“Ngona U Nzi Lanzela”
1. I lungelo muni hi to nyikwa hi Xigonzo xa Biblia xa Bandla ka tihweti ti tako?
1 A mune wa tiIvangeli ti tlhatlhambutelako a wutomi ga Jesu laha misaveni ti hi nyika a mitlhamuselo yo tala xungetano hi N’wana wa Nungungulu. Kota lezi a maKristu ma faneleko a ku “lanzela a nkonzo wakwe” hi laha kusuhani hi fanele a ku longisela ni ku demba khwatsi ndleve a xikhati lexi hi to gonza a bhuku “Ngona U Nzi Lanzela” ka Xigonzo xa Biblia xa Bandla kusukela ka viki ga 1 ka Março. (1 Ped. 2:21; Mar. 10:21) Za fanela a ku kambisisa khwatsi a wutomi ga Jesu laha misaveni legi gi zi kotako ku hi kuca a ku maha zo tala wutirelini.
2. Xana a xikombiso xa Jesu xa kutimisela xi nga hi vunisa kuyini?
2 Xikombiso Xi Nyikilweko Hi Jesu: Xana wa tshuka u hlamuliwa hi ndlela yi nga tsakisiko a xikhati lexi u xumayelako hi muti-ni-muti? Laha hi yimisanako ni kukanetwa loko, ha zi kota ku ma zwisisa khwatsi a magezu lawa ya Jesu: “Loku va xanisile mina, va ta xanisa na nwina kambe.” (Joh. 15:20) Lisine lezaku a hi mihlamulo yontlhe yi nga tsakisiko yi nga kuxanisa. Hambulezo, a kutsaka loku a nga vekelwe kona hi kona ku nga vuna Jesu a ku timisela a minzhingo ni ziringo za tixaka tontlhe. Hinawu ha zi kota a ku yisa kupima mizanweni ya ku kuma a ku amukelwa hi Jehova ni nchachazelo wa kutsumbeka ka hina. A ku maha lezo zi ta hi vuna a ku nga ‘rereki ni ku mbhela ntamu mihefemulweni ya hina.’ (Maheb. 12:2, 3; Mav. 27:11) A xikhati lexi hi timiselako wutirelini, ha zi kota kambe a ku tiyiseka lezaku Jesu Kristu i ta hi vuna. — Mat. 28:20.
3. Hi nga ma pimanyisisa kuyini a mawonela ya Jesu xungetano hi wutireli?
3 “Nzi Rumelwe Lezo”: A ntiro wa ku xumayela a Mufumo wu wa hi wo ranga wutomini ga Jesu. (Luka 4:43) I lo ti nyikela wutsumbu gakwe wutirelini hi kuziranza. I wa gi wona na gi hi ga xihatla, xontlhe xikhati i wa lava tindlela ta ku wulawula hi Mufumo. Kota valanzeli va Jesu, xana a nkonzo wakwe wu hi yisa kwihi? A xikhati lexi hi mahako a mitiro ya hina ya siku ni siku, xana ku na ni vanhu lava hi nga ha va bhulelako a mahungu yo saseka? Ngha a liranzo la Kristu li hi kurumeta a ku xumayela nguvu a mahungu yo saseka hi laha hi zi kotako hi kona. — 2 Kor. 5:14.
4. Xana hi nga chukwatisisa kuyini a wutireli ga hina?
4 “Cima A Ku Wulawulangi Munhu Kota Gaya”: A magonzisela ya Jesu ma wa hlamalisa a vaingiseli vakwe. (Joh. 7:46; Mat. 7:28, 29) Zini zi nga mu hambanyisa ni vagonzisi vanwani? I wa ranza a zinene lezi a nga gonzisa, i wa ranza a vanhu lava a nga va gonzisa, niku i wa gonzisa hi tindlela to hambanahambana. Hi ku pimanyisa a Mugonzisi wa Hombe, ha zi kota a ku chukwatisa a wutireli ga hina. — Luka 6:40.
5. Xana a kungo ga hina gi fanele kuva gihi a xikhati lexi hi gonzako a bhuku “Ngona U Nzi Lanzela”?
5 Leti timhaka to kari ta lisima ti kombiswako matinwini ya wutomi ga Jesu. Hi tihi tinwani titshomba u nga ha ti kumako? A xikhati lexi u kambisisako a wutomi ga Jesu Xigonzweni xa Biblia xa Bandla, zi mahe kungo ga wena a ku “tiva a liranzo la Kristu” hi ku pimanyisa a magezu ni zimaho zakwe. — Efe. 3:19.