XIPANZE 8

Ala wukhongeli ga mawunwa; Tirisa wukhongeli ga lisine

1. Kuhlawula muni ku vekilweko mahlweni ka vanhu nyamutlha xungetano hi wukhozeli?

JESU i te ngalo: “Loye a nga hiko na mina i hambene na mina.” (Mateu 12:30) Hina hi laha tlhelweni ga Jehova kutani tlhelweni ga Satani. Vanhu vanyingi va alakanya lezaku va tirela Nungungulu hi ndlela yi vumelekako, kanilezi a Biblia gi ngalo Satani i ‘khohlisa a tiko gontlhe.’ (Kuvululelwa 12:9) Makume ya mazana ya makume ya mazana ya vanhu ma kholwa lezaku ma khozela Nungungulu, kanilezi wona hi lisine ma tirela Satani, Diyabu! Nyamutlha ku vekilwe kuhlawula mahlweni ka vanhu: Va ta tirela Jehova, “Nungungulu wa lisine,” kutani Satani, “raru wa mawunwa.” — Tisimu 31:5; Johani 8:44.

Ti tlhatlhe ka wukhongeli ga mawunwa

2. Hi yihi yinwe ya tindlela ti tiriswako hi Satani kasi ku beletela vanhu a ku khozela Jehova?

² A xiboho xa ku tirela Jehova hi xona xi nga kuhlawula ka wutlhari, kuhlawula loku ku nehako kuamukeleka ka Nungungulu. Kanilezi Satani a nga tsaki hi loyi a tirelako Nungungulu; yena i vanga zikarato ka lava va mahako lezo. Yinwe ya tindlela ta ku maha lezo hi kutseketselwa hambu kukanetwa hi vanwani, hambu hi vanghana ni ziro za ngango. Jesu i tlharihisile: “Ni va le ngangweni wa munhu va ta maha valala vakwe.” — Mateu 10:36.

3. U ta maha yini loku a ngango wa wena kutani vanghana va ku kaneta lezaku u nga khozeli Nungungulu?

³ Loku lezo zi maheka ka wena, u ta hlamulisa kuyini? Vanhu vanyingi va zi tiva lezaku a makhozelela yabye nja hava, kanilezi va kanakana a ku ma tsika. Va alakanya lezaku hi ku maha lezo va wa ta ngha va nga tsumbekangi ngangweni wabye. Xana maalakanyo ya ma nene lawo? Loku u wa zi tiva lezaku ziro za laha kusuhani za ngango zi tirisa mimiri ya mhango, a wu nga ta zi kawuka u zi byela aku mimiri leyo yi ta zi bayisa? U wa ta hlengela na zona kutiriseni ka mimiri leyo?

4. Zini a nga wula Joxua ka va ka Israeli xungetano hi wukhozeli masikwini yakwe?

⁴ Joxua i lo kuca va ka Israeli a ku tsika mikhuwo ni mitiro ya hava ya wukhongeli ga vararu vabye. Yena i te ngalo: “Makunu chavani Jehova mu mu khozela hi ku kholeka ni zinene. Susani a vanungungulu lava a vararu va nwina va nga wa va khozela le tlhatuko wa congo ni le Gipite, mu khozela Jehova.” (Joxua 24:14) Joxua i lo tsumbeka ka Nungungulu, hi lezo Jehova i lo mu katekisa. Loku hina hi tsumbeka ka Jehova, na hinawu i ta hi katekisa. — 2 Samueli 22:26.

Tigonzo ta wukhongeli — Ta lisine ni ta mawunwa

Wunharu-munwe: Wukhongeli ginyingi gi gonzisa lezaku Nungungulu Vanharu-munwe. Gona gi ngalo “Dadani i Nungungulu, a N’wana [Jesu] i Nungungulu ni Moya wa Kubasa i Nungungulu, hambulezo vona a hi Vanungungulu vanharu, kanilezi i Nungungulu munwe.”

Kanilezi a Biblia a gi kumbuki a mhaka leyi yi nge “Wunharu-munwe,” ge hambu ku gonzisa lezaku Jehova vanhu vanharu laha ka munwe. Jehova hi yena yece a nga Nungungulu. Va Le Korinte vo sangula 8:6 i ngalo: “Kasike ka hina i kona Nungungulu munwe, a Dadani.” Jehova hi Yena a Tlakukileko nguvu. Jesu a hi Nungungulu, kanilezi i “N’wana wa Nungungulu.” (1 Johani 4:15) Hi ndlela ya kunghahi, a moya wa kubasa a hi Nungungulu. Kambe a moya wa kubasa a hi munhu. Wona i ntamu wu tirako wa Nungungulu. — Mitiro 1:8; Va Le Efesusi 5:18.
Muhefemulo: Wukhongeli ginyingi gi gonzisa lezaku muhefemulo i nchumu lowu cima wu nga fiko wu nga nzeni ka munhu. A Biblia gi gonzisa lezaku a muhefemulo hi yena munhu, kambe a munhu wa zi kota kufa. — Genesisi 2:7; Ezekieli 18:4.
Gehena: Wukhongeli ga mawunwa gi gonzisa lezaku a mihefemulo ya vanhu vakubiha yi ta hiswa gehena kala kupinzuka. A Biblia gi wula aku a vafileko a va “tivi nchumu.” (Mutshawuteli 9:5) A Biblia kambe gi gonzisa aku “Nungungulu liranzo.” (1 Johani 4:8) Jehova, Nungungulu wa liranzo, cima i wa nga ta xanisa vanwani lomu nzilweni.

