Ti longiselele Xialakanyiso hi mbilu yo tsaka
1. A nguva ya Xialakanyiso xikhati xa xi nene kasi ku maha yini?
1 A Xialakanyiso xa kufa ka Jesu xi to mahiwa hi Wazibili wa 26 ka Março, xi hi nyika lungelo ga lisima ga kuva hi tsaka hi lulamiselo ga Nungungulu kasi ku hi tlhatlhisa. (Isa. 61:10) Hambu mahlweni ka xialakanyiso, a kuva ni moya wa ku tsaka zi ta hi vuna a ku tshama na hi longile. Hi ndlela muni?
2. Xini xi hi kucako a ku longisela a Xialakanyiso?
2 Ku longisela a Xialakanyiso: A Xilalelo xa Hosi ximaho xo eta, kanilezi xa ku olova kambe. Hambulezo, zi lava ku hi maha makungo na ka ha hi mahlweni kasi ku nga tluliwi zipanze za lisima. (Mav. 21:5) Ku fanele ku hlawuliwa xikhati ni wutshamu gi faneleko. Ku fanele ku laviwa zibaba zi faneleko ni vinya gi faneleko. A wutshamu ga mutlhangano gi fanele ku basiswa gi tlhela gi longiselwa khwatsi. A mukaneli loyi a hlawulilweko i fanele ku vuxeta khwatsi, niku a vakombeteli ni vahunziseli va zibaba ni vinya va fanele ku nyikwa zileletelo zo dlunyateka. Handle ko kanakana, a kutala ka zilo lezi zi sina zi mahiwa hi kale. A kubonga loku hi nga nako hi ntamu wu hanyisako wa nzhiho ku hi kuca ku longisela khwatsi a ximaho lexi xa lisima. — 1 Ped. 1:8, 9.
3. Xana hi nga longiselisa kuyini a mbilu ya hina kasi hi vuneka khwatsi ka Xilalelo xa Hosi?
3 Longisela a mbilu: Za lisima kambe a kuva hi longisela a mbilu ya hina kasi hi zi kota ku zwisisa khwatsi a tlhamuselo wa Xialakanyiso. (Ezra 7:10) Kasi ku maha lezo, hi fanele ku ti nyika xikhati kasi hi lera a kugonza ka Biblia ko hlawuleka ka nguva ya Xialakanyiso hi tlhela hi ehleketa hi masiku yo gumesa ya wutomi ga Jesu laha misaveni. A ku ehleketa hi kutikarata ka Jesu zi ta hi kuca ku mu pimanyisa. — Gal. 2:20.
4. Hi gihi a bhinzu ga nzhiho gi ku nehelako litsako la hombe?
4 A kufa ka Jesu ku seketela a wuhosi ga Jehova. Ka hi tlhatlhisa ka xionho ni kufa. (1 Joh. 2:2) Ku hi vululela ndlela ya ku hiva ni kuzwanana ko rula na Nungungulu ni ndlela ya ku kuma wutomi ga pinzukelwa. (Kol. 1:21, 22) Ka hi vuna kambe lezaku hi tiyisa a kutiyimisela ka hina ka ku hanya hi kuyelana ni kutihendleleta ka hina ka Jehova hi tlhela hi tshama na hi tiyile kota vapizani va Kristu. (Mat. 16:24) A xikhati lexi u ti longiselako u tlhela uva kona Xialakanyisweni xi tako, ngha a litsako la wena li kula!