Wa pinyama “mitirweni yo saseka” ke?

1, 2. Hi gihi wudzunzo go hlawuleka legi a Timboni ta Jehova ti nga nago, niku xana wena u ti zwisa kuyini hi wudzunzo lego?

A VOTALA va zi wona kota wudzunzo a ku nyikwa nchachazelo anzhako ka ku maha ntiro wo kari. Hi xikombiso, a vokari va nyikilwe nchachazelo wa ntsengo wa hombe hi lezi va zi kotileko ku veka kurula xikari ka matiko kutani mifumo leyi yi nga lwisana. Kanilezi, wudzunzo ga hombe a ku rumiwa hi Nungungulu kota embaxadori kutani xirunwa kasi ku vuna vanhu lezaku vava ni kurula ni Muvangi wabye!

² Kota Timboni ta Jehova, hi na ni wudzunzo lego go hlawuleka. Hi rumilwe hi Nungungulu na Kristu a ku khongotela vanhu lezaku va “tlhanganyiswa ni Nungungulu.” (2 Kor. 5:20) Hi tiriswa hi Jehova lezaku hi koka vanhu vaya ka yena. Hi yona a ndlela leyi a vanhu va timiliyoni matikweni yo hunza 235 va vuniwako ha yona lezaku va ti buza hi kuzwanana ku nene na Nungungulu va tlhela vava ni kutsumba ka ku kuma wutomi ga pinzukelwa. (Tit. 2:11) Ha ti tsitsirita nguvu ntirweni wa ku ramba “ni wihi loyi a zi ranzako lezaku a takha mati ya wutomi mahala.” (Kuv. 22:17) Kota lezi hi nyikako nguvu lisima a xiavelo lexi xo hlawuleka ni ku xi maha khwatsi, za hi fanela ku vitanwa kota vanhu va “pinyamileko mitirweni yo saseka.” (Tit. 2:14) Zalezi, a hi woneni lezi a kupinyama ka hina mitirweni yo saseka ku vunisako zona vanhu lezaku va tshinela ka Jehova. A yinwe ya tindlela i ntiro wa hina wa kuxumayela.

PIMANYISA A KUPINYAMA KA JEHOVA NA JESU

3. Xana a “[kupinyama] ka Jehova” ku hi tiyisekisa yini?

³ Laha a nga wulawula hi lezi zi nga wa ta tatisiwa hi kufuma ka N’wana wa Nungungulu, Isaya 9:7 i ngalo: “A [kupinyama] ka Jehova wa tiyimpi ku ta maha lezo.” A magezu lawo, ma komba khwatsi lezaku a Dadani wa hina wa le tilweni wa khatala nguvu a tlhela a ti karatela ku hanyisa vanhu. A xikombiso xa Jehova xa kupinyama xi komba ziku dlunya lezaku hi fanele ku maha ntiro wa hina hi nyikilweko hi Nungungulu hi mbilu yontlhe ni kuhiseka. A kuxuva ka hina ka hombe ka ku vuna vanhu lezaku va tiva Nungungulu xikombiso xa lezaku Jehova wa hiseka. Makunu-ke, kota zitiri-kulobye za Nungungulu, xana hi ti yimisele ku xumayela mahungu yo saseka hi kumbhelela kala laha hi zi kotako ha kona ke? — 1 Kor. 3:9.

4. Xana Jesu i nyikisile kuyini a xikombiso xo mbhelela xa ku timisela a pinyama wutirelini?

⁴ Wona a kupinyama ka Jesu kambe. I hi nyikile xikombiso xo mbhelela xa ku timisela a pinyama wutirelini. Hambu lezi a xanisilweko nguvu, i simamile ku hiseka ntirweni wa kuxumayela kala afa hi ndlela yo bayisa laha misaveni. (Joh. 18:36, 37) Laha a xikhati xa kufa kakwe xi nga kari xi tshinela, Jesu i loya mahlweni a hiseka hi ku vuna vanhu lezaku va tiva Jehova.

