A Nguva Ya Xialakanyiso Xikhati Xi Nene Xo Engetela Ntiro Wa Hina!

1. Zigelo muni hi nga nazo za ku engetela a wutireli ga hina hi Março, Abril ni Maio?

¹ Xana u ta engetela a wutireli ga wena hi nguva ya Xialakanyiso leyi yi nga laha kusuhani? Matikweni yo tala a hlikanhi wu tava wo leha ku hunza wusiku. A vahuweleli vo kari va tava ka maferiya ya xikola kutani ya ntiro lawa va nga ma tirisako wutirelini. A ku sukela 2 ka Abril, hi tava ni tsima go hlawuleka ga ku ramba vanhu va timbilu ti nene lezaku vava zinwe na hina Xialakanyisweni hi 17 ka Abril. Anzhako ka lezo, hi ta ti karatela ku engetela a kutsakela kabye hi tlhela hi va ramba ka kanelo wo hlawuleka lowu wu to vekiwa ka viki gi sangulako hi 25 ka Abril. Hakunene ku na ni zigelo zo tala za kuva hi alakanyela a ku engetela ntiro wa hina hi Março, Abril ni Maio.

2. Hi yihi a yinwe ya tindlela ta ti nene nguvu ta ku engetela wutireli ga hina?

² Wuphayona Go Vunetela: A yinwe ya tindlela ta ti nene nguvu ta ku engetela a ntiro wa hina wuphayona go vunetela. Kota lezi hontlheni hi khomekileko, a ku maha lezo zi lava ku ti longisela na ka ha hi mahlweni ni ku hungula yinwani mitiro. (Mav. 21:5) U nga ha thinda a mitiro yo kari yi nga hiko ya lisima, leyi u tolovelako ku yi maha. (Fil. 1:9-11) Hikuyini u nga bhuleliko vanwani laha bandleni xungetano hi kuxuva ka wena ka kuva phayona go vunetela? Kuzilava vonawu va ta navela a ku tira na wena!

3. Malulamiselo muni lawa a mingango yi nga ma mahako kasi ku engetela a wutireli ga yona?

³ Ka Wukhozeli ga nwina ga Ngango legi gi lanzelako, zi wa tava zi nene a ku bhula hi mixuvo ya nwina kota ngango. (Mav. 15:22) Loku mu tirisana khwatsi, kuzilava a ziro zo kari za ngango wa nwina zi nga zi kota kuva maphayona yo vunetela hi hweti yinwe kutani ku hunza. Ahati loku mu chikelela magumo ya lezaku a mu na ndlela ya ku maha lezo? Hambulezo, a ngango wa nwina wu nga zama ku kuma tindlela ta ku engetela a wutireli hi ku tira ka masiku yo kari nzeni ka viki kutani ku mbheta xikhati xo leha wutirelini hi Mulongiso ni Sonto.

4. Hi wahi a makatekwa hi to ma kuma hi ku engetela a wutireli ga hina nguveni leyi ya Xialakanyiso?

⁴ Jehova wa zi wona zontlhe lezi hi mahako kasi ku mu tirela a tlhela a tsakela a kutikarata ka hina. (Maheb. 6:10) A litsako li kumiwa hi ku nyika Jehova ni vanwani. (1 Kro. 29:9; Miti. 20:35) Xana u nga engetela a ntiro wa wena nguveni leyi ya Xialakanyiso zonake u tshovela a makatekwa yo tala ni litsako la hombe?