Jesu A Vuxa Vafileko

A NHANYANA loyi u mu wonako laha i na ni tanga ya 12 wa malembe. Jesu i khomile canja gakwe, zonake a mamani ni raru wakwe va yimile laha kusuhani. Wa zi tiva a ku hikuyini va wonekako ku khwatsi va tsakile nguvu? A hi zi poleni.

A raru wa nhanyana loyi i wanuna a dumileko a vitwako Jairo. Ka siku go kari a n’wana wakwe i khonwa hi mababyi, zonake a latiwa mubhedini. Kanilezi a nga tshuki a maha chukwana. Yena iya mahlweni hi kubabya laha ko kala a sika. Jairo ni sati wakwe va karateka nguvu, hakuva ko khwatsi a nhanyana tsongwani wabye i tafa. Yena i n’wana wabye wa munwe. Hikwalaho Jairo i famba a lavetela Jesu. Yena wa tshuka azwa zo kari xungetano hi zihlamaliso lezi Jesu a mahako.

Laha Jairo a kumako Jesu, i mu kuma na a ranzelwe hi xidlemo xa hombe. Kanilezi Jairo i tsemakanya a xidlemo a yawa hasi mikonzweni ya Jesu. Aku ngalo: ‘A n’wana wa mina wa babya nguvu.’ Zalezo a mu khongotela aku: ‘Maha wuxinji, tana u ta mu hanyisa.’ Jesu i ngalo i ta famba.

Laha va fambako, a xidlemo xi tshama hi ku nikinyana lezaku va tshinela kusuhani na Jesu. Hi xitshuketi Jesu a su nyima. A wutisa aku: ‘Himani a nzi khumbileko?’ Jesu i zwile ntamu na wu huma ka yena, hikwalaho wa zi tiva ku ngalo ku na ni munhu a mu khumbileko. Kanilezi himani? Hi wasati a nga wa babya nguvu hi 12 wa malembe. Yena i tile a ta khumba a nguwo ya Jesu, zonake a su kalamuka!

Lezo zi tiyisa Jairo, hakuva wa zi kota ku wona lezi zi mu hehukelisako zona Jesu a ku hanyisa munhu. Kanilezi ku chikela a ntsumi. Wu byela Jairo ku ngalo: ‘U nga ha karati Jesu. A n’wana wa wena i file.’ Jesu wa zizwa lezo zonake aku ngalo ka Jairo: ‘U nga karateki, yena i ta hanya.’

Laha va chikelako mutini wa Jairo hi kugumesa, a vanhu vo rila hi kubayiseka ka hombe. Kanilezi Jesu i ngalo: ‘Mu nga rili. A nwanana a nga fangi. Yena i etlele ntsena.’ Kanilezi a vanhu va hleka Jesu, hakuva va zi tiva ku ngalo a nhanyana i file.

Jesu makunu i teka a raru ni mamani wa nhanyana zinwe ni vapostoli vanharu vakwe a enghena navo lomu ndlwini leyi a latilweko kona a nwanana. Yena i mu khoma hi canja aku ngalo: ‘Vuka!’ Zonake a nhanyana a vuka, kota lezi u zi wonako kwalaha. Zalezo a suka a sangula ku fambafamba! Hizalezo zi mahako ku a mamani ni raru wakwe va tsaka nguvu.

Loyi a hi munhu wo sangula a vuxiwako hi Jesu hi ka vafileko. A wo sangula a wuliwako hi Biblia hi n’wana wa noni yi tshamako doropeni ga Naine. Anzhako ka xikhati, Jesu kambe i vuxa Lazaru, a makabye wa Maria na Marta, hi ka vafileko. Loku Jesu a fuma kota hosi ya Nungungulu, i ta maha lezaku a vanhu vo tala nguvu lava va fileko va tlhela va hanya. A hi nge tsaki hi lezo?