Loku a munhu afa, a nga tlhela a vuka?

LOKU hifa, xana Nungungulu i ta zi lava a ku hi vuxa hi ka vafileko, zonake hi tlhela hi hanya? — A wanuna wa mu nene Joba i wa kholwa lezaku Nungungulu wa zi lava ku hi vuxa. Hikwalaho, a xikhati lexi Joba a nga kari alakanyela a kufa, i lo byela Nungungulu aku: “U ta vitana, mina nzi ku hlamula.” Joba i lo wula lezaku Jehova Nungungulu i wa ta xuva, kutani ku zi lava nguvu, a ku mu vuxa hi ka vafileko. — Joba 14:14, 15, NM.

Jesu i fana ni Papai wakwe, Jehova Nungungulu. Jesu i lava ku hi vuna. A xikhati lexi a wanuna wo kari a nga babya hi hlokonho a nga mu byela lezi: ‘Loku u zi lava, u nga nzi basisa,’ Jesu i lo mu hlamula aku: ‘Nza zi lava.’ Zonake, Jesu i lo hanyisa a wanuna loye ka mababyi yakwe ya hlokonho. — Marku 1:40-42.

Jesu i gonzile ka Papai wakwe a ku ranza vanana. Ka xikhati xa kale nguvu, Jehova i vuxile vanana hi ka vafileko a makhati mambiri, hi ku tirisa malanza yakwe. Elija i lo khongotela Jehova lezaku a vuxa nwanana hi ka vafileko wa wasati wo kari a nga mu mahele wunene Elija. Niku Jehova i lo maha lezo. Jehova kambe i tirisile a nanza gakwe Elixa lezaku gi vuxa a mufanyana wo kari hi ka vafileko. — 1 Tihosi 17:17-24; 2 Tihosi 4:32-37.

Xana a zi tsakisi a ku tiva lezaku Jehova wa hi ranza nguvu? — A nga hi alakanye a xikhati lexi hi hanyako basi. Kanilezi, hambu loku ho tshuka hifa, i ta hi alakanya. Jesu i wulile lezaku a Papai wakwe i wona vanhu va fileko a ku fana ni lava va hanyako! (Luka 20:38) A Biblia gi wula lezi: ‘Hambu kufa, hambu wutomi, hambu ni zilo zi nga kona, kutani zilo zi to ta, zi nga ta zi kota ku hi hambanyisa ni liranzo la Nungungulu.’ — Va Le Roma 8:38, 39.

A xikhati lexi Jesu a nga hi laha misaveni, i lo komba lezaku Jehova wa khatala nguvu hi vanana. Nza tsumba ku wa zi alakanya lezaku Jesu i ti nyikile a xikhati xa ku wulawula ni vanana xungetano hi Nungungulu. Kanilezi, wa zi tiva lezaku Jesu i nyikilwe ntamu hi Nungungulu wa ku vuxa a vanana hi ka vafileko? — A hi wulawule hi xikhati lexi Jesu a nga vuxa a nhanyana wa 12 wa malembe, loyi a nga hi n’wana wa Jairo.

Jairo i wa tshama ni sati wakwe ni nwanana wabye wa munwe kusuhani ni Bimbi ga Galilea. Ka siku go kari a xinhanyatana lexo xi lo babya nguvu, zonake Jairo a alakanya lezaku xi tafa. I lo sangula ku alakanya Jesu, ku nga hi wanuna wo hlamalisa loyi Jairo a nga zwile lezaku wa zi kota ku hanyisa vanhu. Hikwalaho, Jairo i lo sangula ku lavetela Jesu. I lo mu kuma na a gonzisa vanhu vo tala, le mbhirini ya Bimbi ga Galilea.

Jairo i lo lavetela Jesu lomu xikari ka vanhu vo tala. A xikhati lexi a nga mu kuma i lo khizama mahlweni ka Jesu, aku: ‘A nhanyana wa mina i babya nguvu. U ngata u ta mu vuna? Nza ku khongotela lezaku uta.’ Jesu i lo tekela ku famba na Jairo. A vanhu vo kari va nga tile kasi ku ta wona Mugonzisi wa Hombe, vonawu va lo famba. Kanilezi na va nga seya kule, ku lota a wanuna wo kari hi le kaya ka Jairo zonake a mu byela lezi: ‘A nhanyana wa wena i file! Wa ha mu karatela yini Mugonzisi ke?’

Jesu i lozwa zontlhe zi nga wuliwa hi wanuna loye. I wa zi tiva lezi zi nga bayisisa zona ka Jairo a kufelwa hi nwanana wakwe wa munwe. Hikwalaho, i lo mu byela lezi: ‘U nga chavi, kholwa ka Nungungulu ntsena, a nhanyana wa wena i ta hanya.’ Va lo simama ku famba kala va chikela kaya ka Jairo, laha a vanghana va ngango wabye va nga kari va rila. Va wa bayisekela a xinhanyatana xabye xi nga file. Kanilezi Jesu i lo va byela lezi: ‘Mu nga rili; hakuva a nga fangi, i lo etlela.’