5. Xana lezi Jesu a zi mahileko zi yelanisa kuyini ni mufananiso wakwe wa sinya ya nkuwu?

⁵ Hi xikombiso, kusanguleni ka wuxika ga 32 Nguveni ya Hina, Jesu i lo kanela mufananiso wa wanuna a nga hi ni sinya ya nkuwu sinwini gakwe ga xivina, leyi yi nga hi ni malembe manharu na yi nga pswali mihanzu. Laha a murimi a nga byeliwa lezaku i wa tseme a sinya leyo, i lo kombela xikhati xa lezaku a yi kuhela, a yi chela koho. (Gonza Luka 13:6-9.) Va wa hi vapizani va tsongwani va nga hlayiwa kota mbhanzu wa ntiro wa Jesu wa kuxumayela xikhatini lexo. Kanilezi, kota lezi zi kombiswako ka mufananiso lowo wa murimi wa xivina, Jesu i lo lonzowota xikhati xi tsongwani lexi xi nga sele — xa xipimo xa ntlhanu wa tihweti ni yinwe — lezaku aya mahlweni a xumayela le Judia ni le Pereia hi kupinyama. Ka masiku ma tsongwani mahlweni ka kufa kakwe, Jesu i rilele a vanhu va tiko gakwe lava “a tindleve tabye ti nga kala ku hatlisa ku ingisa.” — Mat. 13:15; Luka 19:41.

6. Hikuyini hi faneleko kuya mahlweni hi pinyama wutirelini ga hina?

⁶ Kota lezi hi nghenileko hi hloko masikwini yo gumesa, a hi chukwana hi tira nguvu hi kutikarata ntirweni wa hina wa kuxumayela ke? (Gonza Danieli 2:41-45.) Hakunene, a kuva Timboni ta Jehova i lungelo go saseka nguvu! Hi hina hoce laha misaveni hi tsumbisako a zilo za lisine lezi zi to mbheta zikarato za vanhu. A mutsali wo kari wa phepha-hungu i wonile xiwutiso lexi kota lexi xi nga hiko na hlamulo: “Hikuyini a vanhu va va nene va mahekelwako hi zilo za kubiha ke?” I fanelo tlhelo lungelo ka hina kota maKristu a ku nyika vontlhe lava va lavako kuzwa mihlamulo ya Biblia xungetano hi ziwutiso lezo. Hi na ni xigelo xo zwala xa “ku vura moyeni” a xikhati lexi hi mahako ntiro wa hina lowu hi nyikilweko hi Nungungulu. (Rom. 12:11) Hi ku vuniwa hi Nungungulu, a ku maha ntiro wa wuvangeli hi kupinyama zi nga vuna vanwani lezaku va tiva ni ku ranza Jehova.

A MOYA WA KUTIKARATA WU DUMISA JEHOVA

7, 8. Xana a moya wa kutikarata wu mu dumisisa kuyini Jehova?

⁷ Kota lezi hi zi wonako ka matshango ya mupostoli Paule, hi nga tshuka hi nga etleli kutani ku tshama ni ndlala na hi zama ku tatisa wutireli ga hina. (2 Kor. 6:5) A magezu lawa ma hi alakanyisa a maphayona lawa ma rangisako a ntiro wa kuxumayela wutomini gabye lezo na ma ti hlayisa hi woce. Ehleketa kambe hi vamakabye va hina va varumiwa lava va ti nyikelako khwatsi muphahlo kasi va ya tirela vanhu matikweni mambe. (Fil. 2:17) Ahati a madota ya hina lawa ma ti tsonako wurongo kutani zakuga kasi ku hlayisa tiyivu ta Jehova ke? Hi na ni vamakabye va hina kambe lava va khosaheleko ni vababyako, lava va mahako zontlhe va zi kotako kasi kuya mitlhanganweni ya bandla ni ntirweni wa simu. Loku hi alakanya vamakabye vontlhe lava va ti karatako nguvu ntirweni wa Nungungulu, a timbilu ta hina ta tala hi kutsaka. A kutikarata loko ka khumba lezi a vanwani va wu wonisako zona a ntiro wa hina wa kuxumayela.

⁸ A munhu wo kari a nga hiko Mboni, i lo tsala papilo giya ka phepha-hungu gi vitwako Boston Target, ga le Lincolnshire, Inglaterra, aku ngalo: “A vanhu a va ha gi tsumbi wukhongeli . . . Zini lezi a varangeli lavo va tichechi va mahako siku gontlhe? Handle ko kanakana a va humi handle va yela vanhu khwatsi hi lezi Kristu a nga maha . . . A chechi yinwe yi wonekisako ku khwatsi ya maha lezo Timboni ta Jehova, leti ti humako handle ti yela vanhu ti tlhela ti ti nyiketela nguvu ntirweni wa kuxumayela lisine.” Tikweni legi gi teleko hi vanhu vo ranza ku ti tsakisa, a moya wa hina wa kutikarata wa mu dumisa nguvu Jehova Nungungulu. — Rom. 12:1.

