a) Kukarateka muni loku a vapswali vo kari va vako nako loku a vana vabye va chikela ka tanga yo sangula ku ti tshotshota? b) A vaswa va maKristu va nga humelelisa kuyini a xikhati lexi va nga tangeni yo sangula ku ti tshotshota?

A XINWE xa zilo zi nehako litsako ka vapswali ku wona n’wana wabye na a bapatizwa. Berenice a nga ni mune wa vana va bapatizilweko na va nga seva ni 14 wa malembe i ngalo: “Lezo zi hi tsakisile nguvu. Kunene, hi wa tsaka hi lezi a vana va hina va nga lava ku tirela Jehova.” “Kanilezi,” i lo engeta aku, “hi wa zi tiva kambe lezaku kota lezi va nga tangeni yo sangula ku ti tshotshota va wa ta tlhangana ni zikarato zo tala.” Loku u hi ni n’wana a nga tangeni yo sangula ku ti tshotshota kutani a nga kusuhani ni tanga leyo, kuzilava wa ku zwisisa a kukarateka ka Berenice.

² Na a nga kaneti lezaku a tanga yo sangula ku ti tshotshota i tanga yo karata ka vapswali ni vana va kona, a tlhari yo kari ya mawundlela ya vana yi ngalo: “A kuva tangeni yo sangula ku ti tshotshota a zi wuli ku ‘suka tipeni’ kutani ku ‘maha zilo za wunwanana.’ I tanga leyi munhu a nga hlweliko ku khumbeka mbilu, laha a lavako ku famba a hlakana ni vanghana, ni ku tirisa a kupima kakwe.” Na va ha hi tangeni yo sangula ku ti tshotshota, a vana va wena va nga wumba wunghana go tiya na Jehova, va ti vekela mixuvo ya wutireli ni ku ti karatela ku yi tatisa, va tlhela va maha ziboho ha voce a xikhati lexi va ti hendleletako va tlhela va hanya hi kuyelana nako. A tanga leyo yi ngava tanga yo tsakisa nguvu ya ku kula hi tlhelo ga moya, a ku fana ni lezi Jesu a zi mahileko. (Gonza Luka 2:52.) Kota mupswali, i ntiro muni u nga nawo ka malembe lawo yo karata nguvu? Wona lezi Jesu, a kombisileko zona liranzo, kutikoramisa, ni wutlhari anzhako ka loku a kulile. A matshamela lawo ma nga ku vunisa kuyini ku gonzisa a n’wana wa wena a nga tangeni yo sangula ku ti tshotshota lezaku a tirela Jehova?

RANZA N’WANA WA WENA

3. Hikuyini Jesu a vitanileko a vapostoli vakwe kota vanghana vakwe?

³ Jesu i wa hi munghana wo tsumbeka ni wa liranzo. (Gonza Johani 15:15.) Zikhatini za kutsaliwa ka Biblia, a hosi yi wa nga toloveli ku ti tlhatlha xifuva mahlweni ka malanza ya yona. Hambulezo, Jesu ive hosi tlhelo munghana wa vapostoli vakwe vo tsumbeka. I wa ti nyika xikhati xa ku tshama navo, a va bhulela lezi a ti zwisako zona, a tlhela a demba ndleve loku vonawu va ti phofula. (Mar. 6:30-32) A mabhulo lawo ya liranzo ma lo vanga kubohana ka hombe xikari ka Jesu ni vapostoli vakwe ma tlhela ma va longiselela wutihlamuleli legi va nga wa ta gi kuma hi kufamba ka xikhati ntirweni wa Nungungulu.