A xikhati lexi Jesu a nga wula lezo, a vanhu va lo sangula ku mu hleka, hakuva va wa zi tiva a ku a nhanyana loye i file. Makunu, u alakanya lezaku hikuyini Jesu a nga wula lezaku a nhanyana loye i wo etlela? — Xana Jesu i wa lava ku va gonzisa yini a vanhu lavo? — I wa lava ku va tiva lezaku a kufa ku fana ni wurongo ga tshongotshongo, kutani wurongo ga hombe. I wa lava ku va gonzisa kambe lezaku, hi ku tirisa a ntamu wa Nungungulu, yena wa zi kota ku vuxa a vanhu hi ka vafileko hi ndlela yo hehuka nguvu a ku fana ni ku vuxa munhu a nga etlela.

Jesu i lo byela vontlhe va nga hi lomu ndlwini lezaku va huma lahandle. Ku lo sala Pedro, Jakobe, Johani ni papai wa nhanyana loye zinwe ni mamani wa kona ntsena. Hi kulanzela, i loya lomu ku nga hi ni nhanyana loye. I lo mu khoma hi woko aku: “Nhanyana, vuka!” I lo tekela ku vuka a sangula ku fambafamba! A papai wakwe ni mamani wakwe va lo tsaka nguvu. — Marku 5:21-24, 35-43; Luka 8:40-42, 49-56.

Zezi alakanyela lezi: Lezi Jesu a nga zi kota ku vuxa a xinhanyatana lexo hi ka vafileko, xana i ta zi kota ku vuxa vanwani kambe? — U alakanya lezaku hakunene i ta zi maha? — Ina, i ta zi maha futsi. Jesu wutsumbu i te ngalo: ‘A xikhati xa hata, laha vontlhe va nga le zilahleni va ta ngazwa a gezu ga mina va huma.’ — Johani 5:28, 29.

U alakanya lezaku Jesu wa zi lava a ku vuxa vanhu hi ka vafileko? — Ku na ni xikombiso xinwani xi nga lomu ka Biblia xi hi vunako ku hlamula xiwutiso lexi. Lezi zi humeleleko ka siku go kari kusuhani ni doropa ga Naine, zi komba lezi Jesu a ti zwisako zona loku a wona vanhu va bayisekileko lomu marilweni.

A wasati wo kari a nga felwe hi n’wana wakwe i wa kari a huma lomu doropeni ga Naine zinwe ni xidlemo xa hombe. Vontlhe va waya va ya lahla a n’wana wakwe. A nuna wakwe i wa sina a file, niku zalezi a n’wana wakwe wa munwe yenawu i wa file. I wa bayisekile nguvu! Ku wa hi ni vanhu vo tala va le Naine va nga kari va lanzela a vavanuna lava va nga tlakulile xirumbi xa n’wana wakwe, na va huma hi lomu doropeni ga Naine. A wasati loye i wo rila, niku vontlhe va wa nga zi koti ku mu chavelela.

Ka siku lego, Jesu ni vapizani vakwe va waya doropeni ga Naine. Kusuhani ni nyangwa ya doropa, va lo kumana ni xidlemo xi ngaya xi ya lahla a n’wana wa wasati loye. A xikhati lexi Jesu a nga wona a wasati loyi a nga kari a rila, i lo mu zwela wusiwana. A mbilu yakwe yi lo khumbeka nguvu hi kota ya kuxaniseka ka wasati loye. I lo lava ku mu vuna.

Hi ndlela yo kongoma ni yo zwela wusiwana, i lo mu byela lezi a wasati loye: ‘Miyela ku rila!’ Lezi Jesu a nga khumbiswa zona ni lezi a nga zi maha, zi lo hlamalisa vontlhe. A xikhati lexi Jesu a ngaya laha ku nga hi ni xirumbi, handle ko kanakana vontlhe va wa ti wutisa ku kasi iya a ya maha yini ke. Jesu i lo wula lezi: ‘Jaha, nzi ngalo ka wena: Vuka!’ A jaha lego gi lo tekela ku vuka gi tshama gi tlhela gi sangula ku wulawula! — Luka 7:11-17.

Hi nga alakanyela lezi a wasati loye a nga ti zwisa zona! U wa ta ti zwisa kuyini loku a munhu u mu ranzako a vuxiwa hi ka vafileko? — Xana lezo a zi kombi lezaku hakunene Jesu wa ranza vanhu ni lezaku i lava ku va vuna? — Hi nga alakanyela lezi zi to tsakisisa zona a ku hoyozela vanhu va to vuxiwa hi ka vafileko misaveni yiswa ya Nungungulu! — 2 Pedro 3:13; Kuvululelwa 21:3, 4.

Xikari ka lava va to vuxiwa hi ka vafileko xikhatini lexo, ku tava ni vanhu vo kari hi va tivako, a ku patsa ni vanana. A vanhu lavo hi ta va tiva, a ku fana ni lezi Jairo a nga tiva a nhanyana wakwe a xikhati lexi Jesu a nga mu vuxa hi ka vafileko. A vanwani va to vuxiwa hi ka vafileko ku tava vanhu ku hunzako malembe yo tala nguvu na va file. Kanilezi, Nungungulu a nga ta va rivakelwa hambu lezi va hanyileko kale nguvu.

A zi tsakisi a ku tiva lezaku Jehova Nungungulu ni N’wana wakwe, Jesu, va hi ranza nguvu ke? — Va lava ku hi hanya, na ku nga hi lezaku hi hanya a malembe ya matsongwani ntsena, kanilezi kala kupinzuka!