9. Xini xi to hi vuna ku simama hi pinyama mitirweni yo saseka wutirelini ga hina?

⁹ Hambulezo, zini hi faneleko ku maha loku hi wona lezaku a ha ha pinyami khwatsi wutirelini? Lexi xi to hi vuna, ku ehleketa hi lezi Jehova a zi mahako hi ntiro wa kuxumayela. (Gonza Va Le Roma 10:13-15.) A lisine hi lezaku a vanhu va ta hanyiswa ntsena loku va kombela vitweni ga Jehova hi kukholwa, kanilezi a vanhu a va nge mahi lezo loku hi nga va xumayeli. A ku tiva lezo zi fanele ku hi kuca ku simama hi pinyama mitirweni yo saseka hi tlhela hi ti karatela ku xumayela mahungu yo saseka ya Mufumo.

A MAHANYELA MA NENE MA KOKA VANHU VAYA KA NUNGUNGULU

10. Hikuyini ku nga wuliwako lezaku a mahanyela ya hina ya ma nene ma koka vanhu vaya ka Jehova ke?

¹⁰ Hambu lezi a kupinyama ku nga ka lisima wutirelini, a hi kona koce ku lavekako kasi ku koka vanhu vaya ka Nungungulu. A nchumu wa wumbiri wu kokelako vanhu ka Nungungulu mahanyela ma nene ya wuKristu. Paule i khanyisile a lisima la mahanyela ya hina ya ma nene a xikhati lexi a nga tsala aku: “A hi khunguvanyisi munhu ha nchumu, kasi a ntiro wa hina wu nga soliwi.” (2 Kor. 6:3) A kuwulawula ka hina ka ku nene ni mahanyela yo lulama zi sasekisa a gonzo ya Nungungulu, zi maha lezaku a wukhozeli ga Jehova gi koka mahlo ya vanhu. (Tit. 2:10) Hakunene, ku na ni wuyelo gi nene a xikhati lexi a vanhu va wonako a mahanyela ya hina ya wuKristu.

11. Hikuyini hi faneleko ku chela kota ka mahanyela ya hina?

¹¹ Khwatsi hi lezi a mahanyela ya hina ya ma nene ma nga kokako vanhu vaya ka Nungungulu, a mahanyela ya hava wonawu nga ma va maha va nga lavi ku mu tiva. Hikwalaho, kani hi le ntirweni, hi laha kaya kutani xikoleni, hi maha zontlhe kasi ni munwe a nga kumi xisolo wutirelini ni mahanyeleni ya hina. Loku hi onha ha womu, a wuyelo ga kona gi ngava go biha nguvu. (Maheb. 10:26, 27) A mhaka leyi yi fanele ku hi kuca nguvu lezaku hi ehleketa khwatsi hi mitiro ya hina ni lezi a wutomi ga hina gi byelako vanwani. Laha a mahanyela ya tiko legi ma yako ma nyenyeza, a vanhu va timbilu ti nene va taya mahlweni va “wona a kuhambana ku nga kona . . . xikari ka loyi a tirelako Nungungulu ni loyi a nga mu tireliko.” (Mala. 3:18) Hakunene, a mahanyela ya hina ya ma nene ya wuKristu nja lisima kutlhanganyisweni ka vanhu na Nungungulu.

12-14. Xana lezi hi timiselisako zona a ziringo zi va vunisa kuyini vanwani? Nyika xikombiso.

