Ntiro Wa Lisima Nguvu Ka Yontlhe
1. Xana a kutsakela ka hina ka hombe a wutireli ku ta hi kuca a ku maha yini?
1 Hikuyini hi kuciwako hi kukhanzakanya a ku tirisa xikhati xa hina, ntamu, ni titshomba wutirelini? Hi lezaku a ku na ntiro wa lisima la hombe a ku hunza lowo! A ku alakanyela a mabhinzu ya wona ya hombe zi ta engetela a kunavela ka hina a ku hlengela ntirweni lowu wu to kala wu nga ha phindiwi. — Miti. 20:24.
2. Xana a kuxumayela ka hina ku vunisa kuyini a ku basisa a vito ga hombe ga Jehova?
2 Wu Basisa A Vito Ga Jehova: A ntiro wa kuxumayela wu khanyisa lezaku a Mufumo wa Jehova ha Kristu Jesu wu ta valeta a mifumo yontlhe ya vanhu wu tlhela wu mbheta a zikarato zontlhe za vanhu. (Mat. 6:9, 10) Wu dumisa Jehova kota yena yece a zi kotako a ku hi tlhatlhisa ka mababyi ni kufa. (Isa. 25:8; 33:24) Kota lezi hi vitaniwako hi vito gakwe, za koteka a ku lava va wonako a mahanyela ya hina ya ma nene zinwe ni kuhiseka ka hina va mu dumisa. (1 Ped. 2:12) A zo ku hi tsakisa a ku tivekisa misaveni yontlhe a vito ga Hosi ya Hombe Jehova! — Tis. 83:18.
3. Hi wahi a makatekwa ma kumiwako hi lava va amukelako a mahungu ya Mufumo?
3 Wu Ponisa Wutomi: Jehova ‘a nga ranzi lezaku ku lova ni munwe, kanilezi i ranza lezaku vontlhe va hunzuluka.’ (2 Ped. 3:9) Kanilezi loku ku nga hi na wa ku va gonzisa, xana a vanhu va ta zi tivisa kuyini lezi Jehova a zi wonako kota mahanyela ma faneleko ni ma nga faneliko? (Jona 4:11; Rom. 10:13-15) Laha a vanhu va amukelako a mahungu yo saseka, a mahanyela yabye ma chukwata a xikhati lexi va tsikako a mitiro ya kubiha. (Mika 4:1-4) Tlhatakumbiri, va kuma kutsumba ko tsakisa ka wutomi ga pinzukelwa. A kuxumayela ni kugonzisa ka hina hi kuhiseka ku vuna hina ni lava va hi zwako kambe. (1 Tim. 4:16) Hakunene hi na ni xiavelo xo dzunzeka nguvu ntirweni lowu wa lisima la hombe!
4. Hikuyini hi faneleko ku hlengela nguvu ntirweni wa ku xumayela a Mufumo ni ku maha vapizani?
4 Lokuloku a kuxaniseka ka hombe ku ta lovisa a tiko legi go biha hi xitshuketi. Lava va yimako tlhelweni ga Jehova va ta pona. Hikwalaho, a ntiro wa kuxumayela ni ku maha vapizani hi wona wa xihatla nguvu, wa lisima, ni wu vunako inyamutlha. A hi wu rangiseni wutomini ga hina! — Mat. 6:33.