Timhaka ta mabhuku ma tako ka Cibhukwana ca Mutlhangano
5-11 KA MARÇO
TITSHOMBA TI NGA KA MHAKA YA NUNGUNGULU | MATEWU 20-21
“Loyi a randzako ku maha wahombe cikari ka n’wina ngha a maha nandza ga n’wina”
(Matewu 20:3) I no huma hi cikhati ca 9 horas wa mixo, a wona van’wani na va yimile phangweni [“bazarini”, Tradução do Novo Mundo] ga muti, va nga tiri nchumu;
tivhidhyu ni zvithombe zva nwtsty
Bazarini
A mabazari yo kari, yo kota legi gi kombisiwako laha ka Cibhukwana ca Mutlhangano, ma wa kumeka laha ruweni. A vaxavisi va wa veka zvilo zvo tala laha ruweni laha ka kuza va vhala ni ndlela. A vanhu va wa xava zvibya zvo zvi tirisa laha mutini, zvibya zva wumba, zvibya zvo dhura zva vhidru, ni zvakuga zva ha humako hi lomu masin’wini. Kota lezvi ku nga kala ku nga hi na tijelera, a vanhu va wa fanele kuya bazarini siku ni siku kasi ku ya xava zvakuga. Laho a vaxavi va wazwa mahungu ya maswa ka vaxavisi ni vayendzi van’wani; a vanana va wa hlakana kwalaho, niku a vanhu va kalako va nga hi na ntiro va wa rindzela laho kasi ku tholiwa. Jesu i hanyisile vababyi niku Pawule i chumayele kwalomo mabazarini. (Mit 17:17) Kanilezvi a vatsali ni vaFarisi va nga hi ni matshandza va wa randza ku woniwa ni ku losiwa ka matshamu lawo yo tala vanhu.
(Matewu 20:20, 21) Zvonake ku nota ka yena a nyine wa vana va Zabhedhi zvin’we ni vana vakwe, a ta mu khizamela a mu byela cikombelo cakwe. 21 Jesu aku kakwe: U lava yini ke? I no hlamula, aku: Wula lezvaku lava vana va mina va vambiri a va tshame mufun’weni wa wena, a mun’we reveni ga wena ga cinene ni mun’wani a reveni ga wena ga cibhabha.
mitlhamuselo ya nwtsty ka Mt 20:20, 21
nyine wa vana va Zabhedhi: Loyi i mamani wa mupostoli Jakobe na mupostoli Johani. Hi kuya hi Ivhangeli ya Marku, Jakobe na Johani hi vona va yako va ya wulawula na Jesu. Zvi komba ku a cikombelo leco ci sukela ka vona, kanilezvi va ci mahile hi ku tirisa mamani wabye, Salome, loyi kuzvilava a nga hi makabye wa mamani wa Jesu. — Mt 27:55, 56; Mr 15:40, 41; Jo 19:25.
a mun’we reveni ga wena ga cinene ni mun’wani a reveni ga wena ga cibhabha: A matshamu lawo hi wumbiri ga wona ma kombisa wudzundzo ni wukosi, kanilezvi le’ga cinene hi gona go dzundzeka nguvhu. — Lis 110:1; Mit 7:55, 56; Ro 8:34.
(Matewu 20:25-28) Kanilezvi Jesu i no va vitana, aku kabye: N’wina ma zvi tiva lezvaku a tihosi ta vamatiko ta va fumela, ni vahombe vabye va maha hi ntamu hehla ka vona. 26 Zvi nga tava nghaho cikari ka n’wina; kanilezvi loyi a randzako ku maha wahombe cikari ka n’wina ngha a maha nandza ga n’wina. 27 Ni loyi a randzako ku maha wo ranga cikari ka n’wina a ave khumbi ya n’wina; 28 kota lezvi a N’wana wa munhu a nga telangiko ku ta tirelwa, kanilezvi a ku ta tirela, ni ku nyikela kuhanya kakwe a kuva ndzhiho wa ku tirula vanyingi.