¹² Laha a nga tsalela maKristu ya le Korinte, Paule i wulile lezaku i wa xanisekile hi makhombo, timhango, kubiwa, ni ku valelwa mapaxweni. (Gonza 2 Va Le Korinte 6:4, 5.) A xikhati lexi hi kumanako ni ziringo za kukholwa, a kutimisela ka hina ku nga vuna lava va hi wonako lezaku va vumela lisine. Kasi ku kombisa: Ka malembe yo kari ma hunzileko, va wa zamile ku fuvisa Timboni ta Jehova ka xipanze xo kari le Angola. A Timboni timbiri ti bapatizilweko ni 30 wa vatsakeli lava va ngaya mitlhanganweni va lo khonwa. Zonake a vahanyi va xipanze lexo va lo tsombana kasi ku ta wona vamakabye lava va nga hiko na nanzu na va biwa hi vavukeli kala va huma nkhata. Hambu vavasati ni vanana a va nyenyeletwangi ka xapi leyo. A kungo gabye ku wa hi ku dzukisela vanhu lezaku va nga amukeli Timboni ta Jehova. Kanilezi, anzhako ka loku a vamakabye lava va bilwe kubaseni, a vanhu vo tala va xipanze lexo va lo lavetela Timboni va tlhela va kombela ku gonzisiwa Biblia! Anzhako ka lezo, a ntiro wa ku xumayela Mufumo wu loya mahlweni, kuva ni kuanza ka hombe ni makatekwa yo tala.

¹³ A xikombiso lexi xi dlunyatisa lezaku loku hi tiya hiku nde a xikhati lexi hi kumanako ni ziringo, a vanwani va nga vumela lisine hi ku wona kutiya ka hina. A xikombiso xo tiya-hlana xa Pedro ni vapostoli vanwani za koteka ku ngha xi vunile vanhu vo tala lezaku va vumela mahungu yo saseka. (Miti. 5:17-29) Na hinawu, loku hi tiya hiku nde hi yimela za kululama, a zigonzani-kulori, vatiri-kulori, kutani maxaka ya hina wonawu ma nga vumela mahungu yo saseka.

¹⁴ Ni ka xihi xikhati, ku na ni vamakabye va xaniswako. Hi xikombiso, le Arménia ku na ni xipimo xa 40 wa vamakabye va nga paxweni hi kota ya ku ala ku ti nghenisela ka politika, niku zi wonekisa ku khwatsi ka ha hi ni vanwani vo hlaya va to valelwa ka tihweti ti tako. Le Eritreia, ku na ni 55 wa malanza ya Jehova ma nga paxweni, a vo kari va hunzileko ka 60 wa malembe. Le Coreia do Sul, ku na ni xipimo xa 700 wa Timboni ti valelweko paxweni hi kota ya kukholwa kabye. A vamakabye lava valwa ni xiringo lexi hi kuringana 60 wa malembe. A hi khongeleni lezaku a kutsumbeka ka vamakabye lava va xaniswako matikweni yo tala ku neha wudzunzo ka Nungungulu ni ku tlhela ku vuna a varanzi va kululama lezaku va yimela a wukhozeli ga lisine. — Tis. 76:8-10.

15. Kombisa lezi a ku hanya hi kutsumbeka zi nga kokisako zona vanhu lezaku va vumela lisine.

¹⁵ A kuva ni mahanyela yo tsumbeka zonawu zi nga koka vanhu lezaku va vumela lisine. (Gonza 2 Va Le Korinte 6:4, 7.) Hi xikombiso, wona a tshango legi: A makabye wo kari wa xisati i wo chela mali ya ku xava thikithi ga xibhomba ka xibhokisana xi nga faselwe kwalomu xibhombeni. A munhu wo kari a mu tivako i lo mu byela lezaku i wa nga faneli ku xava thikithi hakuva laha a ngaya kona ku wa hi kusuhani nguvu. A makabye loyi i lo mu hlamula aku i fanelo yakwe a ku hakhela xibhomba, hambu loku o khilela ka paraji leyi a ya chika ka leyi yi lanzelako. Anzhako ka lezo, a munghana loye i lo chika. Loku a munghana loye a chikile, a mufambisi wa xibhomba i lo wutisa makabye wa hina aku, “U Mboni ya Jehova wena ke?” A makabye loyi i lo hlamula aku, “Ina, u nzi wutisa lezo hikuyini?” A mufambisi wa xibhomba aku, “Nzi mu zwile na mu bhula hi ku hakhela thikithi ga xibhomba, nza zi tiva kambe lezaku ka vanhu va tsongwani lava va ha hanyako hi kutsumbeka, a kutala ka vona Timboni ta Jehova, niku a Timboni vanhu vo tsumbeka zilweni zontlhe.” Loku ku hunzile tihweti to kari, a makabye loyi i lo tshinelelwa hi wanuna wo kari mitlhanganweni aku ngalo: “Wa nzi tiva ke? Hi mina mufambisi wa xibhomba loyi nzi nga bhula na wena xungetano hi ku hakhela thikithi ga xibhomba. Hi ku wona mahanyela ya wena ya me nene, zi nzi kucile ku gonza Biblia ni Timboni ta Jehova.” Loku vanhu va wona lezaku hi hanya hi kutsumbeka va vumela mahungu yo saseka lawa hi va xumayelako.

