Tirisa a jw.org wutirelini ga wena

A Web site ya hina xitiro xa lisima xa ku hi vuna a ku xwanya a mahungu yo saseka “kala le magemeta-musi ya misava.” (Miti. 1:8) A kutala ka venyi va miti a va yi kumi ha voce a jw.org. A kuhambana ni lezo, va tiva a site ntsena anzhako ko ngha a muhuweleli a va kongomisile ka yona.

A muwoneleli wo kari a fambafambako i mahile a download ya vidiyu Hikuyini u faneleko ku gonza a Biblia? ka fone yakwe niku i komba vanhu ni ka xihi xikhati a kumako mole. Hi xikombiso, a xikhati lexi a xumayelako hi muti ni muti, i ngalo: “Nzi kari nzi enzela vanhu hi xikhatanyana kasi ku va vuna ku kuma mihlamulo ya ziwutiso zinharu za lisima: Hikuyini a tiko gi nga ni zikarato zo tala? Xana Nungungulu i ta zi fuvisisa kuyini? Niku hi nga yimisanisa kuyini nazo? A vidiyu leyi yo koma yi na ni ziwutiso lezi.” Zonake a yi bisa, a cuwukela lezi a nwinyi wa muti a to maha. A vidiyu leyi ya koka nguvu kupima laha ka kuza a vanhu vo tala va nga susi mahlo yabye ka yona loku yi nga se mbhela. Anzhako ka lezo a muwoneleli loye a fambafambako i ngalo: “U zi zwile zalezi lezaku u nga kombela a xigonzo xa Biblia ka internet. Kota lezi nzi nga kwalaha, nzi nga ku komba hi xihatla lezi xi mahiswako zona.” Loku a nwinyi wa muti a vumela, i mu komba lezi a xigonzo xi mahiswako zona hi ku tirisa a broxura Mahungu yo Saseka. Loku a nwinyi wa muti a nga hi na xikhati, i maha malulamiselo ya ku ta maha lezo ka lienzo li to lanzela. A xikhati lexi a yako ka restaurante yo kari kasi ku ya humula, i wula zilo zo fana ni lezo ka loyi a tshamileko kusuhani kakwe anzhako ko ngha a sangulile a mabhulo ya wunghana. Xana wa tirisa a jw.org wutirelini ga wena?