4. U nga zi kotisa kuyini kuva munghana wa n’wana wa wena u tlhela u simama kuva ni wuhloko ga wena kota mupswali? (Wona mufota kusanguleni ka nzima)

⁴ Michael, a nga raru wa vana vambiri, i ngalo: “Hina vapswali a hi nge zi koti kuva vanana-kulobye, kanilezi hi nga maha vanghana vabye.” A vanghana va ti nyika xikhati xa ku tshama zinwe. Ehleketa ni ku khongela hi tindlela ta ku cica zokari ntirweni wa wena wa kutihanyisa kutani ka zilo zinwani kasi ku tshama ni vana va wena. A vanghana va ranza zilo zo fana kambe. Hikwalaho, ti karatele ku ranza a zilo lezi a vana va wena va zi ranzako — zo kota wucenje, mafilmi, kutani mihlakano leyi a yi ranzako. Ilaria, a hanyako le Itália, i ngalo: “A vapswali va mina va lo sangula ku ingisela wucenje legi nzi nga ingisela. Hi lisine, papai i lo maha munghana wa mina wa hombe, niku nzi wa tlhatlheka ku bhula naye hambu hi zilo hi kalako hi nga toloveli ku tlhatlheka ku zi wula.” A kuva munghana wa vana va wena ni ku va vuna ku wumba wunghana go tiya na Jehova, a zi wuli ku rula wuhloko ga wena kota mupswali. (Tis. 25:14) A ku hambana ni lezo, u komba lezaku wa va ranza niku u na ni xichawo hi vona; lezo zi ku maha u tshineleka. Kota wuyelo ga kona, va ta tlhatlheka ku ku bhulela ni xihi xi va karatako.

5. Jesu i vunisile kuyini a vapizani vakwe lezaku vazwa a litsako la ku tshama va khomekile ntirweni wa Jehova?

⁵ Jesu i wa lava lezaku a vapizani vakwe vo ranzeka ni vanghana vazwa litsako la ku tshama va khomekile ntirweni wa Jehova. Hikwalaho, i wa xuva lezaku va hiseka mitirweni ya moya. I wa lava lezaku va hiseka ntirweni wa ku maha vapizani! Hi liranzo, i lo tiyisekisa vapizani vakwe lezaku i wa ta va vuna kasi va humelela. — Mat. 28:19, 20.

6, 7. Hikuyini li nga liranzo loku a vapswali va vuna vana vabye a ku maha longoloko wa moya ni ku wu lanzela ke?

⁶ Wena u lava lezaku a n’wana wa wena a hanya khwatsi hi tlhelo ga moya. Nungungulu i lava lezaku u wundla n’wana wa wena “hi kululeka ni kulaya ka [Jehova].” (Efe. 6:4) Hikwalaho, tirisa a wutihlamuleli legi u nyikilweko hi Nungungulu kasi ku yimisa ni ku lanzela longoloko wa moya. Kasi ku fananisa: U maha zontlhe zi lavekako kasi a vana va wena va gonza xikola hakuva wa zi tiva lezaku a gonziselelo leyo ya lisima niku u rinzela lezaku yi va maha va ranza ku gonza. Hi kufanana, a vapswali va liranzo, va maha zontlhe kasi a vana vabye va vuneka hi ‘kululeka ka Jehova’ mitlhanganweni ya bandla ni ka milongoloko yinwani ya moya. Kota lezi a gonziselelo ya Nungungulu yi nga ya lisima nguvu, u ti karatela ku vuna vana va wena lezaku va ranza zilo za moya ni wutlhari. (Mav. 24:14) A ku fana ni lezi Jesu a vunileko vapizani vakwe, u ti karatela ku vuna n’wana wa wena lezaku a humelela wutirelini hi ku mu maha a ranza tigonzo ta Mhaka ya Nungungulu ni ku mu vuna ku lanzela longoloko wu nene wa ntiro wa simu.

⁷ A kuva ni longoloko wo khanzakanya wa moya zi va vunisa kuyini a vaswa? Erin, a hanyako le Djoni, i ngalo: “Hina vanana hi wa tolovela ku khala ni ku ngurangura xungetano hi xigonzo xa Biblia, mitlhangano, ni ntiro wa simu. A zikhati zinwani hi wa vilinganyisa xigonzo xa hina xa ngango ha womu kasi ku huma ka xona. Kanilezi a vapswali va hina va wa nga zi vumeleli.” I engeta aku: “A gonziselelo leyo yi nzi vunile ku hlakulela kutimisela. Zalezi, loku a xigonzo xa mina xi colopetelwa hi zokari, nzi xuva nguvu ku tlhela hi xihatla nguvu hi laha nzi zi kotako hi kona. Nzi alakanya ku na nzi nga vangi nako kuxuva loko loku a vapswali va hina va wa no kala ku khomelela ka longoloko wa hina wa moya. Loku va wa no zi vumelela, nzi alakanya ku na zi nzi olovela makunu ku lova mitlhangano kutani mitiro yinwani ya moya.”

