Engetela wutlhari ga wena wutirelini — Hi ku tiva ku hlamula lava va tsemako bhulo

Hikuyini zi nga za lisima? Hi nga ti alakanyela na u zwile lezaku ku lava ku maheka mhango ya ntumbuluko. Wa zi tiva ku loku a vanhu va nga tsutsumi va tafa. A xikhati u sukako u ya tlharihisa muakelane wa wena, i ku tsemarisa aku i khomekile. Handle ko kanakana u wa nga ta tekela ku mu tsika! A vanhu vo tala xipanzeni xa hina va hi hlongola, na va nga tivi a lisima la mahungu lawa hi fambako nawo. Kuzilava ho ya va kuma na va karatekile. (Mat. 24:37-39) Za koteka kambe ku ngha va no tatiwa ti hloko hi vanhu. (Mat. 11:18, 19) Va nga ha alakanya lezaku a hi hambani ni vanhu lava a wukhongeli gabye gi pswalako mihanzu yo biha. (2 Ped. 2:1, 2) Loku a nwinyi wa muti a nga tekeli ku tsakela, a hi faneli ku tekela ku mu tsika.

Mamahela ya kona:

• Na u nga seya kuxumayeleni ka muti ni muti, ehleketa kutsongwani hi lezi a vanhu tolovelako ku tsemisa zona bhulo ni ndlela yo va hlamula.

• Loku a nwinyi wa muti a wula zokari kasi ku tsema bhulo, zama ku simamisa bhulo hi xichawo. Kuzilava u nga maha lezo hi ku mu dzunza. Hi xikombiso, loku aku i na ni wukhongeli gakwe, u nga mu hlamula lezi, “Nzi tsaka nguvu hi ku kuma munhu wo fana na wena loyi a ranzako zilo za moya.” A zikhati zinwani a ku zwisisa a kutizwa ka nwinyi wa muti kutani ziyimo zakwe zi nga ku vuna ku simama u mu nyika wukustumunyu. Hi xikombiso loku aku i khomekile, u nga wula lezi: “Nza zi zwisisa. Kanilezi na nzi nga se suka, nzi wa tsakela ku ku siyela lexi.” A ndlela yinwani ku maha xiwutiso loku a nwinyi wa muti aku a nga lavi nchumu. U nga ha wula lezi: “U lava ku wula lezaku a wu khatali hi Biblia, kutani wukhongeli?”

• Tirisa wutlhari. Alakanya lezaku Jehova a nga kurumeti munhu a kuva a ingisela. (Deut. 30:19) Munhu ni munhu i ta rwala nzhwalo wakwe wa wutihlamuleli mahlweni ka Jehova. (Gal. 6:5) Loku a nwinyi wa muti a nonoha, i chukwana ku suka hi famba. Loku hi kombisa xichawo hi lezi a ti zwisako zona, hi nga ha vulula ndlela ya lezaku a muhuweleli munwani a ta nyika wukustumunyu xikhatini xi tako. — 1 Ped. 3:15.

Ringisa lezi ka hweti leyi:

• Loku u kuma munhu a zamako ku tsema bhulo, a xikhati mu sukako, bhulisana ni loyi u tirako naye xungetano hi lezi u nga wa tava u hlamulisile zona hi ndlela ya chukwana.