mitlhamuselo ya nwtsty ka Mt 20:26, 28
nandza: Kutani “citiri”. A Bhibhiliya gi tolovela ku tirisa a gezu ga ciGreki gaku di·aʹko·nos na gi wula munhu a ti koramisako a tirela van’wani. A gezu lego ga tirisiwa kasi ku wulawula hi Kristu (Ro 15:8), malandza kutani zvitiri zva Kristu (1 Kor 3:5-7; Kol 1:23), madhikoni, kutani malandza ya wutireli (Fil 1:1; 1 Ti 3:8), zvitiri zva laha mutini ka munhu (Jo 2:5, 9) ni vafumeli va tiko (Ro 13:4).
Kela titshomba ta moya
(Matewu 21:9) Ni zvidlemo lezvi zvi nga rangile ni lezvi zvi nga landzela, zvi no kanyuluka, zviku: Hozana ka N’wana Dhavhidha; a ku khesiwe yena loyi a tako vitweni ga Hosi; Hozana ka le hehla-hehla.
mitlhamuselo ya nwtsty ka Mt 21:9
Hozana: A gezu lego ga ciGreki gita hi ka gezu ga ciHebheru gi wulako ku “ha kombela, hlayisa.” Laha gi tiriselwa ku kombela Nungungulu lezvaku a tlhatlhisa kutani vhuna ku hlula; gi nga hundzuluselwa kambe zviku “ha ku kombela, mu vhune ku hlula.” Hi kufamba ka masiku, gi sangulile kuva gezu ga ku kombela ni ga ku dhumisa. A gezu lego ga ciHebheru gi kumeka ka Lis 118:25, li nga lin’we la tisimu ti nga yimbelelwa ka nguva ya Pasika ti sukelako ka Lis 113 kala ka Lis 118. Hikwalaho, a magezu lawo ma wata hi woce lomu maalakanyweni loku yi chikela nguva leyo. A yin’we ya tindlela leti Nungungulu a nga hlamula hi tona a mukombelo lowo wa kuva a hlayisa N’wana Dhavhidha kuve ku mu vhuxa hi ka vafileko. Ka Mt 21:42, Jesu i tshahile hi yece a magezu ma nga ka Lis 118:22, 23 aku ma wulawula hi Mesiya.
N’wana Dhavhidha: Magezu ma tiriselwako ku komba lixaka leli Jesu a humako ka lona ni ntiro wa yena kota Mesiya loyi a tsumbisilweko.
(Matewu 21:18, 19) Ni mixo na a ha wuya le mutini i nozwa ndlala. 19 Laha na a wona a sinya ya nkuwu hi le tlhelweni ga ndlela, i noya ka wona, kanilezvi a nga kumangi nchumu ka wona, sine matluka ntsena. Aku ka wona: Kusukela lezvi ngha u nga ha pswali mihandzu kala kupindzuka. Zvalezvo a sinya ya nkuwu yi no woma.
Sinya ya nkuwu yi tirisiwako kasi ku gondzisa kuva ni kukholwa
Kanilezvi hikuyini Jesu a womisako sinya leyo? I tlhamusele cigelo ca kona aku: ‘Hizvinene ndziku ka n’wina: Loku mu hi ni kukholwa, mu nga kanakani, mu nga ta maha ntsena lezvi zvi mahilweko ka nkuwu, kanilezvi hambu muku ka leci citsunga: Kunuka, u ya ti hoxa bimbini, zvi ta maheka. Ni zvilo zvontlhe mu ta nga zvi kombela hi kukhongela, na mu kholwa, mu ta amukeliswa.’ (Matewu 21:21, 22) Laho Jesu o phinda mhaka a sinako a yi wulile xungetano hi kuva a kukholwa ku zvi kota ku kunula citsunga. — Matewu 17:20.