Kwadru: Gi gonzisa yini a Biblia hi Wunharu-munwe, muhefemulo ni gehena?

Ti tlhatlhe zilweni zi tiriswako wukhongelini ga mawunwa

5. Hikuyini hi faneleko ku ti tlhatlha zilweni za wusalamusi?

⁵ A ku ti tlhatlha wukhongelini ga mawunwa kambe ku wula lezaku hina hi fanele a ku hahlula ni zihi zilo zi yelanako ni wusalamusi hi zi kotako kuva nazo, zo kota zitshungulu, tiphera ni masinza ya wusalamusi ni zo fanana ni lezo. Lezo za lisima hakuva zi komba aku hina hi tsumba Jehova hi kumbheleleko.

6. Zini ma nga maha maKristu yo sangula hi mabhuku yabye ya wusalamusi?

⁶ Alakanyela lezi zi nga mahiwa hi maKristu yo sangula laha ma nga boha ku tirisa wukhongeli ga lisine. A Biblia gi ngalo: “Ni vanyingi lava va tirileko za wutumbe, va lo neha mabhuku yabye, va ta ma hisa mahlweni ka vontlhe.” — Mitiro 19:19.

7. Zini hi faneleko ku maha loku hi vukelwa hi madimoni?

⁷ Vokari lava va ha valako ku tirela Jehova na va sangule hi ku ti patsa lomu ka wuloyi, wun’anga ga wungoma hambu mitirweni ya wusalamusi va zi kota ku vukelwa hi madimoni. Loku lezo zi maheka ka wena, khongela hi gezu go tlakuka ka Jehova, u tirisa vito gakwe. Jehova i ta ku vuna. — Mavingu 18:10; Jakobe 4:7.

8. Hi wahi mawonela ya maKristu xungetano hi zifananiso, zithombe ni makwadru zi tiriswako wukhongelini ga mawunwa?

⁸ Lava va navelako ku tirela Jehova va fanele a ku nga hlayisi hambu ku tirisa zifananiso, zithombe kutani makwadru ya wukhongeli ga mawunwa. Makristu ya lisine ma ‘famba hi kukholwa, a ma fambi hi kuwona.’ (2 Va Le Korinte 5:7) Wona ma chava a nayo wa Nungungulu wu beletelako a ku tirisa zifananiso lomu kukhozeleni. — Eksodusi 20:4, 5.

Hlengela ni malanza ya Jehova

A mother and her little girl prepare food together

9. Gi hi byela yini a Biblia xungetano hi kuva titlhari?

⁹ A Biblia gi ngalo: “Hlengela ni tlhari, u tava tlhariwo.” (Mavingu 13:20) Loku hi lava ku tlhariha, hi fanele ku famba, kutani ku hlengela, ni Timboni ta Jehova. Hi tona ti nga ndleleni yi yisako wutomini. — Mateu 7:14.

10. Ti nga ku vunisa kuyini Timboni ta Jehova a ku tirela Nungungulu?

¹⁰ Hakunene a Timboni ti khatalela vanhu. A ntiro wa tona ngwa ku vuna lava va timbilu ti nene a ku pima a zinene za Biblia zi yisako wutomini ga pinzukelwa. Ta zi kota a ku ku vuna hi ku gonza Biblia na wena. Kambe a ti lonzi nchumu hi lezo. Ti ta hlamula ziwutiso za wena ni ku ku komba a ndlela ya ku tirisa wutivi ga Biblia wutomini ga wena. — Johani 17:3.

11. Yi nga ku vunisa kuyini a mitlhangano ya wuKristu?

¹¹ Mitlhanganwini ya tona, leyi hi tolovelo yi mahiwako Salawini ya Mufumo, wena u ta gonza nguvu hi tindlela ta Jehova. U ta tiyiswa nguvu xibohweni xa wena xa ku tirisa wukhongeli ga lisine. Kambe u ta gonziswa a ndlela leyi u to vuna ha yona vanwani a ku tiva zinene za Biblia. — Maheberu 10:24, 25.

A congregation meeting at a Kingdom Hall

12. Wu nga ku vunisa kuyini mukhongelo a ku tirela Nungungulu?

¹² A ku na kukanakana lezaku laha u gonzako nguvu hi kuranza ni khungo ga Jehova, a kubonga ka wena hi tindlela takwe ta liranzo ku ta engetela. Kambe u fanele ku anzisa a kunavela ka wena ka ku maha lezi zi xalalisako yena ni ku potsa lezi zi nga mu xalalisiko. Alakanya lezaku wa zi kota ku tshinela ka Jehova hi mukhongelo u kombela lezaku yena a ku vuna ku maha lezi zi lulamileko ni ku potsa lezi zi nga lulamangiko. — 1 Va Le Korinte 6:9, 10; Va Le Filipi 4:6.

