Engetela wutlhari ga wena wutirelini — Gonzisa zigonzani za Biblia a ku ti mahela longoloko wu nene wa xigonzo
Hikuyini zi nga za lisima: Kasi ku kula xi buva hi tlhelo ga moya, a xigonzani xa Biblia xi fanele ku gisa kupima ni mbilu ya xona hi tigonzo to eta ta Mhaka ya Nungungulu. (Maheb. 5:12–6:1) A ku gonza zi lava kutikarata. Lezo zi patsa ku yelanisa mahungu maswa ni lawa hi sinako hi ma tiva hi tlhela hi wona a lisima ya wona. (Mav. 2:1-6) A ku gonza ku kambisisa hi yece zi ta vuna xigonzani a ku hlamula ziwutiso za Biblia hi ku tirisa a mabhuku ya hina ya wuKristu. A kutikarata kontlhe loku va ku mahako kasi ku hanya hi lezi va zi gonzako ku ta va vuna kulwa ni minzhingo leyi va to kumana nayo kota maKristu. — Luka 6:47, 48.
Mamahela ya kona:
• Khanyisa a xilaveko xa ku kombela xivuno xa Jehova hi mukhongelo mahlweni ka xigonzo xinwe ni xinwani. — Joh. 14:26; 1 Kor. 2:10.
• Kusukela kusanguleni, kuca xigonzani xa wena lezaku xi longisela a xigonzo xo xona xa Biblia na ka ha hi mahlweni. Xi kombe a bhuku ga wena u tlhela u xi gonzisa ku funga a timhaka-tshinya ta hlamulo.
• Kuca xigonzani xa wena lezaku xi hlamula ziwutiso hi magezu ya xona. Potsa ku maha xigonzo xa ziwutiso ni mihlamulo basi, laha a xigonzani xi yako hi ku lera a mihlamulo lomu ka bhuku.
• Kuca xigonzani xa wena ku lera a xipanze xo kari xa Mhaka ya Nungungulu siku ni siku. Xi kombe a longoloko wa kugonza ka Biblia wu nga ka jw.org, kutani ka Murinzeli wa 1 ka Agosto wa 2009 pp. 15-18, hi xiPutukezi, lowu wu kombako lezi xi nga mahisako zona. A ku gonza a Biblia siku ni siku zi lava kutiyimisela, kanilezi a kutikarata loko ku pswala mihanzu yi nene. — Tis. 1:2, 3.
• Komba xigonzani xa wena lezi xi nga kumisako zona mihlamulo ya ziwutiso za Biblia hi ku tirisa Watchtower Library, BIBLIOTEKA ON-LINE da Torre de Vigia, kutani Bhuku go kambisisa hi gona. Xi vune ku tiva a tisimbulo ta mabhuku ma tolovelako ku tiriswa mitlhanganweni ya bandla.
Ka hweti leyi, ringisa lezi:
• Kumbheleni ka xihlokwana xa mhaka kutani xipimo, kombela xigonzani xa wena lezaku xi songa hi magezu ma tsongwani lezi xi zi gonzileko. Loku u nga hi na xigonzani, zama ku songa a xipanze xo kari xa Biblia kutani nzimana ya Murinzeli hi magezu ma tsongwani kasi ku engetela kuzwisisa ka wena wutsumbu.