Hikwalaho, Jesu i womisa sinya leyo kasi ku nyika cigondzo ca lisima xungetano hi ku kholwa ka Nungungulu. I ngalo: ‘Zvontlhe lezvi mu zvi kombelako hi kukhongela, kholwani lezvaku mu zvi amukele, mu tava nazvo.’ (Marku 11:24) Leco cigondzo ca lisima nguvhu ka valandzeli vontlhe va Jesu. Lezvo zvi laveka nguvhu ka vapostoli hakuva va kusuhani ni ku kumana ni zviringo zvo nonoha. Ku na ni kuyela kun’wani kambe hi ku kumako laha ka kuwoma ka sinya ya nkuwu ni kukholwa.
A ku fana ni sinya leyo ya nkuwu, a tiko ga Izrayeli gi na ni tshamela go xenga. A vanhu va tiko lego va na ni civhumelwano na Nungungulu, niku hi ku va cuwuka va nga ha wonekisa ku khwatsi va ingisa a Nayo wakwe. Kanilezvi, vona vontlhe kota tiko va ti komba na va nga hi na kukholwa niku a va pswali mihandzu ya yi nene. Va tlhela va ala a N’wana wa Nungungulu! Maku, hi ku womisa sinya leyo yo kala yi nga pswali, Jesu i komba lezvi zvi to humelela tiko lego go kala kukholwa gi tlhela gi nga pswali mihandzu.
12-18 KA MARÇO
TITSHOMBA TI NGA KA MHAKA YA NUNGUNGULU | MATEWU 22-23
“Ingisa Milayo yimbiri ya hombe”
(Matewu 22:36-38) Mugondzisi, a nayo wa hombe milayweni yontlhe hi wihi? 37 I te ngalo kakwe: U ta randza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe. 38 Lowu hi nayo wa hombe ni wa kuranga.
mitlhamuselo ya nwtsty ka Mt 22:37
mbilu: A gezu legi, loku gi tirisiwa hi ndlela yo fananisa, gi wula zvontlhe lezvi a munhu a nga zvona hi le ndzeni. Kanilezvi zvi wonekisa ku khwatsi loku gi kumbukiwa zvin’we ni “muhefemulo” ni “kupima”, gi wula zvilo zvo kongoma zvo kota lezvi munhu a ti zwisako zvona ni lezvi a zvi xuvako. A gin’we ni gin’we ga magezu lawa ya manharu ma tirisilweko laha (mbilu, muhefemulo, ni kupima) gi wula zva gona; ma tirisiwa na ma hi ni mongo wo khwatsi wo lava ku fana, kasi ku khanyisa khwatsi a cilaveko ca ku randza Nungungulu hi ku mbhelela.
muhefemulo: Kutani “munhu yentlhe”.
