Xana u ta teka wuphayona go vunetela?

1. Hikuyini a nguva ya Xialakanyiso xi nga xikhati xa xi nene kasi ku anzisa a wutireli ga hina?

¹ A nguva ya Xialakanyiso xikhati xa xi nene kasi ku anzisa a wutireli ga hina. Xikhati lexi hi ehleketako hi liranzo la hombe leli Jehova a li kombisileko hi ku hi nyika N’wana wakwe kota nzhiho. (Joh. 3:16) Lezo zi hi maha hi bonga nguvu Jehova zi tlhela zi engetela a kunavela ka hina ka ku bhulela vanwani hi Jehova ni lezi a mahelako vanhu. (Isa. 12:4, 5; Luka 6:45) Lexo xikhati kambe lexi hi ti buzako hi tsima go hlawuleka ga ku ramba maxaka ni vanghana zinwe ni vanhu lomu xipanzeni lezaku va tava na hina Xialakanyisweni. Loku a Xialakanyiso xi hunzile, hi ti karatela ku hlakulela a kutsakela ka lava va tova kona Xialakanyisweni. Xana u ta anzisa a wutireli ga wena hi ku teka wuphayona hi Março, Abril, kutani Maio?

2. Hikuyini a hweti ya Março yi nga hweti ya yi nene nguvu kasi ku teka wuphayona go vunetela?

² Ngha a hweti ya Março yiva yo hlawuleka: A hweti ya Março yi tava hweti ya yi nene nguvu kasi ku teka wuphayona go vunetela. Lava va to kombela wuphayona go vunetela va tava ni lungelo ga ku hlawula a 30 kutani 50 wa tihora. Loku a muwoneleli wa xipanze a mu enzela hi Março, a maphayona yo vunetela ma nga hava kona ka mutlhangano wontlhe lowu a to wu maha ni maphayona ya xikhati xontlhe ni yo hlawuleka. A tsima ga ku nyikela a zirambo za Xiakanyiso, lexi xi to mahiwa hi Wazibili wa 26 ka Março wa 2013, gi ta sangula hi 1 ka Março niku gi tava ni xikhati xo leha ku hunza malembe ma hunzileko. Tlhatakumbiri, a hweti ya Março yi na ni ntlhanu wa Milongiso ni ntlhanu wa tiSonto. Makunu a hi chukwana u maha khwatsi makungu ya kuva u maha hweti leyi yiva yo hlawuleka nguvu.

3. Hi nga mahisa kuyini makungo kasi ku anzisa a wutireli ga hina?

³ Maha makungo zalezi: Lexi xikhati xa ku u hlola a longoloko wa wena u tlhela u wona lexi u faneleko ku cica kasi u teka a wuphayona go vunetela. Za lisima ku a ngango wu tirisana khwatsi, hikwalaho ti nyikeni xikhati ka Wukhozeli ga nwina ga Ngango kasi ku bhulisana hi mixuvo ya nwina kota ngango mu tlhela mu maha longoloko. (Mav. 15:22) Loku u nga zi koti ku teka wuphayona go vunetela, u nga mbheli ntamu. Xana u nga cica a longoloko wa wena lezaku u zi kota ku hlwelanyana wutirelini ka masiku lawa u zi kotako ku famba? Xana u nga kuma siku ginwani ga kuya sinwini kuhunza lawa u nga ma tolovela?

4. Mabhinzu muni ma tova kona loku hi anzisa a wutireli ga hina hi Março, Abril ni Maio?

⁴ A xikhati lexi hi anzisako a wutireli ga hina hi Março, Abril ni Maio, a litsako leli hi li kumako hi ku tirela Jehova ni ku nyika vanwani lonawu li ta kula. (Joh. 4:34; Mit. 20:35) A xa lisima nguvu hi lezaku a kutikarata ka hina ku ta neha litsako ka Jehova. — Mav. 27:11.