Tirisa zitlukana kasi ku hangalasa a mahungu yo saseka
1. Xana a zitlukana zita na zi tirisiswa kuyini hi vanhu va Nungungulu?
1 A Timboni ta Jehova tita na ti tirisa a zitlukana zi seketelwako ka Biblia kasi ku hangalasa a mahungu yo saseka kusukela kale. Hi 1880, C. T. Russell ni lava a nga kari a tirisana navo va lo sangula ku humesa a Bible Students’ Tracts (Zitlukana za Zigonzani za Biblia), lezi zi nga nyikiwa a vagonzi va Watch Tower (A Murinzeli) lezaku va zi avela ka vanhu laha va yileko. A zitlukana lezo zi wa nyikiwa nguvu lisima laha ka kuza a gezu “xitlukana” gi patsiwa ka vito gi chulilweko a hlengeletano leyi yi nga wa ta vuvumisa a zilaveko za Mufumo, ku nga Zion’s Watch Tower Tract Society, leyi makunu yi vitwako Sociedade Torre de Vigia de Bíblias e Tratados de Pennsylvania. Kwalomo ka va 1918, a Zigonzani za Biblia zi wa avele a ku hunza 300 wa timiliyoni ta zitlukana. A zitlukana za ha simama kuva xitiro xi bhinzulako nguvu kuxumayeleni.
2. Hikuyini a zitlukana zi bhinzulako?
2 Xigelo xa kubhinzula ka zitlukana: A zitlukana zi sasekiselwe niku za koka mahlo. A mahungu ma songilweko lawa ma nga ka xona ma koka kupima ma tlhela ma gonzisa. Za tsakisa a venyi va miti lava va tsanzekako ku gonza marevista kutani mabhuku hi kota ya wuhombe ga wona. A zitlukana za olova a ku zi nyikela sinwini, zi tlhela zi olovela a vahuweleli vaswa kutani vanana. Ahandle ka lezo, a zitlukana zi tsongwani niku za olova a ku fambafamba nazo.
3. Hlawutela a tshango ga wena wutsumbu kutani u gi gonzileko mabhukwini ya hina legi gi kombisako a lisima la zitlukana.
3 A votala vazwa a mahungu yo saseka hi khati go sangula hi ku vuniwa hi xitlukana. Hi xikombiso, a wasati wo kari le Haiti i lo wona a xinwe xa zitlukana za hina xitaratweni. I lo xi rola, a xi gonza, a tlhela aku “Nzi kumile lisine!” Anzhako ka lezo, i loya Salawini ya Mufumo, a sangula ku gonza a Biblia, a guma a bapatizwa — zontlhe lezo hi kota ya ntamu wa Mhaka ya Nungungulu yi kumekako ka xitlukana.
4. Hi gihi a kungo ga hina loku hi leletelwe ku nyikela zitlukana ka hweti leyo?
4 Hi muti ni muti: Kota lezi a zitlukana zi nga xitiro xi bhinzulako kunyikeni ka wukustumunyu, zi ta sangula ku nyikelwa sinwini ka tihweti to kari, kusukela Novembro. A kungo ga hina a hi ku nyikela a xitlukana ntsena loku a nwinyi wa muti a xi vumela kanilezi hi lava ku xi tirisa kasi ku sangula a bhulo. Loku a nwinyi wa muti a tsakela ka lienzo lo sangula kutani ka lienzo lo wuyela, ha zi kota ku mu komba lezi hi gonzisisako zona a Biblia hi ku tirisa a bhuku A Biblia Gi Gonzisako kutani ginwani bhuku ga ku gonzisa hi gona a Biblia. Xana hi nga nyikelisa kuyini a zitlukana hi muti ni muti? A xitlukana xinwe ni xinwani xi na ni matshamela ya xona, hikwalaho hi fanele ku zi tiva khwatsi na hi nga se zi nyikela sinwini.