kupima: Ku wuliwa mapimo. A munhu i fanele ku tirisa mapimo yakwe kasi ku tiva Nungungulu a tlhela a mu randza. (Jo 17:3; Ro 12:1) Ka magezu lawa ma susilweko ka Dhewu 6:5, hi ciHebheru leci ma nga tsaliwa hi cona ku tirisilwe magezu manharu: ‘mbilu, muhefemulo, ni ntamu’. Kanilezvi hi kuya hi lezvi a matimu ya Matewu ma tisako zvona hi ciGreki, ku tirisilwe a gezu “kupima” wutshan’wini ga “ntamu”. Ku ngava ni zvigelo zvo tala zvi nga maha lezvaku ku tirisiwa magezu yo hambana. Co sangula, hambu lezvi a ciHebheru ca kale ci nga kala ci nga hi na gezu go kongoma ga ku wula ku “kupima”, a mongo lowo wu wa tolovela ku patsiwa laha ka gezu ga ciHebheru legi gi wulako ku “mbilu”. A gezu lego, loku gi tirisiwa hi ndlela yo fananisa gi wula zvontlhe lezvi munhu a nga zvona hi le ndzeni, a ku patsa ni lezvi a zvi pimisako, lezvi a ti zwisako zvona, lezvi a mahako, ni lezvi zvi mu kucako ku maha zvilo. (Dhewu 29:4; Lis 26:2; 64:6; wona lezvi zvi nga tlhamuselwa laha hehla xungetano hi mbilu.) Hi cigelo leco, laha a ciHebheru ci nga tirisa a gezu “mbilu”, a Septuaginta ga ciGreki gi tirisile gezu ga ciGreki gi wulako ku “kupima”. (Ge 8:21; 17:17; Mav 2:10; Isa 14:13) A cigelo cin’wani ca kuva Matewu a tirisile gezu ga ciGreki gi wulako ku “kupima” wutshan’wini ga “ntamu” a cikhati a nga tshaha Dhewu 6:5 kuzvilava hi lezvi a gezu ga ciHebheru legi gi hundzuluselwako ku “ntamu” gi patsako ntamu wa civiri ni wa mapimo. Kova ni cihi cigelo, a kukotlana loko ka mongo wa gezu ga ciHebheru ni legi ga ciGreki ku nga hi vhuna ku tlhamusela ku hikuyini a vatsali va tiIvhangeli va kalako va nga tirisi gezu galegi ga gin’we a cikhati va tshahako magezu ma nga ka Dhewuteronome.
(Matewu 22:39) Ni wa wumbiri wu fananako na wona, hi lowu: U ta randza wakelene na wena kota lezvi u ti randzako wena.
mitlhamuselo ya nwtsty ka Mt 22:39
wa wumbiri: Ka Mt 22:37, ku tsalilwe a hlamulo wo kongoma lowu Jesu a nga nyika muFarisi loye, kanilezvi makunu Jesu i tlhatekela zvin’wani ka ciwutiso leci a nga mahiwa hi ku tshaha a nayo wa wumbiri (Le 19:18), a gondzisa lezvaku a milayo leyo ya yimbiri a yi siyani niku yi khoma a Nayo wontlhe ni Vaphrofeti. — Mt 22:40.
wakelene: A gezu ga ciGreki ga ku wula ku “wakelene” kutani muakelani (hi kukongoma “loyi a nga laha kusuhani”) gi nga patsa vanhu vo hundza lava va hanyako laha kusuhani. Gi nga wula ni wihi munhu u wulawulako naye. — Lu 10:29-37; Ro 13:8-10.
(Matewu 22:40) A milayo leyi mimbiri hi tshinya ga milayo yontlhe ni vaphrofeti.
mitlhamuselo ya nwtsty ka Mt 22:40
Milayo . . . Vaphrofeti: A “Milayo” ku wuliwa mabhuku ya Bhibhiliya ma sukelako ka Genesisi kala ka Dhewuteronome. A “Vaphrofeti” ku wuliwa mabhuku ya wuphrofeti ya Mitsalo ya ciHebheru. Hambulezvo, loku a magezu lawa ma kumbukiwa zvin’we, a munhu a nga ha zwisisa ku ku wuliwa Mitsalo yontlhe ya ciHebheru. — Mt 7:12; 22:40; Lu 16:16.
hi tshinya ga: Hi ku wula lezvi, Jesu i wa komba ku a hi Nayo lowu wu nga ni Milayo ya Khume wu seketelwako ka lirandzo, kanilezvi a Mitsalo yontlhe ya ciHebheru yi seketelwa ka lirandzo. — Ro 13:9.
