Jesu a vhuxa nhanyana wa Jayiro!

Laha Jayiro a nga wona lezvaku Jesu i hanyisile wasati loyi a nga babya hi ku huma nkhata, i no tiyiseka lezvaku ni nhanyana wakwe i ta mu hanyisa, hambu lezvi a nga ti byela lezvaku ka cikhati leco i ‘file’ makunu. (Matewu 9:18) Zvi wa koteka futsi a ku a vhuxiwa?

Loku Jesu a ha wulawula ni wasati loyi a nga mu hanyisile, ku no chikela vavanuna va le kaya ka Jayiro, va ta mu byela lezvi: “A nhanyana wa wena i file”. Wa ha mu karatela yini “Mugondzisi ke?” — Marku 5:35.

Hi ngazwa kubayisa ka zvona! A wanuna loye a nga kombisiwa nguvhu cichavo lomu cipandzeni, i no bayiseka nguvhu laha ka ku a nga ha chaveleleki. A nhanyana wakwe wa mun’we i wa file. Hambulezvo, kota lezvi a tindleve ti nga hava lihlavhu, Jesu i no zvizwa lezvi va nga wula, a se hundzuluka a chavelela Jayiro, aku: “U nga chavi,” wena “kholwa ntsena.” — Marku 5:36.

Hi ku landzela, Jesu i no famba na Jayiro kaya kakwe. Laha va nga chikela, va no kuma a nyima-nyima ya hombe nguvhu. Lava va nga hi laha kaya, va wo rila, va tsikwila va tlhela va tiba zvifuva hi kubayiseka. Jesu i no nghena a se wula magezu yo sangula aku: ‘A nhanyana a nga fangi, kanilezvi i no etlela.’ (Marku 5:39) Laha va nga zvizwa, va no mu hleka, hakuva va wa zvi tiva ku i file futsi. Hambulezvo, Jesu i wa lava ku tirisa ntamu a nyikilweko hi Nungungulu, kasi ku komba lezvaku a ku fana ni lezvi a munhu a vhuxiwako loku a etlele wurongo ga hombe, zva koteka kambe a ku mu vhuxa loku a file.

Makunu Jesu i no humesa vontlhe, ku sala Pedro, na Jakobe, na Johani, ni vapswali va matsuva. I no teka lava va 5, a nghena navo lomu a nhanyana a nga hi kona. Loku va chikele, i no mu khoma hi canja, aku: “Talita Kumi; zvi tlhamuselako ku ngalo: Nhanyana, ndziku ka wena, Vhuka!” (Marku 5:41) A nhanyana i no tekela ku vhuka futsi, a sangula ku fambafamba. Handle ko kanakana, Jayiro ni sati wakwe va tsakile va khoma ni tilo laha va nga zvi wona! Jesu i no va byela ku va mu nyika ca kuga, kasi ku komba lezvaku hakunene i vhukile.

Ka makhati man’wani lawa Jesu a nga hanyisa vanhu, i va byelile lezvaku va nga zvi haxi ka van’wani. Ka khati legi kambe, i no mu byela zvalezvo Jayiro ni sati wakwe. Hambulezvo, hi kota ya lezvi va nga tsakisile zvona, Jayiro ni sati wakwe ni vontlhe lava va nga hi kona, va no zvi hangalasa “tikweni lego gontlhe.” (Matewu 9:26) Wena ke, loku ku wa hi xaka ga wena gi nga vhuxiwa na u nga bhulangi hi zvona na u tsakile? Hi ku ya hi zva ku tsaliwa, lego give khati ga wumbiri legi Jesu a nga vhuxa munhu.