Kutlhatlhiswa Hi Le Gipite Kala Ka Hosi Yo Sangula Ya Israeli

Mosi i lo rangela vaIsraeli kusukela wukhumbini le Gipite kala Xitsungeni xa Sinai, laha Nungungulu a nga va nyika milayo yakwe. Loku ku hunzile xikhati, Mosi i lo rumela a 12 wa vavanuna kasi ku ya hlola a tiko ga Kanani. Kanilezi a 10 wa vona va lo wuya ni mubiko wo biha. Va lo maha lezaku a vanhu va lava ku tlhelela Gipite. Hi kota ya kungakholwi kabye, Nungungulu i lo tsayisa vaIsraeli hi ku va maha va nzulanzula a 40 wa malembe lomu xiwuleni.

Hi kugumesa, Joxua i lo hlawuliwa kasi ku rangela vaIsraeli kala tikweni ga Kanani. Kasi ku va vuna a ku teka a tiko lego, Jehova i lo maha zihlamaliso. Yena i lo maha lezaku a Congo wa Jordani wu nyima a ku khulunga, a makhurisi ya Jeriko mawa lahasi, ni gambo gi nyima a siku gontlhe. Anzhako ka ntlhanu wa malembe ni ginwe, a tiko gi lo tekiwa ka vaKanani.

Na Joxua a hi wa ku sangula, Israeli i rangelwe hi valamuli lomu ka 356 wa malembe. Hi ta gonza hi vo tala vabye, a ku patsa na Barake, Gideoni, Jefta, Samsoni na Samueli. Hi ta gonza kambe hi vavasati vo kota Rahabi, Debora, Jaeli, Rute, Naomi na Delila. A Xipanze xa WUNHARU xontlhe xi eneta a 396 wa malembe ya matimu.