Kela titshomba ta moya
(Matewu 22:21) Vaku ka yena: Zva Khezari. Zvonake i te ngalo kabye: Tlhelisani ka Khezari lezvi zvi nga zva Khezari, ni ka Nungungulu lezvi zvi nga zva Nungungulu.
mitlhamuselo ya nwtsty ka Mt 22:21
ka Khezari lezvi zvi nga zva Khezari: Ka hlamulo lowu wa Jesu, ni lomu kun’wani ku wulawulwako hi mhaka leyi ka Mr 12:17 ni ka Lu 20:25, hi kona koce ku kumbukiwako mufumeli loye wa muRoma. A ku tlhelisa ‘ka Khezari lezvi zvi nga zva Khezari’ zvi patsa ku hakhela mufumo hi kota ya mitiro leyi wu yi mahako ni ku kombisa cichavo leci ci lavekako ka tihosi leto ta mufumo. — Ro 13:1-7.
ka Nungungulu lezvi zvi nga zva Nungungulu: Lezvo zvi patsa ku khozela Nungungulu hi mbilu yontlhe, hi mu randza hi muhefemulo wontlhe, ni ku mu ingisa hi kumbhelela. — Mt 4:10; 22:37, 38; Mit 5:29; Ro 14:8.
(Matewu 23:24) N’wina varangeli va fileko mahlo, mu hlutelako wunuwunwani, kasi mu mita kameli.
mitlhamuselo ya nwtsty ka Mt 23:24
mu hlutelako wunuwunwani, kasi mu mita kameli: Ka zvihari zvontlhe zvo kala ku hlazveka zvi nga tiviwa hi vaIzrayeli, a wunuwunwani ci wa hi cin’we ca lezvi zva zvi tsongwani nguvhu niku a kameli ci wa hi cin’we ca lezvi zva hombe nguvhu. (Le 11:4, 21-24) Jesu i tirisa wulawulela ga ku hundzeleta zvilo ni go fananisa kasi ku wula lezvaku a varangeli va wukhongeli va hluta byala gabye kasi va nga ti nyenyezisi hi wunuwunwani, kuveni lezvo va kanyisa a tshinya ga Nayo, lezvi zvi fanako ni ku mita kameli.
19-25 KA MARÇO
TITSHOMBA TI NGA KA MHAKA YA NUNGUNGULU | MATEWU 24
“Tshama na u khindlimukile hi tlhelo ga moya masikwini lawa yo gumesa”
(Matewu 24:12) A lirandzo la vanyingi li ta titimela hi kota ya kuendzeleka ka kuwonha.
it-2279 ¶6
Lirandzo
A lirandzo la munhu li nga titimela. Na a wulawula ni vapizani vakwe xungetano hi zvilo zvi nga hata, Jesu Kristu i kombile lezvaku a lirandzo (a·gaʹpe) la vanhu vo tala va ti byelako ku va kholwa ka Nungungulu li wa ta titimela. (Mt 24:3, 12) Mupostoli Pawule i te, ka zvikhati zva zvikarato lezvi zvi nga hata, a vanhu va wa tava ‘varandzi va mali’. (2 Ti 3:1, 2) Hikwalaho, zvi te dlunya ku a munhu a nga tshuka a kohlwa lezvi zvi nga zvona zva zvi nene niku a nga luza a lirandzo li nene leli a nga hi nalo kale. Lezvo zvi khanyisa a lisima la ku tshama hi ku hlanganyetela ni ku engetela lirandzo hi ku ehleketa hi Mhaka ya Nungungulu ni ku zwananisa wutomi ni matshinya Yakwe ya milayo. — Efe 4:15, 22-24.
(Matewu 24:39) a va nga tivi nchumu kala wuta ntalo, wu va kukuleta vontlhe; ku tava nghaho a kuwuyeni ka N’wana wa munhu.
w99 15/11 19 ¶5
Wa tatisa fanelo ya wena yontlhe ka Nungungulu ke?
