“Vurani Moyeni”
1. Hi gihi a tshamela legi gi faneleko ku fumela a kuxumayela ka hina?
1 A ku na xipanze ni xinwe wutirelini ga hina ga wuKristu xi faneleko ku nyima. A ku hambana ni lezo, hi kuciwa lezi: “Vurani moyeni, mu tirela a Hosi.” (Rom. 12:11) Hambulezo, ku na ni zilo zo tala lezi zi nga ha hungulako a kuhiseka ka hina wutirelini. Xana hi nga ‘hlanganyetisa’ kuyini a kuhiseka ka hina hi wutireli ga Mufumo? — 2 Tim. 1:6, 7.
2. Hi kwihi a kuyelana ku nga kona xikari ka xigonzo xa Biblia xa munhu wutsumbu ni kuhiseka wutirelini?
2 Xigonzo Xa Biblia Xa Munhu Wutsumbu: A muxumayeli wo humelela wa Mufumo hi loyi a ranzako a nayo wa Nungungulu na a khumbiwa nguvu hi zinene lezi zi nga ka wona. (Tis. 119:97) A xikhati lexi hi gonzako a zinene za Biblia xigonzweni xa hina wutsumbu, a zinene lezo zi kuca a timbilu ta hina zi tlhela zi engetela a kuhiseka ka hina. A ku ranza a Munyiki wa zinene lezo ni kuxuva ka hina a ku bhulela vanwani a mahungu yo saseka zi hi susumeta a ku dumisa Nungungulu ni ku huwelela a vito gakwe laha kubaseni. (Maheb. 13:15) Za dlunyateka lezaku a ku xumayela a mahungu yo saseka hi mbilu yontlhe zi komba a kueta ka lezi hi li tsakelisako zona a lisima la wona.
3. Xana a moya wa Nungungulu wu gi khumbisa kuyini a wutireli ga hina?
3 Khongelela A Moya Wa Nungungulu: A wutireli gi bhinzulako a gi koteki hi ntamu wa hina wutsumbu. A kuhiseka ka lisine ku koteka loku a moya wa Nungungulu wu tira hi kutlhatlheka. (1 Ped. 4:11) A ku tshinela ka Xibuka xa ‘ntamu wa hombe’ zi ta hi nyika a wuzikoti ga ku kustumunya hi kuhiseka. (Isa. 40:26, 29-31) A xikhati lexi mupostoli Paule a nga yimisana ni zikarato wutirelini gakwe, i lo ‘kuma a kuvuniwa hi Nungungulu.’ (Miti. 26:21, 22) A moya wa ku basa wa Jehova lowu wu nyikako ntamu wa zi kota ku hi vuna a ku vura hi moya wutirelini ga hina; hikwalaho, hi fanele ku wu khongelela. — Luka 11:9-13.
4. Xana a kuhiseka ku nga pswala mihanzu muni, niku hambulezo kutiwonela muni hi faneleko kuva nako?
4 A kuhiseka ko khwatsi ka nzilo xungetano hi ku xumayela a Mufumo ku tala ku vanga a kuchivirika ka hombe nguvu xikari ka maKristu-kulori. (2 Kor. 9:2) Le xipanzeni, a vanhu va olovelwa a ku vumela a mhaka leyi yi wuliwako hi kuhiseka ni kutiyiseka. Hambulezo, xontlhe xikhati a kuhiseka ku fanele ku fambelana ni wukheta zinwe ni kurula. (Tit. 3:2) A zikhati zontlhe hi ti karatela a ku kombisa xichawo a nwinyi wa muti ni ku alakanya lezaku yena i chusekile lezaku a hlawula lezi a zi lavako.
5. Hi gihi wusungukati gi pimisilweko legi hi faneleko ku ti karatela a ku gi tirisa?
5 Kota vahuweleli va Mufumo, ngha xikhati xontlhe hi ‘vura moyeni.’ Ngha hi hlakulela a kuhiseka hi xigonzo xa Biblia xa munhu wutsumbu ni ku khongela ka Jehova hi kutikisa, ku nga yena a hi nyikako a moya wa ku basa wa ntamu. Hi ndlela leyi, ha zi kota ku tatisa a wutireli ga hina hi kuhiseka na hi hi “ni Moya wa ku Basa, ni kutiyiswa kunyingi.” — 1 Tes. 1:5.