U ta pimanyisa a kuhiseka ka Jehova na Jesu nguveni leyi ya Xialakanyiso ke?
1. Mizamo muni ya hombe leyi a Timboni ta Jehova ti yi mahako nguveni ya Xialakanyiso?
1 Jehova i tatisa kungo gakwe hi kuhiseka. Na a wulawula hi makatekwa yo kari ya Mufumo wa Nungungulu, Isaya 9:7 i ngalo: “A kupangama ka Jehova wa tiyimpi ku ta maha lezo.” Hi kufanana, wutirelini gakwe, a N’wana wa Nungungulu i kombisile kuhiseka hi wukhozeli ga lisine. (Joh. 2:13-17; 4:34) Nguveni ya Xialakanyiso ya lembe ginwe ni ginwani, a vahuweleli va timiliyoni misaveni yontlhe va maha mizamo ya hombe kasi ku pimanyisa a kuhiseka ka Jehova na Jesu hi ku engetela wutireli gabye. U tava munwe wabye ke?
2. A kuhiseka ku ta hi kuca ku maha yini kusukela hi 14 ka Março?
2 Tsima ga Xialakanyiso: Nyanwaka, a tsima ga ku huwelela Xialakanyiso gi ta sangula hi Mulongiso wa 14 ka Março. Maha makungo zalezi kasi u hiseka nguvu wutirelini. A mabandla ma ta tala hi litsako a xikhati lexi ma mahako mizamo ya ku ramba a vanhu vo tala hi laha zi kotekako hi kona. Maha mizamo ya hombe ya ku ramba zigonzani za wena za Biblia, lava u talako ku va enzela, vatiri-kulori, maxaka, ni zigonzani-kulori hi ku va nyika xirambo kutani hi ku tirisa jw.org.
3. Hi nga engetelisa kuyini a wutireli ga hina hi Março ni Abril?
3 Wuphayona go vunetela: A kuhiseka ku ta hi vuna ku engetela wutireli ga hina kambe. Handle ko kanakana, a votala va ta zi kota ku teka wuphayona go vunetela hi Março ni Abril, kota lezi hi tova ni lungelo go hlawula ku tira 30 wa tihora. Ka wukhozeli ga nwina ga ngango kutani ka xigonzo xa munhu wutsumbu, ehleketani ni ku khongela hi lezi mu nga mahisako zona lezo. (Mav. 15:22) A kuhiseka ka wena tsimeni legi ku nga kuca vanwani lezaku va hisekawu wutirelini. Loku u cica zokari kasi ku engetela wutireli ga wena, u tava na u pimanyisa kuhiseka ka Jesu. — Mar. 6:31-34.
4. Hi wahi mabhinzu ya ku pimanyisa a kuhiseka ka Jehova na Jesu?
4 A ku pimanyisa a kuhiseka ka Jehova na Jesu nguveni ya Xialakanyiso zi ta hi nehela makatekwa ya hombe. Hi ta vuna vanhu vo tala xipanzeni xa hina lezaku va kuma wukustumunyu. Hi ta kuma litsako la ku tirela Jehova ni ku vuna vanwani. (Miti. 20:35) A ku hunza zontlhe lezo, hi ta tsakisa a Nungungulu wa hina wo hiseka zinwe ni N’wana wakwe.