Xungetano hi masiku lawa ya zvikarato, Jesu Kristu i te: ‘Kota lezvi ku nga maheka masikwini ya Nowa, ku tava nghaho a kuwuyeni ka N’wana wa munhu. Hakuva khwatsi hi lezvi va ngaga, vanwa, va teka, ni ku tekiwa, a masikwini lawo ya mahlweni ka ntalo, ku kala siku lego Nowa a nga enghena ha gona lomo tarwini, a va nga tivi nchumu kala wuta ntalo, wu va kukuleta vontlhe; ku tava nghaho a kuwuyeni ka N’wana wa munhu.’ (Matewu 24:37-39) A kuga ni kunwa hi kuringanisela, a zvi bihangi. A kuchada konawu i lulamiselo gi mahilweko hi Nungungulu. (Genesisi 2:20-24) Kanilezvi loku hi pola ku a zvilo lezvo zva wutomi hi zvona hi zvi rangisako wutomi ga hina, a hi chukwana hi zvi khongelela ke? Jehovha a nga hi vhuna ku rangisa Mufumo, hi maha lezvi zvi nga zvi nene, hi tlhela hi tatisa fanelo ya hina kakwe. — Matewu 6:33; Va Le Roma 12:12; 2 Va Le Korinte 13:7.
(Matewu 24:44) Hikwalaho na n’wina, tshamani mu longile, hakuva a N’wana wa munhu wata hi cikhati leci mu nga ci alakanyiko.
A vapostoli va kombela ciwoniso
Jesu i byela vapizani vakwe aku va fanele ku tshama na va tlharihile, va rindzela va tlhela va tshama na va longile. I khanyisa a citlharihiso leco hi ku hlawutela mufananiso wun’wani, aku: ‘Kanilezvi tivani lezvi: Loku a n’winyi wa yindlu a wa ci tivile a cikhati a khamba gi ta ngata ha cona, ngha a rindzele, ngha a nga vhumelangi a yindlu yakwe yi bhoxiwa. Hikwalaho na n’wina, tshamani mu longile, hakuva a N’wana wa munhu wata hi cikhati leci mu nga ci alakanyiko.’— Matewu 24:43, 44.
Kela titshomba ta moya
(Matewu 24:8) Kanilezvi zvontlhe lezvi kusangula ntsena ka kuxaniseka.
mitlhamuselo ya nwtsty ka Mt 24:8
kuxaniseka: A gezu ga ciGreki hi kukongoma gi wula a kubayisa ka hombe loku a wasati a ku zwako loku a lun’wa. Hambu lezvi laha gi tiriselwako ku wula kuxaniseka ni kubayisa laha zvi yileko, gi nga ha komba ku a ku fana ni kubayisa ka ku lun’wa, a zvikarato lezvi zvi phrofetilweko zvi taya zvi khandzakanya nguvhu, zvi tshinga, zvi engetela cikhati zvi ci mbhetako na ku nga se chikela a kuxaniseka ka hombe loku ku kumbukiwako ka Matewu 24:21.
(Matewu 24:20) Khongelani lezvaku a chawo wa n’wina wu nga mahiwi hi mawuyakaya, hambu hi Sabhadho;
mitlhamuselo ya nwtsty ka Mt 24:20
mawuyakaya: Kutani “nguva ya cirami”. A tivhula ta hombe, ni tindambi, ni cirami ka nguva leyo zvi wa ta maha ku zvi karata ku endza ni ku kuma zvakuga ni ko etlela. — Ezr 10:9, 13.
hi Sabhadho: Ka matshamu yo kota Judhiya, a zvinawanawana zvi nga yelana ni nayo wa Sabhadho zvi wa ta maha ku a munhu zvi mu karatela ku endza pfhuka wo leha ni ku rwala zvijumba; a tinyangwa ta dhoropa ti wa tshama ti vhalilwe kambe hi Sabhadho. — Wona Mit 1:12 ni Cipandze 16 ca cibhukwana Civhuno ca ku gondza hi cona a Mhaka ya Nungungulu.
