A mimoya a hi vanhu va hanyileko va tlhela vafa misaveni

A mimoya yi kona! Lomu ku tshamako mimoya, ku nga wutshamu legi gi nga wonekiko, ku nani mimoya ya yi nene ni leyi yo biha. Xana a mimoya i vanhu va hanyileko va tlhela vafa misaveni?

Ahihi. Loku munhu afa, a nga hunzi aya lomu ku tshamako mimoya, kota lezi a vanhu vo tala va zi alakanyako. Hi zi tivisa kuyini lezo? Hi lezaku a Biblia gi wula zalezo. A Biblia i bhuku ga zinene gi tako hi ka Nungungulu yece wa lisine, loyi a vito gakwe ku nga Jehova. Jehova i vangile vanhu; yena wa zi tiva khwatsi lezi zi va humelelako loku vafa. — Tisimu 83:18; 2 Timote 3:16.

A Biblia gi ngalo Nungungulu i wumbile Adamu, a munhu wo sangula, “hi tshuri wa misava.” (Genesisi 2:7) Nungungulu i lo mu veka lomu ka Paradise, a simu ga Edeni. Loku ku wo khwatsi Adamu i wa ingisile a nayo wa Jehova, na a nga fangi; na a kari a hanya misaveni nyamutlha. Kanilezi a xikhati lexi Adamu a tshovileko nayo wa Nungungulu ha womu, Nungungulu i mu byelile lezi: “U [ta] tlhelela misaveni; hakuva wena u humesilwe ka yona. Wena u tshuri, u ta tlhelela tshurini.” — Genesisi 3:19.

Zi wula yini lezo? Kasi i wa hi kwihi Adamu mahlweni ka kuva Jehova a mu vangile hi ntshuri? I wa nga hi kona ka wutshamu ni ginwe. Yena i wa nga hi le tilweni kota moya wu kalako wu nga pswaliwangi. I wa nga hi kona. Hikwalaho, a xikhati lexi Jehova a wulileko ku ngalo Adamu i wa ta “tlhelela misaveni,” yena i wa lava ku wula lezaku Adamu i wa tafa. A nga hunzangi aya lomu ku tshamako mimoya. Laha kufeni, Adamu ive loyi a nga hanyiko, a nga have kona. A kufa i kuvumaleka ka wutomi.

Kanilezi ku nga wuliwa yini hi vanwani vanhu lava va fileko? Xana vonawu a va kona? A Biblia ga hlamula:

• “Zontlhe [a vanhu ni zihari] ziya wutshamu ginwe; zontlhe zi mahilwe hi ntshuri, hikwalaho zontlhe zi tlhela ziya ntshurini kambe.” — Mutshawuteli 3:20.

• “A vafileko a va tivi nchumu.” — Mutshawuteli 9:5.

• “A liranzo labye, ni livengo labye, ni wukhuxu gabye, zi fuvile.” — Mutshawuteli 9:6.

• “A ku na ntiro, . . . ni kutiva, ge, hambu wutlhari le Xeoli [a xilahla] lomu u yako kona.” — Mutshawuteli 9:10.

• “[Munhu] a tlhelela ntshurini; ku mbhela makungu yakwe hi gwalego siku.” — Tisimu 146:4.

Za ku karatela a ku vumela mitsalo leyi? Loku zi ku karatela, alakanyela lezi: Ka mingango yo tala, a wanuna i hola mali kasi ku wundla a ngango wakwe. Loku wanuna loye afa, a ngango wakwe wu tala ku xaniseka. Zinwani zikhati a sati wakwe ni vana vakwe va kala va vumala ni mali yo enela ku xava zakuga. Kuzilava a valala va wanuna loye va ta va xanisa. Makunu ti wutise: ‘Loku wanuna loye a kari a hanya lomu ku tshamako mimoya, hikuyini a nga simamiko ku wundla a ngango wakwe? Hikuyini a nga vikeliko ngango wakwe hi ka vanhu vo biha?’ Hi lezaku a mitsalo yi wula lisine. A wanuna loye a nga na wutomi, a nga zi koti ku maha nchumu. — Tisimu 115:17.

Xana lezo zi wula ku ngalo a vafileko cima va nga ta tlhela va hanya kambe? A hi zona. Le mahlweni, hi ta wulawula hi kuvuka ka vafileko. Kanilezi zona hakunene zi wula ku ngalo a vafileko a va zi tivi lezi u mahako. A va zi koti ku ku wona, ku kuzwa, ge hambu ku wulawula na wena. A wu na xigelo xa ku va chava. A va zi koti ku ku vuna, niku a va zi koti ku ku mahela kubiha. — Mutshawuteli 9:4; Isaya 26:14.