GONZISA KUTIKORAMISA HI XIKOMBISO XA WENA

8. a) Jesu i zi kombisile kuyini lezaku wa ku tiva a kugumelwa kakwe? b) A kutikoramisa ka Jesu ku va khumbisile kuyini a vapizani vakwe?

⁸ Hambu lezi Jesu a nga hi munhu wo mbhelela, i wa ti koramisa a vumela kugumelwa kakwe a tlhela a khegela ka Jehova. (Gonza Johani 5:19.) Xana a kutikoramisa ka Jesu ku mahile lezaku a vapizani vakwe va nga mu nyiki xichawo? Ne ni kutsongwani. Hi lisine, laha a ngaya a khegela ka Jehova, a vapizani vakwe va waya va engetela ku mu tsumba. Hi kufamba ka xikhati, va lo pimanyisa a kutikoramisa kakwe. — Mit 3:12, 13, 16.

9. Loku u ti koramisa u kombela rivalelo u tlhela u vumela kugumelwa ka wena, zini lezi a vana va wena va to zi gonza?

⁹ Hi na ni kugumelwa kunyingi, niku a ku hambana na Jesu, a hi mbhelelangi niku ha maha zihoxo. Ti koramise u vumela a kugumelwa ka wena ni zihoxo za wena. (1 Joh. 1:8) Hi xikombiso, xikari ka hosi yi vumelako zihoxo za yona ni hosi yi nga vumeliko ku kombela rivalelo, himani u nga mu kombisako nguvu xichawo? Loku a n’wana wa wena a kuzwa na u kombela rivalelo hi zihoxo za wena, a xichawo xakwe hi wena xi ta kula. A nga ha gonza ku vumela zihoxo za yenawu. Rosemary, a nga ni vana vanharu va kulileko, i ngalo: “Hi wa vumela zihoxo za hina, niku lezo zi lo kuca vana va hina lezaku va tlhatlheka ku bhula na hina loku va hi ni xikarato. Hi wa ku tiva a kugumelwa ka hina, hikwalaho hi wa gonzisa vana va hina laha va nga kumako kona a ndlela ya chukwana nguvu ya ku lulamisa zikarato zabye. Loku va lava xivuno, xontlhe xikhati hi wa va leletela ka mabhuku ma seketelwako ka Biblia, hi tlhela hi khongela navo.”

10. Jesu i wa kombisisa kuyini kutikoramisa loku a ruma vapizani vakwe?

¹⁰ Jesu i wa hi ni wukosi go ringana ku ruma valanzeli vakwe. Hambulezo, hi kutikoramisa, i wa tolovela ku tlhamusela a zigelo za ku va nyika ntiro wo kari. Hi xikombiso, a nga byelangi valanzeli vakwe lezaku va rangisa Mufumo ni kululama ka Nungungulu ntsena, kanilezi i lo engeta aku: “Ku ta engetelwa ka nwina zontlhe lezi zilo.” Anzhako ka ku wula ku, “Mu nga lamuli,” Jesu i lo wula a xigelo xa kona aku: “Kasi ma kala ku lamuliwa. Hakuva mu ta lamuliwa hi kulamula loku mu lamulako ha kona vanwani.” — Mat. 6:31–7:2.