26 KA MARÇO–1 KA ABRIL
TITSHOMBA TI NGA KA MHAKA YA NUNGUNGULU | MATEWU 25
Kela titshomba ta moya
(Matewu 25:40) A Hosi yi ta hlamula yiku ka vona: Hizvinene ndzi ngalo ka n’wina: Kota lezvi mu zvi mahileko ka mun’we wa lava vamakabye va mina va tsongwani, mu zvi mahile ka mina.
w09 15/10 16 ¶16-18
‘N’wina mu vanghana va mina’
Loku u rindzela ku hanya laha misaveni na u fumiwa hi Mufumo wa Nungungulu, u nga kombisisa kuyini wunghana ga wena ka vamakabye va Kristu? A hi woneni tindlela tinharu. Yo sangula ku maha ntiro wa kuchumayela hi mbilu yontlhe. Kristu i rumile vamakabye vakwe lezvaku va chumayela a mahungu yo saseka misaveni yontlhe. (Mt 24:14) Kanilezvi a vamakabye va Kristu va ha seleko laha misaveni wu wa ta va bindzela a ntiro lowo loku va wa nga vhuniwi hi vatiri-kuloni va tiyivhu tin’wani. Khati ni khati legi a munhu wa ntlawa wa lava va tiyivhu tin’wani a chumayelako, o vhuna vamakabye va Kristu ku maha ntiro wabye wo basa. A nandza gi tsumbekileko ni go tlhariha gi bonga nguvhu a ntiro lowo wu kombisako wunghana niku Kristu yenawu wa bonga.
A ndlela ya wumbiri leyi lava va tiyivhu tin’wani va nga vhunako hi yona vamakabye va Kristu ku seketela ntiro wa kuchumayela hi tlhelo ga timali. Jesu i kucile valandzeli vakwe lezvaku va ti mahela vanghana hi ‘cuma ci nga lulamangiko’. (Luka 16:9) Lezvo a zvi wuli ku hi nga xava wunghana ka Jesu na Jehovha. Kanilezvi, loku hi tirisa titshomba ta hina kasi ku seketela a mitiro ya Mufumo, hi kombisa wunghana ga hina ni lirandzo hi “kumaha ni zvinene” kutani lisine, na ku nga hi ku wula basi. (1 Joh. 3:16-18) Hi seketela ntiro lowo hi tlhelo ga timali loku hi chumayela, hi maha minyikelo ya ku seketela a ntiro wa ku aka ni ku hlayisa a matshamu ya mitlhangano, ni loku hi maha minyikelo yo seketela a ntiro wa kuchumayela wa misava yontlhe. Kani hi humesa mali ya yi tsongwani kani yi tele, handle ko kanakana Jehovha na Jesu va tsaka nguvhu loku hi nyika na hi xalele. — 2 Kor. 9:7.
A ndlela ya wunharu leyi hontlheni hi kombako hi yona lezvaku hi vanghana va Kristu ku landzela wurangeli legi hi nyikiwako hi madhota ya bandla. A vavanuna lavo va yimisiwa hi moya wa ku basa na va rangelwa hi Kristu. (Efe. 5:23) Pawule i tsalile lezvi: ‘Ingisani a varangeli va n’wina, mu ti koramisa ka vona.’ (Maheb. 13:17) A zvikhati zvin’wani zvi nga tshuka zvi hi karatela ku ingisa a wurangeli ga Bhibhiliya legi hi nyikiwako hi madhota ya bandla ga hina. Kuzvilava ha tiva kungambheleli kabye; maku lezvo zvi nga tshuka zvi hi maha hi nga amukeli khwatsi a wusungukati gabye. Kanilezvi, Kristu, a nga Hloko ya bandla, i tsaka nguvhu hi ku tirisa vavanuna lavo vo kala ku mbhelela. Hikwalaho, lezvi hi gi wonisako zvona a wurangeli gabye zva khumba a wunghana ga hina na Kristu. Loku hi veka zvihoxo zva madhota hi tlhelo, hi landzela wurangeli gabye, hi komba lezvaku ha mu randza Kristu.