Fambisa zigonzo za Biblia zi khumbako
1. Wutihlamuleli muni legi a vahuweleli lava va fambisako zigonzo za Biblia va nga nago?
1 A ku na munhu a zi kotako ku tirela Nungungulu “loku a nga kokiwi” hi Jehova. (Joh. 6:44) Hambu zi tshamisile lezo, a vahuweleli va fanele ku maha xipanze xabye kasi ku vuna vanhu lezaku va tshinela ka Dadani wabye wa le tilweni. (Jak.4:8). Lezo zi lava ku ti longisela. A ku lera a tinzimana hi tlhela hi maha ziwutiso lezi zi nga laha ka bhuku ntsena a zi eneli kasi ku vuna a zigonzani za hina a ku zwisisa a mahungu ni ku kula hi tlhelo ga moya.
2. A xigonzo xa Biblia xi khumbako xi tava ni wuyelo muni?
2 Kasi ku fambisa zigonzo zi khumbako, a vahuweleli va fanele ku vuna zigonzani zabye lezaku (1) zi zwisisa lezi a Biblia gi zi wulako, (2) zi kholwa lezi a Biblia gi zi gonzisako ni (3) zi hanya hi lezi a Biblia gi zi gonzisako. (Joh. 3:16; 17:3; Jak. 2:26) Zi nga ha teka tihweti kasi ku vuna munhu lezaku aba mazambo lawo. Hambulezo, a zambo ginwe ni ginwani gi yimela xigava xa ku hlakulela kuzwanana kakwe na Jehova ni ku ti hendleleta ka yena.
3. Hikuyini a vagonzisi va nene va mahako ziwutiso zo lava ku tiva mawonela?
3 A xigonzani xa Biblia xi alakanya yini?: Kasi ku wona lezaku a xigonzani xa hina xa zi zwisisa ni ku kholwa lezi xi gonzako, potsa ku wulawula wece, u xi kuca a ku ti tlhatlha xifuva. (Jak. 1:19) Wa zi zwisisa lezi a Biblia gi wulako xungetano hi mhaka leyi mu gonzako ke? A nga zi kota ku tlhamusela a mhaka leyo hi magezu ya yena nwinyi? I ti zwisa kuyini hi lezi a gonzako? Wa kholwa lezaku lezi a Biblia gi zi gonzisako za zwisiseka? (1 Tes. 2:13) Wa zi zwisisa lezaku lezi a gonzako zi fanele ku cica a mahanyela yakwe ke? (Kol. 3:10) Kasi ku kuma mihlamulo ya ziwutiso lezi, hi fanele ku maha ziwutiso hi wutlhari za ku lava ku tiva mawonela yakwe, hi guma hi demba ndleve. — Mat. 16:13-16.
4. Zini hi faneleko ku maha loku a xigonzani xa Biblia zi xi karatela ku zwisisa kutani ku hanya hi lezi xi gonzisiwako hi Biblia ke?
4 A mikhuwo ni maalakanyo zi tala ku womelela lomu ka hloko zi tlhela zi teka xikhati kasi ku zi susa. (2 Kor. 10:5) Ahati loku a xigonzani xi nga kholwi kutani xi nga hanyi hi lezi xi gonzako? Ku laveka lihlaza-mbilu kasi ku nyika xikhati xa ku a Mhaka ya Nungungulu ni moya wa ku basa zi tira mbilwini ya xigonzani. (1 Kor. 3:6, 7; Maheb. 4:12) Wutshanwini ga ku mu bhongela kutani ku mu kurumeta ku kholwa, a kutala ka zikhati i chukwana ku hunza muya ka mhaka yinwani loku a xigonzani zi xi karatela ku zwisisa kutani ku hanya hi lezi a Biblia gi zi gonzisako. A xikhati lexi hi simamako ku mu gonzisa hi lihlaza-mbilu ni liranzo, hi kufamba ka xikhati a nga ha kuceka ku tirisa lezi a zi gonzako.