Xini xi ku nyikako litsako?
1. Hi xihi a xigelo xa hina xa ku tsaka kumbheleni ka hweti ni hweti?
1 A xikhati lexi a hweti yi mbhelako, ni laha vontlhe va kombeliwako lezaku va nyikela a mubiko wabye wa ntiro wa simu, hi xihi xigelo xa “ku ti kulisa” kutani litsako la wena ke? (Gal. 6:4) Kani hi maphayona yo hlawuleka, ma bikako a 130 wa tihora hi hweti, kani hi vahuweleli va vumelelwako ku bika a 15 wa timeneti hi hweti, hontlheni hi fanele ku tsaka hi ntiro lowu hi mahelako Jehova hi muhefemulo wontlhe. — Tis. 100:2.
2. Hikuyini hi faneleko ku ti karata ntirweni wa Jehova?
2 Kota Hosi ya Hombe wuakweni gontlhe, Jehova i fanelwa hi ku nyikiwa za zi nene nguvu ka zontlhe hi nga nazo. (Mal. 1:6) Hi kota ya ku mu ranza, hi ti hendleletile kasi hi maha kuranza kakwe. Hikwalaho, kumbheleni ka siku kutani kumbheleni ka hweti, loku hi tiyiseka lezaku hi nyikele a zo “ranga” za xikhati xa hina, wutlhari, ni ntamu wa hina ntirweni wa Jehova, hi tava ni xigelo xa ku tsaka. (Mav. 3:9) Kanilezi, loku a livalo la hina li hi kona hi fanele ku ti hlola kasi hi chukwatisa. — Rom. 2:15.
3. Hikuyini zi nga hiko zi nene a ku ti fananisa ni vanwani?
3 “Na ku nga hi ku ti fananisa ni vanwani”: A ku ti fananisa ni vanwani kutani ni lezi hi nga zi kota ku maha a xikhati lexi hi nga ha hi ni ntamu wo tala a hi zi nene. A ziyimo za cica. A wutlhari ga hambanahambana. A ku ti fananisa ni vanwani a kutala ka zikhati zi vanga kupalisana kutani ku tizwa na u nga hi wa nchumu. (Gal. 5:26; 6:4) Jesu i wa nga fananisi vanhu. Kanilezi, i wa dzunza munhu ni munhu maringano ni lezi a nga zi kota ku maha. — Mar. 14:6-9.
4. Hi gonza yini ka mufananiso wa Jesu wa titalenta ke?
4 Ka mufananiso wa Jesu wa titalenta, a nanza ginwe ni ginwani gi nyikilwe titalenta maringano ni “ntamu wa gona.” (Mat. 25:15) A xikhati lexi a nwinyi a nga wuya zonake a lava mubiko wa ntiro wabye, lawa ma nga tirile hi kutikarata maringano ni ntamu wabye, ni ziyimo zabye, ma lo dzunziwa ma tlhela ma enghena kutsakeni ka hosi ya wona. (Mat. 25:21, 23) Hi kufanana, loku hinawu hi tshama na hi khomekile ntirweni wa ku xumayela Mufumo, handle ko kanakana Nungungulu i ta hi ranza, niku hi tava ni xigelo xa ku tsaka!