XONTLHE XIKHATI KOMBISA MATSHAMELA MA DUMISAKO NUNGUNGULU

16. Hikuyini a matshamela yo kota kutimisela, liranzo, ni wunene, ma khumbako timbilu ta vanhu? Nyika xikombiso.

¹⁶ A ku kombisa matshamela yo kota kutimisela, liranzo, ni wunene, zonawu zi nga koka vanhu vaya ka Jehova. Lava va hi wonako na hi kombisa matshamela lawo, va nga navela ku gonza xungetano hi Jehova, makungo yakwe, ni vanhu vakwe. A mahanyela ya maKristu ya lisine ma hambene kule ni ku ti maha munhu wo ranza ku khozela Nungungulu, lezi a kutala ka zikhati ku nga ku farisa. A varangeli vo kari va wukhongeli va hlengeletele titshomba to tala hi ku kanganyisa a tiyivu tabye laha ka kuza va kuma ni mali ya ku xava tiyindlu ni mimova ya durela ga cima — niku ka zikhati zinwani, vaza va fasela michini ya ku titimeta lomu ku etlelako timbyana. Zi la su dlunya lezaku a vanhu vo tala lava va ti wulako valanzeli va Kristu a va na moya wa ku “nyika hi matsenya” ne ni kutsongwani. (Mat. 10:8) Wutshanwini ga lezo, ‘va gonzisa hi ku fela mali’ a ku fana ni vapristi va zitlula-milayo va Israeli wa kale — niku a kutala ka lezi va zi gonzisako a hi za lomu ka Biblia. (Mika 3:11) A mahanyela lawo ya wufarisi a ma vuni munhu a ku tshinela ka Nungungulu.

17, 18. (a) I dumisiswa kuyini Jehova a xikhati lexi hi kombisako matshamela yakwe wutomini ga hina? (b) Xini xi ku nyikako ntamu wa ku timisela mitirweni yo saseka ke?

¹⁷ Hi tlhelo ginwani, a timbilu ta vanhu ta khumbiwa hi tigonzo ta lisine ta wuKristu ni mitiro yi nene yi mahiwako hi vaakelani. Hi xikombiso, a xikhati lexi a phayona go kari gi nga kari gi xumayela hi miti ni muti, gi lo enzela a noni ya xikhosana. A noni leyo yi lo tekela ku a nzi zi lavi. Yi lo byela a phayona legi yiku, a xikhati lexi u nga chaya a kampayinya, nzi wa hi laha hehla ka xikada lomu kozinyeni na nzi zama ku cica lampada. A phayona giku ngalo kakwe: “A hi zi nene ku tolovela a ku noma laha ka xikada na u hi wece.” A phayona gi lo mu cicela a lampada leyo zonake gi goxometa ndlela gi ti fambela. Laha a mufana wa noni leyi a nga zi tiva, i lo hlamala nguvu laha ka kuza a lavetela makabye loyi kasi ku mu bonga. Hi kugumesa, a mufana loyi i lo vumela ku gonza a Biblia.

¹⁸ Hikuyini u ti yimiseleko ku timisela mitirweni yo saseka ke? Kuzilava u timisela hi ku tiva lezaku a xikhati lexi hi pinyamako wutirelini ga hina hi tlhela hi maha zilo maringano ni kuranza ka Nungungulu, hi dumisa Jehova ni ku vuna vanwani lezaku va kuma kuhanyiswa. (Gonza 1 Va Le Korinte 10:31-33.) Loku hi xuva ku kombisa liranzo la hina hi Nungungulu ni vaakelane, handle ko kanakana hi ta zi kota ku pinyama mitirweni yo saseka, hi xumayela mahungu ya Mufumo, ni kuva ni mahanyela ma xalalisako Nungungulu. (Mat. 22:37-39) Loku hi pinyama mitirweni yo saseka hi ta chachazelwa hi litsako la hombe ni kuxalala zalezi. Ahandle ka lezo, hi ta zi kota ku rinzela kala hi wona a siku legi a vanhu vontlhe va to pinyamela a wukhozeli ga lisine kasi ku dumisa Jehova, a Muvangi wa hina.