Mosi Aba Ribye

KU HUNZA malembe ni malembe — 10 wa malembe, 20 wa malembe, 30 wa malembe, 39 wa malembe! A vaIsraeli va ha hi xiwuleni. Kanilezi a ka wontlhe malembe lawo Jehova i hlayisa a vanhu vakwe. Yena i va wundla hi manna. I va rangela ni mumu hi mhinga ya refu, ni wusiku hi mhinga ya nzilo. Niku a ka wontlhe malembe lawo a tinguwo tabye a ti hlakali ni mikonzo yabye a yi vimbi.

Leyi makunu i hweti yo sangula ya lembe ga wu 40 cima va sukile Gipite. A vaIsraeli va tlhela va gova Kadexe. Laha hi kona va nga hi kona loku ku rumelilwe a tihloli ta 12 a ku ya hlola a tiko ga Kanani a xipimo xa 40 wa malembe mahlweni ka lezi. Miriamu a makabye wa Mosi i fela Kadexe. Niku a ku khwatsi hi kusanguleni, ku humelela gujeguje laho.

A zi koteki a ku vanhu va kuma mati. Hizalezo vona va vilela ka Mosi: ‘Ku wa hi chukwana loku hi wa file. U hi humesele yini le Gipite u hi neha ka wutshamu legi go biha, gi nga miliko nchumu? A ku na mavele, ne makuwu, ne mauva, ne ni mapomegranada. Hambu mati ya kunwa a ma kona.’

Loku Mosi na Aroni vaya ka tabernakeli kasi ku ya khongela, Jehova i byela Mosi ku ngalo: ‘Tsombanyisa vanhu. Zonake wulawula ka ribye legiya mahlweni ka vona vontlhe. Gi ta humesela a vanhu ni zifuyo zabye zontlhe a mati yo enela.’

Kasike Mosi i tsombanyisa vanhu, aku: ‘Zwanani, nwina mu nga tsumbiko Nungungulu! Xana mina na Aroni hi fanele a ku mu humesela mati ka legi ribye ke?’ Makunu Mosi aba ribye zikhati zimbiri hi nhonga, ku khulunga a mati yo tala hi laha ka ribye. Ku na ni mati yo enela ya ku vanhu vontlhe zinwe ni zifuyo zabye vanwa.

Kanilezi Jehova i zangarela Mosi na Aroni. Wa zi tiva a ku hikuyini? Hi mhaka ya ku Mosi na Aroni va te ngalo hi vona va nga wa ta humesa mati hi laha ka ribye. Kanilezi hi lisine Jehova hi yena a nga maha lezo. Niku hi kuva Mosi na Aroni va nga wulangi lisine hi mhaka leyi, Jehova i ngalo i ta va tsayisa. Yena aku: ‘Mu nga ta rangela a vanhu va mina kala Kanani.’

Hi kuhatlisa a vaIsraeli va suka Kadexe. Anzhako ka xikhatanyana va chikela Xitsungeni xa Hora. Aroni i fela kwalaho, le hehla ka xitsunga. Yena ifa na a hi ni 123 wa malembe. A vaIsraeli va bayiseka nguvu, hikwalaho a vanhu vontlhe va rila Aroni hi 30 wa masiku. A n’wana wakwe Eliazare i maha a mupristi wa hombe wo lanzela wa tiko ga Israeli.