Xana Wa Ha Hlwela?

A ku hlwela ku maha yini? A ku tatisa a cartao DPA (Diretrizes Antecipadas Relativas a Tratamentos de Saúde e Outorga de Procuração) legi gi mahelweko Timboni leti ti bapatizilweko. Kota lezi ‘u nga zi tiviko za manziko,’ za lisima lezaku u maha xiboho na ka ha hi mahlweni u tlhela u tsala a machumela lawa u nga ma vumelako loku ku tshuka ku humelela xikarato xa xitshuketi xa lihanyo. (Jak. 4: 14; Miti. 15: 28, 29) A vidiyu Tratamentos Alternativos à Transfusão: Atendendo às Necessidades e aos Direitos do Paciente yi mahelwe ku ku vuna. Yi bukele, niku hi mukhongelo vuxeta lezi u zi gonzileko hi ku vuniwa hi ziwutiso lezi zi longiselweko lahasi. — Cuwuka: Kota lezi a vidiyu leyo yi nga ni zipanze zi kombisako wuhanzuli, a vapswali va fanele ku tirisa wutlhari loku va lava ku yi bukela ni vanana vabye. Loku mu nga hi nayo a vidiyu leyi, kambisisani a xipimo 7 xa bhuku ‘Liranzo La Nungungulu’ ni maphajina 215-218 ya gona, ni Nosso Ministério do Reino ga Novembro wa 2006, maphajina 3-6.

(1) Hikuyini a vadokodela vo kari va tlhelako va kambisisa a mhaka ya kutiriswa ka nkhata? (2) Nyika zikombiso zinharu za wuhanzuli go karata legi gi mahilweko handle ka kutiriswa ka nkhata. (3) Vadokodela vangani misaveni yontlhe lava va kombisileko lezaku va ti yimisele ku chuma vababyi handle ka ku tirisa nkhata? Hikuyini va ti yimiseleko ku maha lezo? (4) Zini lezi zi kombisilweko hi kukambisisa ko kari loku ku mahilweko lokuloku lomu zipitali xungetano hi kutiriswa ka nkhata? (5) Hi wahi makhombo ma fambelanako ni kutiriswa ka nkhata? (6) Xana a titlhari to tala ti chikelele magumo wahi xungetano hi mabhinzu ya machumela manwani handle ka nkhata? (7) Zini lezi zi vangako a kukiyelelwa hi nkhata? Lipimo muni la nkhata leli a vanhu va zi kotako ku simama va hanya hi lona? Zini lezi zi nga mahiwako kasi ku vuna mubabyi a kiyelelwako hi nkhata? (8) Xana a maglobulo yo pswhuka ma nga engeteliswa kuyini lomu mirini wa mubabyi? (9) Tindlela muni ti tirisiwako lezaku ku nga lahleki nkhata wo tala a xikhati lexi ku mahiwako wuhanzuli? (10) Xana a machumela manwani handle ka nkhata ma nga tirisiwa hi ndlela yo humelela ka zivanana ni le ka vanhu lava va babyako za mahati? (11) Hi wihi nchumu wunwe wa lisima wu nga le nayweni lowu wu faneleko ku alakanyiwa loku ku chumiwa mubabyi? (12) Hikuyini zi nga za lisima lezaku a maKristu ma hlawula na ka ha hi mahlweni a machumela ma nga tirisiko nkhata? Xana hi nga zi mahisa kuyini lezo?

A ku vumela a machumela yo kari lawa ma kombisilweko ka vidiyu leyi xiboho xa munhu wutsumbu hi kuyelana ni livalo la munwe ni munwani leli li gonzisilweko hi Biblia. Xana u sina u mahile xiboho xungetano hi machumela ni mamahela ya wuhanzuli lawa wena zinwe ni vana va wena mu ti yimiseleko ku ma vumela, zonake u tatisa a cartao DPA? Kasi ku kuma tlhamuselo wo mbhelela wa timhaka leti, wona a xipimo 7 xa bhuku ‘Liranzo La Nungungulu’ ni mabhuku lawa ma kumbukiwako kwalomo. Wona kambe a xiengetelo “Como encaro as frações de sangue e os procedimentos médicos que envolvem o uso de meu próprio sangue?” ka Nosso Ministério do Reino ga Novembro wa 2006. Hi kugumesa, tiyiseka lezaku u tsalile khwatsi a kuranza ka wena lomu ka cartao ga wena ga DPA. Lava u va hlawulileko kota vayimeli va wena va nayo zinwe ni ziro zontlhe za ngango zi nga hiko Timboni va fanele ku zi tiva khwatsi a ziboho za wena.

[Kwadru ka phajina 3]

• Xana u mahile xiboho xungetano hi machumela ni mamahela ya wuhanzuli lawa wena zinwe ni vana va wena mu ti yimiseleko a ku ma vumela?

• Wa fambafamba ni cartao DPA gi tatisilweko kota lezi gi to tshuka gi laveka?