11. Loku zi koteka, hikuyini gi nga wutlhari a ku tlhamusela zigelo za nayo kutani xiboho u xi mahako kota mupswali ke?

¹¹ Loku u yimisa nayo kutani ku maha xiboho xo kari, tlhamusela a zigelo za kona loku zi ringana. Loku n’wana wa wena a zwisisa lezi u zi alakanyako hi mhaka leyo, zi ta mu olovela ku ku ingisa hi mbilu yi longileko. Barry, loyi a wundlileko mune wa vana, i ngalo: “A ku tlhamusela zigelo zi vuna vana va wena hakuva va zi wona ku a wu mahi ziboho na u nga rangangi hi ku alakanyela, kanilezi u zi maha hi kuringanisela.” Ahandle ka lezo, a munhu a nga tangeni yo sangula ku ti tshotshota a nga ha hi nwanana; a kupima kakwe ku kari ku kula. Barry i tlhamusela lezi: “A vana va nga tangeni yo sangula ku ti tshotshota va fanele ku gonza ku maha ziboho za wutlhari na va tirisa a kupima, wutshanwini ga lezi va ti zwisako zona ntsena.” (Tis. 119:34) Loku u ti koramisa u tlhamusela a zigelo za ziboho za wena, a n’wana wa wena i ta zi wona lezaku a wa ha mu woni kota nwanana a tlhela a gonza ku maha ziboho zakwe wutsumbu hi kupima kakwe.

KOMBISA WUTLHARI, U ZWISISA N’WANA WA WENA

12. Jesu i tirisisile kuyini wutlhari kasi ku vuna Pedro?

¹² Jesu i kombisile wutlhari, a zwisisa laha a vapizani vakwe va nga lava xivuno. Hi xikombiso, mupostoli Pedro i wa hi ni mixuvo yi nene a xikhati a nga kuca Jesu lezaku a ngavi ni maalakanyo ya kufa kasi a nga dawi. Hambulezo, Jesu i wa zi tiva lezaku a mawonela ya Pedro ma wa hambukile. Kasi ku vuna Pedro ni vapizani la’vanwani, Jesu i lo nyika wusungukati go kongoma, a wula a makhombo ya ku zama ku ti ponisa, a tlhela a tlhamusela a makatekwa ya kuva ni moya wa kutitsona. (Mat. 16:21-27) Pedro i lo gonza xokari ka wusungukati lego. — 1 Ped. 2:20, 21.

13, 14. a) Xini xi nga kombako lezaku a kukholwa ka n’wana wa wena a ka ha tiyangi? b) U nga tirisisa kuyini a wutlhari kasi ku zwisisa ni ku vuna n’wana wa wena ke?

¹³ Khongela ka Jehova lezaku a ku nyika wutlhari kasi u tiva laha a n’wana wa wena a lavako xivuno. (Tis. 32:8) Hi xikombiso, xini xi nga kombako lezaku a kukholwa ka n’wana wa wena a ka ha tiyangi? U nga ha wona lezaku wa mbhela litsako, wa solasola makholwa-kulori, kutani a nga bhuli ni vanghana. U nga tsutsumeli ku ti byela lezaku o hanya wutomi gimbiri gi yelanako ni xionho xa hombe.a Hi tlhelo ginwani, u nga mahi ku khwatsi a wu zi woni kutani ku ziba hi makatla uku a kutitsawukanisa ka n’wana wa wena xipanze xa kukula.

¹⁴ A ku fana na Jesu, maha ziwutiso hi wunene ni xichawo. A ku fana ni ku kokela purunwa kutani xigobhoza xa mati lomu hloweni hi matloti zi mahako lezaku ma famba ma halakela, loku u wulawula ni n’wana wa wena hi ndlela yo leva u ta luza lungelo ga lisima ga kuzwa maalakanyo yakwe ni lezi a zi lavako. (Gonza Mavingu 20:5.) Ilaria, loyi a kumbukilweko kusanguleni, i ngalo: “A xikhati lexi nzi nga hi tangeni yo sangula ku ti tshotshota, nzi lo sangula kuva ni timbilu timbiri xikari ka ku famba lisineni ni ku famba nzi hlakana ni zigonzani-kulori. A yimpi leyo ya le nzeni yi lo hungula litsako la mina, niku a vapswali va mina va lo zi wona. Ka wusikwana go kari, va lo wula ntsena lezaku va nzi wona ku a nzi tangali, va tlhela va nzi wutisa a ku zi mahiwa hi yini. Nzi lo sangula ku rila, nzi tlhamusela a mhaka ya kona nzi tlhela nzi kombela xivuno. Va lo nzi angarela, va nzi byela lezaku va zi zwisisa, va tlhela va tsumbisa ku nzi vuna.” A vapswali va Ilaria va lo tekela ku sangula ku mu vuna ku kuma vanghana va vaswa ni va va nene lomu bandleni.