A family reads the Bible together — U nga tirisisa kuyini wukhongeli ga lisine?

13. U nga xalalisisa kuyini a mbilu ya Jehova?

¹³ Hi xikhati, laha wena u kulako hi tlhelo ga moya, a ku na kukanakana lezaku u ta wona a xilaveko xa ku ti hendleleta ni ku maha Mboni ya Jehova yi bapatizilweko. Hi ku ti patsa ni malanza ya Jehova, wena u ta xalalisa a mbilu Jehova. (Mavingu 27:11) U ta tshama xikari ka vanhu vo xalala lava Nungungulu a ngaku ngalo ha vona: “Nzi ta tshama ka vona, nzi fambafamba xikari ka vona; nzi ta maha Nungungulu wabye, vona va ta maha vanhu va mina.” — 2 Va Le Korinte 6:16.

Nzi ti tlhatlhile ka madimoni

Wusiku go kari na nzi etlele mubhedini ni nuna wa mina, nzi lozwa gezu gi nzi vitana makhati manharu. Anzhako nzi lo wona a langwa li avanyeka ni nchumu wo kota bhola ga nzilo wu wela hehla ka khwiri ga mina. Hi lisine, nuna wa mina a nga wonangi ni nchumu wunwe ka lezo. Hilezo, nzi lozwa nchumu wu nzi hisa nguvu. Lezo zi lo simama hi tihweti tinyingi.

Ntlhanu wa tihweti ni yinwe nzhako, a gezu lego gi lo tlhela gi nzi vitana. Hi xikhatanyana lexo, yontlhe yindlu yi waku khwatsi yi lomu matini ya kueta. Ku lo huma nyoka ya hombe hi lomu matini yi ti tsonzela canjeni ga mina. Nzi lo zama a ku yi zuza yi suka kanilezi nzi nga zi koti. Nzi lo chava hi ntamu. Anzhako, a mati ni nyoka zi lo nyamalala, mina nzi hoxiwa lahasi hi ntamu. Nzi lo titivala xikhati xo leha. A gezu lego gi lo nzi leletela ku tlhela tempelini ya wungoma lomu ka aldeya. Laha nzi nga wutisa a vito ga moya lowo, wona wu lo nzi byela a vito legi a tlhamuselo wa gona wu nge “mukumi wa titshomba, na ku ngahi wa vana.” Wu lo tsumbisa a ku nzi fumisa hi kota ya ntamu wa kuchuma.

A vababyi va wata ka mina hi laha kusuhani ni le kule. Na va nga se chikela mutini wa mina, va wa woneka wonini ga mina ga kuhlawuleka. Laha wo kari a nga chikela, a ntumbuluko wa wubabyi kutani xikarato xakwe, zinwe ni muri wa kona, a zi tiviswa ka mina hi kuba canja ga mina ni ga yena ntsena. A moya kambe wu wa nzi byela aku i kharini munhu a faneleko ku riha.

Mina nzi wa amukela mali yinyingi ni zinyikiwo zo tala hi kota ya kuchuma ko mbhelela loku nzi nga ku maha. Nzi mahile “mukumi wa titshomba,” kanilezi nzi tivile a tlhamuselo wa ‘ku ngahi na vana.’ A n’wana ni n’wana nzi nga mu pswala i wa felwa hi nhonzwa yakwe. Lezo zi wa nzi xanisa. Nzi felwe hi ntlhanu a vana ni munwe xikari ka 12 wa malembe lawa nzi nga tirela moya lowo.

Nzi lo sangula ku khongela ka Nungungulu kasi wa nzi vuna. Nzi wa khongela hi kuhiseka. Siku go kari a Timboni ta Jehova ti loba livati la mina. Hambulezi hi tolovelo nzi nga ti hlongola, siku lego nzi ti yimisele a ku ti ingisela. Nzeni ka mabhulo lawa ma nga lanzela, nzi tivile lezaku kasi nzi wa tirela dimoni! Nzi lo ti yimisela a ku tsika wungoma.

Laha a moya nzi nga wu byela lezo, wona wu lo nzi kawuka hi kota ya xiboho xa mina. Kanilezi mina nzi ku ngalo: “A nza ha hi na nchumu na wena.”

Nzi lo hisa zontlhe lezi nzi nga zi tirisa ka wutumbe. Nzi lo gonza a Biblia ni Timboni, nzi maha nanza ga Jehova ni ku bapatizwa hi 1973. Makunu nzi na ni ntlhanu wa vana va hanyako khwatsi. Ni nuna wa mina kambe i lo maha Mboni ya Jehova yi bapatizilweko. — Zi hlawutelwe hi Josephine Ikezu.

Kwadru: A wasati wo kari i ti tlhatlhisile kuyini hi ka madimoni?