Hi Fanele Ku Simama Hi Hiseka Wutirelini Ga Hina
1 Kusukela 1992, lembe ni lembe a Timboni ta Jehova hi kuhiseka ti mbheta a tihora to hunza biliyoni yinwe ntirweni wa misava yontlhe wa ku xumayela Mufumo ni ku maha vapizani. A hi kutsaka loku hi nga nako hi kuva ni kuhlengela kutsongwani ximahweni lexo xo tsakisa nguvu! — Mat. 28:19, 20.
2 Hakunene, a kubonga kontlhe ni wudumo gontlhe zi lumba Jehova, loyi a hi seketelako wutirelini ga hina nzeni ka ‘zikhati lezi za zikarato.’ (2 Tim. 3:1) Zini zi lavekako ka tlhelo ga hina kasi hi simama ku hlengela ntirweni lowu wa lisima hi kuhiseka ke?
3 Xigelo Xa Kuva Ni Kuhiseka: A ku ranza Nungungulu ni waakelane hi kuetileko, zinwe ni kuxuva ka mbilu yontlhe ka ku hanya hi kuyelana ni kutihendleleta ka hina, zi hi nyika ntamu ntirweni wa hina wa Mufumo. (Mat. 22:37-39; 1 Joh. 5:3) A liranzo li hi kuca lezaku hi ti karatela a ku hlengela hi kumbheleleko ntirweni wa kuxumayela. — Luka 9:23, Tradução do Novo Mundo.
4 Ti Karatele Ku Simama U Hiseka: A nala wa hina Diyabu i maha zontlhe a zi kotako kasi ku hungula a kuhiseka ka hina wutirelini. A kungakhatali ka vanhu va nga xipanzeni xa hina, a zihungato za tiko legi, a mitshikelelo ya kuhanya ka siku ni siku, ni zikarato zi yelanako ni kubabyababya ka hina zilo zi tsongwani ntsena xikari ka lezi yena a zi tirisako lomu ka mizamo yakwe ya ku lava ku hi mbheta ntamu.
5 Hikwalaho, hi fanele ku ti karata nguvu lezaku hi simama hi hiseka. Za lisima lezaku hi hlakulela “a liranzo la [hina] lo sangula.” Lezo zi patsa kuva hi lera ni ku ehleketa hi kukhanzakanya Mhakeni ya Nungungulu, a Biblia, hi tlhela hi lonzowota a zakuga zontlhe za moya zi tako hi ka “nanza gi tsumbekileko ni go tlhariha.” — Kuv. 2:4; Mat. 24:45; Tis. 119:97.
6 Kota lezi a ziprofeto za Biblia zi zi kombisako ziku dlunya, a siku ga Jehova ga kulobyiswa ka vanhu vo biha ga tshinela hi kuhatlisa. (2 Ped. 2:3; 3:10) Na hi kari hi alakanyela khwatsi lezo, a hi ti karateleni ku simama hi hiseka wutirelini, hi hlengela hi kumbheleleko ntirweni wa misava yontlhe wa ku xumayela a Mufumo ni ku maha vapizani lowu zalezi wu yako mahlweni!