Ndlela ya ku sangula mabhulo hi ku tirisa zviphephana

Kusukela ka Janeiro wa 2018 a kapa ya Cibhukwana ca mutlhangano ca Ntiro wa hina ni mahanyela ya wuKristu yi na ni zvingheniso. Hita na hi kuca vontlhe lezvaku va veka kupima ka ku bhula ni vanhu wutshan’wini ga ku va nyika mabhuku basi. A zvingheniso zva tivhidhyu zva komba ndlela ya ku sangula ma bhulo hi ku tirisa a Bhibhiliya basi, kasi ku vhuna a vahuweleli lezvaku va chukwatisa a machumayelela yabye. Xana lezvo zvi lava ku wula ku a hi faneli ku tirisa a mabhuku ya hina a cikhati hi chumayelako hi muti ni muti? Ne ni kutsongwani! Hi cikombiso, a ku tirisa a zviphephana yi ngava yin’we ya tindlela ya ku sangula mabhulo. Hi nga tirisa mahela legi laha hi chumayelako hi ku tirisa zviphephana:

1. Mu mahe a ciwutiso, u mu komba a mihlamulo ya kona u mu wutisa a mawonela yakwe.

2. Mu kombe a hlamulo wa Bhibhiliya wu kumekako lomu ka mutsalo kutani mitsalo leyi yi nga laha hehla ka pajina ga wumbiri. Loku a cikhati ci vhumela, lera mu tlhela mu bhula hi mahungu ma nga lomu cikari ka ciphephana.

3. Mu nyike a ciphephana a n’winyi wa muti, u tlhela u mu kuca ku sala a lera a mahungu man’wani ma nga lomu ka ciphephana leco hi cikhati ca ci nene ka yena.

4. Na wu nga se mu siyela mu kombe a ciwutiso ci nga laha ka cipandze ci nge “Alakanyela lezi” u gumesa u maha a malulamiselo ya lezvaku u tlhela u ya mu komba a hlamulo wa kona lomu ka Bhibhiliya ka siku gin’wani.

Laha u to tlhela, bhulani hi hlamulo wa ciwutiso leci u nga ci siyile, u tlhela u siya cin’wani ciwutiso leci u to tlhela u ya ci hlamula ka siku gin’wani. U nga hlawula ni cihi ciwutiso ka saite ya hina kutani lomu ka mabhuku lawa ma kumbukilweko laha ndzhako ka ciphephana. Hi cikhati ci faneleko mu kombe a bhuku Mahungu yo saseka ya Nungungulu! kutani bhuku gin’wani ga kugondzisa hi gona gi nga lomu ka feramenta ya ku gondzisa hi yona.