Ciwutiso co olova nguvhu ca ku ni wihi a nga wutisa

Maria ni nuna wakwe, João,a va hanya ka cipandze ca tiko lomu zvi kotekako ku bhula ni vatiri vo tala va tako hi Filipinas xungetano hi mahungu ya manene. Ndzeni ka ntungu wa COVID-19, Maria i sangulile zvigondzo zvo tala zva Bhibhiliya. A nga sangulangi zvigondzo lezvo lomu ka tiko legi a nga hanya ka gona basi, kanilezvi ni ka matiko man’wani. I zvi mahisile kuyini?

Maria i wa wutisa zvigondzani zvakwe, aku: “Wa tiva wokari loyi yenawu a nga tsakelako ku gondza a Bhibhiliya?” Loku a cigondzani ciku ina, yena i wa wutisa lezvi: “U nga zama ndlela ya ku ndzi bhula navo?” A ku maha ciwutiso leci co olova a kutala ka zvikhati zvi wa maha ku a kuma mihandzu ya yinene. Hikuyini? Hakuva a vanhu lava va tsakelako lezvi va gondzako lomu ka Bhibhiliya, a kutala ka zvikhati va zvi lava nguvhu a ku bhulela maxaka yabye kutani vanghana lezvi va gondzako. Give gihi a wuyelo ga ku maha ciwutiso leci?

Jasmina, a cigondzani ca Bhibhiliya ca Maria, i mu kombile a mune wa vanhu lava vonawu va nga lava ku gondza Bhibhiliya. A mun’we wabye, wa ku hi Cristina, i no ci tsakela nguvhu a cigondzo ca Bhibhiliya laha ka kuza a kombela Maria lezvaku va gondza makhati mambiri hi vhiki. A cikhati leci Maria a nga wutisa Cristina lezvaku wa tiva wokari yenawu a nga tsakelako ku gondza Bhibhiliya, Cristina i te: “Ina, ndzi ta ku komba vanghana va mina.” Ndzeni ka mavhiki matsongwani, Cristina i kombile Maria a mune wa vanghana vakwe lava vonawu va nga lava ku gondza Bhibhiliya. Hi ndzhako ka cikhati, Cristina i no komba Maria a vanghana van’wani vakwe, niku a vokari vabye vonawu va no maha zvezvo.

Cristina i wa lava lezvaku a ngango wakwe le Filipinas wonawu wu gondza Bhibhiliya. Hikwalaho, i no bhula ni nhanyana wakwe, Andrea. Kusanguleni Andrea i wa alakanya lezvaku ‘a Vakustumunyu va Jehovha vanhu va ti hambanisako ni van’wani; va kalako va nga kholwi ka Jesu niku va tirisa a Testamenta ga Kale basi’. Kanilezvi, andzhako ka ku gondza khati gin’we basi, i no zvi wona ha yece lezvaku lezvi a nga zvi alakanya hi Vakustumunyu va Jehovha a hi lisine. Khati ni khati a nga gondza nchumu wa wuswa lomu ka Bhibhiliya, i wa wula lezvi: “Phela lezvi zvi lomu ka Bhibhiliya, hikwalaho lisine.”

Hi kufamba ka cikhati, Andrea i no komba Maria a vanghana vakwe va vambiri ni mutiri-kuloni lava vonawu va sangulileko ku gondza Bhibhiliya. Andrea i wa hi ni titiya wakwe wa ku hi Angela. A titiya wakwe i wa nga woni niku contlhe cikhati i wa ingisela a cikhati leci Maria a nga kari a gondza na Andrea, kanilezvi Maria i wa nga zvi tivi lezvo. Ka siku go kari, Angela i no kombela Andrea lezvaku a bhula na Maria niku Angela i no kombela Maria lezvaku va gondza zvin’we a Bhibhiliya. Angela zvi no mu tsakisa nguvhu lezvi a nga gondza. Hi tihweti titsongwani, i no khomela mitsalo yo tala hi hloko niku i wa lava ku gondza mune wa makhati hi vhiki. Na a vhunetelwa hi Andrea, Angela i no sangula ku khoma mitlhangano hi kukhandzakanya hi ku tirisa videoconferência.

A cikhati leci Maria a nga pola lezvaku Joshua, a nuna wa Cristina, contlhe cikhati i wa tshama hi laha kusuhani a ingisela a cikhati leci a nga gondza na Cristina, Maria i no mu wutisa ku wa zvi tsakela ku gondza ke. Joshua i te: “Ndzo lava ku ingisela basi; u nga ndzi mahi zviwutiso; loku u ndzi wutisa ndzi ta suka ndzi famba.” Ndzeni ka ntlhanu wa timinuto to sangula ta cigondzo ca Bhibhiliya, Joshua i no wutisa zviwutiso zvo tala ku hundza Cristina a tlhela a lava ku simama ku gondza Bhibhiliya.

A ciwutiso co olova ca Maria ci mahile ku a kuma zvigondzo zvo tala zva Bhibhiliya. A kutala kabye, Maria i mahile malulamiselo ya ku va fambiselwa cigondzo ca Bhibhiliya hi Vakustumunyu van’wani. Maria i sangulile 28 wa zvigondzo zva Bhibhiliya ka mune wa matiko yo hambana.

Jasmina, a cigondzani co sangula ci kumbukilweko ka tshango legi, i bhabhatisilwe hi Abril wa 2021. Cristina i bhabhatisilwe hi Maio wa 2022 a gumesa a tlhela ka ngango wakwe le Filipinas. A zvigondzani lezvi zvin’wani zva zvimbiri lezvi Maria a nga kombiwa hi Cristina zvonawu zvi bhabhatisilwe. Angela i bhabhatisilwe andzhako ka tihweti titsongwani niku zvezvi i tira kota phayona ga cikhati contlhe. Joshua, a nuna wa Cristina, ni nhanyana wabye, Andrea, zvin’we ni zvigondzani zvin’wani zvo tala, va kari va kula hi tlhelo ga moya.

Ka zana ga malembe go sangula, a mahungu ya manene ma hangalakile hi kuhatlisa cikari ka maxaka ni vanghana. (Joh. 1:41, 42a; Miti.10:24, 27, 48; 16:25-33) Zvi ngo yini ku wutisa zvigondzani zva wena ni van’wani va tsakelako, uku: “Wa tiva wokari yenawu a nga tsakelako ku gondza Bhibhiliya?” Tivani hi mani, kuzvilava u ta kuma vanhu vo tala va to lava ku gondza Bhibhiliya.