“Xana A Vana Va Wena Va Longile?”
1. Hikuyini ku nga ni xilaveko xa lezaku a vanana va gonzako xikola va tshama na va longile?
1 Handle ko kanakana, a xikhati lexi a vana va wena va to tlhela xikoleni ka xipanze xo gumesa xa lembe ga xikola va ta yimisana ni minzhingo ya yiswa ni mitshikelelo. Vona va ta tlhela vava ni malungelo maswa ya ku “kustumunya hi zinene.” (Joh. 18:37) Xana va longile?
2. Zini lezi a vana va wena va faneleko ku zi tiva kasi va tshama na va longile?
2 Xana a vana va wena va zi zwisisa khwatsi a ku zini zi patsekako ka ku hlengela a mibuzo ya ku alakanya a masiku yo hlawuleka ya tiko ni tiferiado va tlhela va tiva a ku hikuyini zi bihileko ku hlengela ka zimaho lezo? Xana va longile lezaku va yimisana ni mitshikelelo leyi va to yi kuma ya ku nghenela zigonzo zo tlakuka, kugangisana, kunwa kutani ku tirisa mimuri yo lahlisa mapimo? Xana va wa to wula ntsena lezaku a ntiro wo kari wu nga amukelekiko ka Nungungulu a wu yelani ni wukhongeli gabye? Kutani va zi tiva a ku tlhamusela a kukholwa kabye? — 1 Ped. 3:15.
3. Xana a vapswali va nga gi tirisisa kuyini a Wukhozeli ga Ngango kasi ku longisela vana vabye?
3 Tirisa A Wukhozeli Ga Ngango: Lisine lezaku, loku zi laveka, mu ta bhulisana hi zikarato zi to humelela hi kufamba ka lembe. Kanilezi a ku ti karatela ku wulawula hi zikarato zi yelanako ni xikola na va nga se sangula ku gonza zi ta nyika kutsumba a vana va wena. Hikuyini mu nga tirisiko a siku ginwe ga Wukhozeli ga Ngango kutani ku hunza lezaku mu maha lezo? U nga ha wutisa vana va wena a ku zini zi va vangelako a kukarateka ka hombe loku va alakanyela ku tlhela xikoleni. A timhaka leti mu nga bhulisana hi tona ka malembe ma nga hunza ti nga ha vuxetwa zezi a vanana va nga kulanyana va tlhela va engetela a kuzwisisa kabye. (Tis. 119:95) Wa zi kota ku tlhela u ti nyika xikhati xa ku vuxeta navo, laha wena u ti mahako mugonzisi, sungukati, kutani xigonzani-kuloni. Gonzisa a vana va wena lezi va faneleko ku hlamulisa zona hi Biblia ni mabhuku yo kota Raciocínios ni Os Jovens Perguntam. A mupswali wo kari i tirisile zikhati za kuvuxeta kasi ku longisela a vana vakwe lezaku va tshinelela vagonzisi vabye kusanguleni ka lembe ginwe ni ginwani kasi va va byela a ku Timboni ta Jehova. — Wona A Sentinela ga 15 ka Dezembro wa 2010, maphajina 3-5.
4. Zini lezi a vapswali va tlharihileko va to zi maha?
4 A zikarato lezi a vanhu vaswa va maKristu va yimisanako nazo masikwini lawa yo gumesa ziya zi engetela a ‘ku karata.’ (2 Tim. 3:1) A vapswali va tlharihileko va ta zama ku alakanyela a zikarato lezo va tlhela va longisela vana vabye lezaku va zi hlula. (Mav. 22:3) Na xi nga se sangula a xipanze xo gumesa xa lembe ga xikola, maha zontlhe u zi kotako kasi ku vuna a vana va wena a ku tshama na va longile.