MAHANYELA YA WUKRISTU
Seketela matshinya ya milayo ya Jehova ya mahanyela
Jehova Nungungulu i yimisile matshinya ya milayo ya mahanyela kasi a vanhu va hanya hi wona. Hi xikombiso, i layile lezaku a wukati xiboho xa pinzukelwa xikari ka wanuna ni wasati. (Mt 19:4-6, 9) Wa beletela tixaka tontlhe ta wubhayi. (1 Kor 6:9, 10) Wa hi nyika kambe a matshinya ya milayo xungetano hi maambalela ni kutisasekisa lawa ma hambanisako vanhu vakwe ni vanhu vanwani. — De 22:5; 1 Ti 2:9, 10.
Inyamutlha a vanhu vo tala va kanyisa matshinya ya milayo ya Jehova. (Ro 1:18-32) Va tsika mawonela ya vanhu ma rangela maambalela, kutisasekisa ni mahanyela yabye. A votala va ti dzunza hi kota ya mahanyela yabye yo biha va tlhela va chepeta lava va hanyako hi ndlela yo hambana navo. — 1 Pe 4:3, 4.
Kota Timboni ta Jehova, hi fanele ku seketela milayo ya Nungungulu ya mahanyela hi ku tiya-hlana. (Ro 12:9) Hi ndlela muni? Hi ndlela ya liranzo hi fanele ku vuna vanhu lezaku va tiva lezi zi amukelekako ka Nungungulu. Kanilezi hinawu hi fanele ku seketela milayo yo tlakuka ya mahanyela wutomini ga hina. Hi xikombiso, a xikhati hi hlawulako timoda ta tinguwo ni kutisasekisa, hi nga ti wutisa lezi: ‘Lezi nzi hlawulako zi komba lezaku nza seketela milayo ya Jehova ya mahanyela kutani ya tiko? A maambalela ni kutisasekisa ka mina zi nzi tivekisa kota muKristu a chavako Nungungulu?’ Niku a xikhati hi hlawulako a longoloko wa televizawu, kutani mafilmi, hi nga ti wutisa lezi: ‘Xana Jehova wa zi amukela zalezi? Milayo muni ya mahanyela yi vuvumisiwako? Lezi nzi hlawulako za daya livalo la mina laha ka kuza nzi nga ha cheli kota hi matshinya ya milayo ya Jehova? (Lis 101:3) Xana za khunguvanyisa va laha ngangweni wa mina kutani vanwani?’ — 1 Kor 10:31-33.
Hikuyini zi nga za lisima a ku seketela milayo ya Jehova ya mahanyela? Ku nga hi kale, Kristu Jesu i ta lovisa matiko wontlhe ni wubihi gontlhe. (Eze 9:4-7) Ntsena lava va mahako kuranza ka Nungungulu hi vona va to pona. (1 Jo 2:15-17) Hikwalaho, a hi seketeleni a matshinya ya milayo ya Jehova ya mahanyela kasi a mahanyela ya hina ma mu dumisa. — 1 Pe 2:11, 12.
A maambalela ni kutisasekisa ka mina za komba lezaku nza seketela matshinya ya milayo ya mahanyela?
WONA VIDIYU MAHA MUNGHANA WA JEHOVA — XIGONZO 22: WANUNA NI WASATI, MU GUMESA MU BHULISANA HI ZIWUTISO ZI LANZELAKO:
Hikuyini zi nga wutlhari a ku hanya hi matshinya ya milayo ya Jehova xungetano hi mahanyela?
Hikuyini a vapswali va faneleko ku sangula ku gonzisa vana vabye a matshinya ya milayo ya Jehova ya mahanyela na va ha hi vatsongwani?
A vaswa ni vanhu va hombe va nga va vunisa kuyini vanwani kasi va vuneka hi wunene ga Nungungulu?