Simamani ku ‘maha lezo’
A Xialakanyiso xa Kufa ka Jesu xi ta mahiwa hi 5 ka Abril
1. Hikuyini a Xialakanyiso xa Kufa ka Jesu xi nga xa lisima?
1 “Mahani lezo, mu nzi alakanya ha zona.” (Luka 22:19) Hi magezu lawa, Jesu i lo laya valanzeli vakwe lezaku va alakanya a kufa kakwe kota muphahlo. Hi kota ya zontlhe lezi a nzhiho wu zi nehileko, a ku na siku ginwani ga lisima nguvu ka maKristu a ku hunza a siku ga Xialakanyiso xa Kufa ka Jesu xi mahiwako lembe ni lembe. Kota lezi a 5 ka Abril, gi nga siku ga Xialakanyiso gi tshinelako, xana hi nga kombisisa kuyini a kubonga ka hina ka Jehova? — Kol. 3:15.
2. Hi nga kombisisa kuyini a kubonga ka hina a Xialakanyiso hi kugonza ni kuehleketa?
2 Ti longisele: Hi tolovelo, ha ti longisela ka zilo hi zi wonako na zi hi za lisima. Hi nga longisela timbilu ta hina xungetano hi Xialakanyiso hi ku kambisisa hi wungango a zimaho zi mahekileko masikwini yo gumesa ya Jesu misaveni hi tlhela hi ehleketa hi zona. (Ezra 7:10) Ku na ni xaxameto wa mitsalo yo kari lomu ka kalendari ni lomu ka Examine as Escrituras Diariamente, kanilezi a xaxameto wo mbhelela wa mitsalo leyo wu nga ni zipimo zi yelanako nayo za bhuku O Maior Homem, wu kumeka ka maphajina 23-24 ya A Sentinela ga 1 ka Fevereiro wa 2011.
3. Hi nga kombisisa kuyini a kubonga ka hina a Xialakanyiso hi ku hlengela nguvu wutirelini?
3 Xumayela: Ha zi kota kambe ku kombisa kubonga ka hina hi ku hlengela nguvu wutirelini. (Luka 6:45) Kusukela Mulongiso wa 17 ka Março, hi tava ni tsima misaveni yontlhe ga ku ramba vanhu lezaku vata Xialakanyisweni. Xana u nga xaxameta luswa a mitiro ya wena kasi u mbheta xikhati xo leha wutirelini, kuzilava hi ku tira kota phayona go vunetela? Hikuyini mu nga bhuliko hi zona ka Wukhozeli ga nwina ga Ngango gi tako?
4. Mabhinzu muni hi zi kotako ku ma kuma hi kuva kona Xialakanyisweni?
4 Hakunene, ha vuneka nguvu hi kuva kona Xialakanyisweni lembe ni lembe! A litsako la hina ni liranzo la hina hi Nungungulu za engeteleka a xikhati lexi hi alakanyelako a wuhana ga Jehova ga ku hi nyika a N’wana wakwe a belekilweko yece kota nzhiho. (Joh. 3:16; 1 Joh. 4:9, 10) Lezo zi hi kurumeta a ku nga ti hanyeli wutsumbu. (2 Kor. 5:14, 15) Zi tlhela zi hi kuca a ku dumisa Jehova kubaseni. (Tis. 102:19-21) Hi lisine, a malanza ya Jehova ma kombisako kubonga ma rinzela hi mahlo yo pswhuka a lungelo legi hi tova nago ga ‘kuba hungu hi kufa ka Hosi’ le Xialakanyisweni hi 5 ka Abril. — 1 Kor. 11:26.