Xana zi nga ku vuna a kuva ni xipanze xa wena wutsumbu?
1. Xini a xipanze xa munhu wutsumbu?
1 Xini a xipanze xa munhu wutsumbu? Ka mabandla lawa ma nga ni xipanze xa hombe xa simu, lexi xipanze xi lumbako wena, kuzilava xi nga kusuhani ni laha u hanyako kona. A bhuku Organizados, gi tlhamusela lezi ka phajina 103: “A kuva ni xipanze xa wena wutsumbu xi nga ka wutshamu gi zwananako ni xiyimo xa wena zi ta ku vuna ku lonzowota khwatsi a xikhati u nga naxo kasi ku xi tirisa sinwini. Loku u zi lava, u nga ha ramba muhuweleli munwani lezaku a ya tira na wena ka xipanze lexo.”
2. Xana a xipanze xa munhu wutsumbu xi nga tirisiswa kuyini kasi ku xumayela hi ntlawa?
2 Kasi ku xumayela hi ntlawa: Loku u nyikwa xipanze xi nga kusuhani ni laha u tirako kona, u nga ha hlengela wutirelini hi xikhati xa kuhumula kutani a xikhati u humako hi ntirweni, kuzilava na u hi ni muhuweleli munwani a tirako kusuhani ni kwalaho. Loku u nyikwa xipanze xi nga kusuhani ni laha mutini ka wena, u nga xi tirisa ni ngango wa wena kasi ku xumayela ni wusikwanyana. U nga rivali lezaku loku u ngayi ka mutlhangano wa simu, zi fanelile kuva u ti mahela mukhongelo u kombela wurangeli ga Jehova na u nga se sangula ku xumayela. (Fil. 4:6) A xinwani kambe hi lezaku u fanele kuva ni kuringanisela laha ka xikhati u xi mbhetako na u tira ka xipanze xa wena wutsumbu ni lexi u seketelako a lulamiselo ga bandla ga ku tira ni ntlawa wa simu. Nguvunguvu kumbheleni ka viki, ku nga masiku lawa a votala va tlhanganako kasi kuya sinwini, zi chukwana nguvu a ku seketela a ntlawa wa wena wa simu.
3. Hi wahi a mabhinzu ya kuva ni xipanze xa wena wutsumbu?
3 Mabhinzu: Loku u hi ni xipanze xa wena wutsumbu, u na ni wutshamu ga ku u nga xumayela ni ka xihi xikhati u zi kotako. U tava ni xikhati xo leha xa ku xi tirisa kuxumayeleni, u hungula a xikhati xa ku famba. A kumaheka loku ka vuna vokari lezaku va tira kota maphayona yo vunetela kutani ya xikhati xontlhe. Lezi a vanhu lava va kombisako kutsakela va nga kwalaho kusuhani, za olova nguvu ku maha maenzo yo wuyela ni ku fambisa zigonzo za Biblia. A votala va polile lezaku a ku xumayela ka xipanze xa vona wutsumbu za va vuna ku tivana khwatsi ni venyi va miti ni kuva va tsumbiwa hi vona, nguvunguvu loku va zi kota ku tira ka xipanze lexo makhati mambiri kutani kuhunza na va nga se ya bika lezaku va tlhanganyisile kasi a vamakabye vanwani va zi kota ku kombela loku va xi lava. Xana a ku tira ka xipanze xa wena wutsumbu zi nga ku vuna wena ni ngango lezaku mu tatisa khwatsi a wutireli ga nwina? — 2 Tim. 4:5.