15. Tlhamusela lezi Jesu a kombisisileko zona wutlhari kutirisaneni kakwe ni vanwani.

¹⁵ Jesu i kombisile wutlhari kambe laha a vapizani vakwe va nga lava xivuno ni laha va nga maha khwatsi. Hi xikombiso, a xikhati lexi a wanuna wo kari a vitwako Nataneli a ngazwa lezaku Jesu ita hi le Nazareta, i te ngalo: “Ku nga huma a xilo xo saseka hi le Nazareta ke?” (Joh. 1:46) Hi kuya hi magezu lawo, u wa taku Nataneli munhu wo tshamisa kuyini? Musolasoli? Munhu wa xihlawulela? Munhu a nga hiko na kukholwa? Jesu i lo kombisa wutlhari a wona za zi nene ka Nataneli. I lo mu vitana a ku “muIsraeli wa [lisine], loyi a nga hiko na kuxengetela.” (Joh. 1:47) Jesu i wa lera timbilu, niku i tirisile wuzikoti lego kasi ku wona za zi nene ka vanwani.

16. U nga vunisa kuyini n’wana wa wena lezaku a hlakulela matshamela ma nene?

¹⁶ A wu nge zi koti ku lera a timbilu, kanilezi hi ku vuniwa hi Nungungulu u nga kombisa wutlhari. U ta tirisa wuzikoti lego kasi ku wona za zi nene ka n’wana wa wena ke? A nga kona a zi tsakelako ku wuliwa lezaku “xitlula-milayo.” U nga tshuki u alakanya kutani ku wula lezaku a n’wana wa wena “muhluwuki” kutani “hlomulo.” Hambu loku zi mu karatela ku maha lezi zi lavekako, mu kombe lezaku wa mu tsumba niku wa ku wona a kutikarata loku a ku mahako. Ni kwihi kukula kutani kuchukwata a ku kombisako, mu dzunze. Mu vune ku hlakulela matshamela yakwe ya ma nene hi ku mu nyika wutihlamuleli go engeteleka loku zi koteka. Hi zalezo Jesu a nga maha hi vapizani vakwe. Anzhako ka lembe ni khihlanya na a tivene na Nataneli (loyi a vitwako kambe lezaku hi Bartolomeu), Jesu i lo mu hlawula kota mupostoli, niku Nataneli i lo maha muKristu wo hiseka. (Luka 6:13, 14; Miti. 1:13, 14) A magezu ya wena ya ku mu dzunza ni ku tiyisa hlana ma ta vuna n’wana wa wena lezaku a nga ti woni kota munhu a nga kotiko nchumu, kanilezi kota muKristu wa ntamu loyi Jehova a to lava ku mu tirisa.

GONZISA, U TA KUMA LITSAKO LA HOMBE

17, 18. Mabhinzu muni ma nga vako kona loku u nga karali ku gonzisa n’wana wa wena a ku tirela Jehova?

¹⁷ Laha u wundlako vana va wena, u nga tshuka u ti zwisa ku khwatsi hi mupostoli Paule, loyi a ngava dadani wa moya ka votala. I lova ni “kuxaniseka ka hombe ni kubayiseka ka mbilu” hi kota ya “liranzo” leli a nga hi nalo hi vana vakwe va moya va le Korinte. (2 Kor. 2:4; 1 Kor. 4:15) Victor, loyi a wundlileko vana vanharu, i ngalo: “A malembe yo sangula ku ti tshotshota a ma olovangi. Hambulezo, a zikhati za ku tsaka zi wa hunza zikarato lezi hi nga kumana nazo. Hi ku vuniwa hi Jehova, hi vile ni wunghana ga hombe ni vana va hina.”

¹⁸ U nga karali ku gonzisa vana va wena a ku tirela Jehova. A xikhati lexi u kombisako liranzo la wena hi vona, u nga ha kuma litsako la hombe la ku va wona na va nghena lisineni va tlhela va simama kuva vana va moya lava ‘fambako lisineni.’ — 3 Joh. 4.