Hi 17 ka Março hi ta sangula ku nyikela a zirambo za Xialakanyiso
1. Xini hi to sangula ku maha hi 17 ka Março?
1 A ku maha Xialakanyiso lembe ni lembe zi huwelela a kufa ka Jesu. (1 Kor. 11:26) Hikwalaho, hi lava lezaku a vanhu vanwani va tava zinwe na hina ka siku legi kasi vazwa xungetano hi nzhiho, wu nga xinyikiwo xa liranzo xa Jehova. (Joh. 3:16) A lembe legi hi ta sangula ku nyikela zirambo za Xialakanyiso hi Mulongiso wa 17 ka Março. Xana a wu rinzeli a siku legi hi mahlo yo pswhuka lezaku u tira hi laha u zi kotako hi kona?
2. Zini hi nga ha wulako kasi ku nyikela a xirambo?
2 Lezi hi nga ha wulako: I chukwana hi nga lehisi bhulo. Hi nga wula lezi: “Gi cile. Hi tile kasi ku ta ku ramba zinwe ni ngango wa wena lezaku mu tava kona ka Xialakanyiso xa lembe ni lembe xa kufa ka Jesu xi to mahiwa hi 5 ka Abril misaveni yontlhe. Ku ta vekiwa kanelo yo koma leyi yi to tlhamusela lezi zi kotekako ku kumiwa hi kota ya kufa ka Jesu ni lezi yena a mahako ka xikhati lexi. A xirambo lexi xi komba a wutshamu ni xikhati lexi a mutlhangano lowo wu to mahiwa hi xona lomu xipanzeni xa hina.” A xikhati lexi hi nyikelako a zirambo kumbheleni ka viki, hi fanele ku nyikela ni marevista loku zi koteka.
3. Xana hi nga zi kotisa kuyini a ku ramba a vanhu vo tala?
3 U nga siyi munhu: A kungo ga hina ku ramba vontlhe. Hikwalaho, u nga rivali a zigonzani za wena za Biblia, lava u tolovelako ku va enzela, maxaka, vatiri-kuloni, zigonzani-kuloni, vaakelani, ni vanhu vanwani u tivanako navo. A madota ya laha bandleni ma ta komba lezi mu faneleko ku tirisa zona kasi ku tlhanganisa xipanze. A tsima ga hina ga ku ramba a vanhu lezaku vata Xialakanyisweni ga pswala mihanzu. A lembe gi nga hunza, a wasati wo kari i loya Xialakanyisweni zonake a makabye wo kari a zama ku mu vuna a ku languta loyi a nga mu rambile. Kanilezi, a wasati loyi i lo mu byela lezaku a nga tivi munhu ka wutshamu legiyani ni lezaku i no nyikiwa xirambo ni mixo ya siku galegiyani hi wokari a nga kari a tira hi muti ni muti.
4. Hi zihi a zigelo hi nga nazo za kuva hi tira hi kuchivirika kunyikeleni ka zirambo?
4 Kuzilava a wokari a tova kona Xialakanyisweni i ta famba seyo hi lezi u mu nyikileko xirambo. Kani i kona a to famba, kani a nga kona, a kutikarata ka wena ku ta nyika wukustumunyu. A zirambo lezi u to zi nyikela zi ta huwelela lezaku Jesu i Hosi ya ntamu leyi yi fumako ka xikhati lexi. Tlhatakumbiri, a kuchivirika ka wena tsimeni legi ku ta komba ka vahanyi va lomu xipanzeni, vahuweleli-kulobye, ni ka Jehova kambe lezaku wa bonga a xinyikiwo lexi xa nzhiho hi mbilu yontlhe. — Kol. 3:15.