Tirela Jehova, ku nga hi Satani

Hontlheni hi nani kuhlawula. A ku hi ta tirela Jehova kutani hi ta tirela Satani ni madimoni yakwe. A hi nge zi koti ku zi maha hi wumbiri ga zona. Ku tava wutlhari loku hi tirela Jehova!

Jehova mu nene

Kota lezi hi zi wonileko, a madimoni ma tsaka hi ku mahela kubiha ni ku khohlisa vanhu. Jehova a nga tshamisangi lezo. Yena i ranza vanhu kota raru a ranzako vana vakwe. Yena Munyiki wa “zontlhe zinyikiwo zo saseka ni zinyikiwo zontlhe zi mbheleleko.” (Jakobe 1:17) A ku na nchumu wa wu nene a tsonako vanhu, hambu hi ntsengo wa hombe ka yena nwinyi. — Va Le Efesusi 2:4-7.

Alakanyela a zilo lezi Jesu, N’wana wa Nungungulu, a zi mahileko laha misaveni. Yena i mahile a timbeveve ti wulawula ni ku nyika kuwona ka zikhumu. I hanyisile a vanhu va hlokonho ni zikhurubu. Yena i hlongolile a madimoni ni ku hanyisa a tixaka tontlhe ta mababyi. Hi ntamu wa Nungungulu, Jesu i vuxile a vafileko kambe. — Mateu 9:32-35; 15:30, 31; Luka 7:11-15.

A wutshanwini ga ku hi byela mawunwa kasi ku hi kanganyisa, Nungungulu i wula lisine zontlhe zikhati. Cima a nga khohlisi munhu. — Mitsengo 23:19.

Potsa mikhuwo yi nga hlazekangiko

Kota lezi a wupi ga xithanithani gi khomako a nhongani, timiliyoni ta vanhu ti khomilwe hi kukholwa ka hava ni mawunwa. Vona va chava a vafileko. Va chava a madimoni. Va chava a makhombo, tihlolo, wuhlalo gi tirisiwako hi vangoma, ni wuloyi. Vona va bohilwe hi kukholwa ni zihena zi seketelweko ka mawunwa ya Satani Diyabu. A malanza ya Nungungulu a ma phasiwi ni ka xinwe xa zilo lezo.

Jehova i nani ntamu wunyingi ku hunza Satani. Loku u tirela Jehova i ta ku vikela ka madimoni. (Jakobe 4:7) A wuloyi gi nga ta tira ka wena. Hi xikombiso, le Nigeria, vangoma vanharu va ntamu va mahile wuloyi kasi ku daya a Mboni ya Jehova yi nga ala ku suka doropeni. Loku a wuloyi gi tsanzekile, munwe wa vangoma i lo chava nguvu, zonake i loya ka Mboni a ya kombela rivalelo.

Loku a madimoni ma ku hlupha, u nga zi kota a ku vitana Jehova hi vito, yena i ta ku vuna. (Mavingu 18:10) Kanilezi kasi ku kuma a kuvikelwa hi Nungungulu, u fanele ku ti tlhatlhisa hi kumbhelela ka zontlhe lezi zi yelanako ni wungoma ni wukhozeli ga madimoni. A vakhozeli va Nungungulu le Efesusi wa kale va mahile lezo. Va hlengeletile a mabhuku yabye wontlhe ya wungoma va ma hisa. (Mitiro 19:19, 20) A malanza ya Nungungulu inyamutlha ma fanele ku mahawu lezo. Ti chuse ka wuhlalo gi tirisiwako hi vangoma, zitshungulo, a makordawu “ya ku ti vikela” ha wona, wuloyi, mabhuku ya wungoma ni zontlhe lezi zi yelanako ni mitiro ya wungoma.

Tirisa a wukhozeli ga lisine

Loku u lava ku tsakisa Nungungulu, a zi eneli ntsena ku tsika a wukhozeli ga mawunwa ni ku nyima ku maha zilo zo biha. Wena u fanele ku tirisa hi kuhiseka a wukhozeli gi basileko. A Biblia gi komba lezi zi lavekako:

Hlengela ni Timboni ta Jehova

Satani ni madimoni va nani vanhu va gonzisako ni ku maha zilo za ku biha laha misaveni. Kanilezi Jehova i nani vanhu na yenawu. Vona Timboni ta Jehova. (Isaya 43:10) Misaveni yontlhe, ku nani Timboni to hunza ntlhanu wa timilioni ni yinwe. Tona tontlhe ti zama hi ntamu a ku maha zilo za zi nene ni ku gonzisa vanhu a lisine. Ka matiko yo tala u ta ti kuma laha Salawini ya Mufumo, laho ti to ku amukela hi mbilu yontlhe.

A ntiro wa tona wa ku vuna vanwani a ku tirela Nungungulu. Ti ta gonza a Biblia na wena mutini wa wena, ti ku vuna a ku gonza a ku khozela Jehova hi ndlela ya yi nene. U nga ta hakhela hi lezo. A Timboni ta tsaka hi ku gonzisa a zinene hilezaku ti ranza vanhu niku ti ranza Jehova Nungungulu.