5. Hi nga nyikelisa kuyini zitlukana hi muti ni muti?
5 A xingheniso xa hina xi fanele ku zwananisa a matshamela ya xipanze xa hina ni xitlukana lexi hi nyikelako. Hi nga sangula a bhulo hi ku nyika xitlukana a nwinyi wa muti. Lezi a nghohe ya xitlukana yi kokako mahlo, za koteka a ku mu vuxela kutsakela. Kutani hi nga mu komba zitlukana zo tsalangana hi tlhela hi mu tsika a ti hlawulela lexi xi mu tsakisako. Loku hi kari hi tira ka xipanze lexi a vanhu va kona va kanakanako ku hi amukela, hi nga va komba a nghohe ya xitlukana, kutani ku kombela ku va siyela a nchumu lowu u lavako lezaku va ku nyika mawonela yabye ka wona. Loku a hloko ya mhaka ya xitlukana lexo yi hi xiwutiso, ha zi kota ku wutisa a mawonela yakwe hi xona. Kutani hi nga vanga xiwutiso xa hina wutsumbu lexi xi to mu vuxela kutsakela xi tlhela xi kuca mabhulo. Anzhako ka lezo hi nga lera zinwe ni nwinyi wa muti a xipanze xo kari xa timhaka ta xitlukana, na hi nyimanyana lomu ku nga ni ziwutiso lezaku a nwinyi wa muti a wula mawonela yakwe. Ku nga ha gonziwa mitsalo-tshinya lomu ka Biblia hi kukongoma. Anzhako ka ku bhulisana hi timhaka to kari ta xitlukana, hi nga gumesa a bhulo hi tlhela hi maha malulamiselo yo tiya ya ku mu tlhelela. Loku ku hi lezaku a bandla ga tolovela ku siya mabhuku loku a venyi va miti va hi hava, hi nga ha siya a xitlukana ka wutshamu go fihlalanyana.
6. Xana a zitlukana zi nga tirisiswa kuyini ka wukustumunyu ga lomu maruweni?
6 Wukustumunyu ga lomu maruweni: Xana wa tshuka u tirisa zitlukana ka wukustumunyu ga lomu maruweni? A vahunzi-ndlela vo kari vata na va jahile niku a va kombisi ku lava ku nyima va bhula na hina. Zi nga ha karata ku tiva lezaku va tsakela hakunene ke. A wutshanwini ga ku va nyika marevista ya maswa nguvu na hi nga zi tivi lezaku va ta ma gonza ke, i chukwana ku va nyika a xitlukana. Kota lezi a nghohe ya xona yi tsakisako na xi hi ni mahungu yo koma, vona va nga ha kuceka ku xi gonza loku vava ni timeneti to kari. Kanilezi loku va nga hi na xihatla, hi nga bhulisana navo hi timhaka to kari ta nzeni ka xitlukana.
7. Hlawutela matshango ma kombako a matirisela ya zitlukana ka wukustumunyu ga xitshuketi.
7 Wukustumunyu ga xitshuketi: Za hehuka a ku nyika wukustumunyu ga xitshuketi hi zitlukana. A makabye wo kari i fambafamba nazo phaketini. Loku a kuma munhu, wo kota muxavisi wa xitolo, i mu byela lezaku i lava ku mu nyika nchumu wa ku lera zonake a mu nyika a xitlukana. A patswa wo kari wu loya doropeni ga Nova Iorque lezaku wu ya hlamalahlamala a doropa lego, kanilezi va alakanyile lezaku va wa ta kumana ni vanhu va kuta hi ka matiko yo hambanahambana. Hikwalaho va lo teka a xibhukwana Nações ni zitlukana zo hlaya hi tirimi to hambanahambana. Lezo va wa mahela ku loku vazwa muxavisi wo kari na a wulawula lirimi la matiko-wundle kutani loku a wokari a tshama kusuhani navo laha parki kutani restaurante, va wa ta mu nyika xitlukana hi lirimi lakwe la mabeleko.
8. Xana a zitlukana zi ringaniswa ni mbewu hi ndlela muni?
8 “Byala a mbewu ya wena”: A zitlukana zi nga ringaniswa ni mbewu. A murimi i xwanya a mbewu hi laha a zi kotako hi kona hakuva a nga yi tivi leyi yi to mila. A bhuku ga Mutshawuteli 11:6 gi ngalo: “Byala a mbewu ya wena na ga hi mixo, ni laha gambyeni u nga humuti a woko ga wena; hakuva a ku zi tivi lezaku ku ta mila yihi, leyi kutani leyiya, hambu loku ti mila hi wumbiri ga tona.” Hikwalaho, ngha hi “humesa wutivi” hi ku tirisa a xitiro lexi xi bhinzulako nguvu. — Mav. 15:7.
[Tlhamuselo wa mifota ka phajina 3]
Kota lezi a zitlukana zi nga xitiro xi bhinzulako kunyikeni ka wukustumunyu, zi ta sangula ku nyikelwa sinwini ka tihweti to kari, kusukela Novembro.