Va tsikile ku maha lezvi va nga tsumbisa

Jehovha i no byela Mosi, aku: ‘Kandziha uta leno citsungeni. Ndzi ta tsala milayo ya mina laha ka maribye ndzi ku nyika’. Mosi i no kwela le hehla ka citsunga a ya tshama seyo 40 wa masiku ni 40 wa wusiku. A cikhati leci a nga hi seyo, Jehovha i no tsala milayo ya lisima laha ka maribye a nyika Mosi. A milayo leyo yi vitaniwa ku i Khume ga Milayo.

Loku ku hundzile cikhati co kari, a vaIzrayeli va no alakanya lezvaku Mosi i va tsikile. Va no byela Aroni, vaku: ‘Hi lava munhu wa ku hi rangela. Hi mahele nungungulu’! Aroni aku: ‘Ndzi nyikeni ouro ya n’wina’. I no nyekisa ouro leyo a maha cifananiso ca cihon’wana. A vanhu vaku: ‘A cihon’wana leci hi yena Nungungulu wa hina a nga hi humesa le Gibhite’! Va no sangula ku khozela cihon’wana leco ca ouro va tlhela va maha festa. A ku lezvi va nga maha zvi wa bihile? Ina. Hakuva va wa tsumbisile ku khozela Jehovha basi. Makunu zvezvi, va wo tsika ku maha lezvi va nga tsumbisa.

Jehovha i no wona lezvi zvi nga kari zvi maheka, a byela Mosi, aku: ‘Chika u yela vanhu. Va tsikile ku ndzi ingisa niku vo khozela nungungulu wa mawunwa’. Mosi i no chika hi le citsungeni, na a welele timbila timbiri ta maribye.

A cikhati leci Mosi a nga kari a chikela kusuhani ni matenda, i nozwa vanhu na va yimbelela. A gumesa a va wona na va kina ni ku khizamela cifananiso ca cihon’wana. Mosi i no zangara nguvhu. A hoxa timbila timbiri ta maribye leti a nga welele tiwa lahasi ti pandzeka. I no tekela ku fayetela cifananiso a gumesa a wutisa Aroni, aku: ‘Zvi mahisile kuyini a kuza u vhumela ku maha nchumu lowu wo biha’? Aroni aku: ‘U nga zangari. Wa gi tiva tshamela ga vanhu lava. Va wa lava nungungulu, ndzi se nyekisa ouro yabye lomu ndzilweni ku se huma cihon’wana leci’! Aroni i wa nga faneli ku maha lezvo. Mosi i no tlhela le hehla ka citsunga a ya khongotela Jehovha kasi a va tsetselela.

Jehovha i no tsetselela lava va nga ti yimisele ku mu ingisa. Lezvo zvi komba ku zvi wa hi zva lisima a ku a vaIzrayeli va vhumela ku rangelwa hi Mosi.