Paradise misaveni

Vanhu va tixaka to hambanahambana va nga zvin’we na va ti buza hi zakuga Paradisine

Jehova i ta fuvisa wubihi gontlhe legi Satani a gi vangileko. Jehova i vekile Jesu kota Hosi hehla ka misava yontlhe. A hasi ka kufuma kakwe, a misava yi ta mahiwa paradise. — Danieli 7:13, 14; Luka 23:43.

Jehova i tsumbisa zilo lezi:

ZAKUGA ZO TALA NGUVU: “A misava yi humesile a mihanzu ya yona, Nungungulu, yena Nungungulu wa hina, i ta hi katekisa.” “A mavele ma ta pfuna nguvu tikweni ni lomu hehla ka zitsunga.” — Tisimu 67:6; 72:16.
KU NGA TA HAVA NI YIMPI KAMBE: “Tanani, mu wona mitiro ya Jehova, a zihangalaso lezi a zi mahileko misaveni. Yena i maha a tiyimpi ti khawula kala magumelweni ya misava.” — Tisimu 46:8, 9.
KU NGA TA HAVA NI VANHU VO BIHA: “Hakuva a vamahi vakubiha va ta lobyiswa . . . Ka ha hi xikhatanyana, zonake a wakubiha a nga ta kuva kona, loku u languta wutshamu gakwe i tava hava.” — Tisimu 37:9, 10.
KU NGA TA HAVA NI MABABYI, KUBAYISEKA KUTANI KUFA: “Zonake a mahlo ya zikhumu ma ta vululiwa, ni tindleve ta ziwiri ti ta vululeka. A zilema zi ta tlula khwatsi i hlangu, ni tirimi ta timbeveve ti ta yimbelela.” — Isaya 35:5, 6.

“Nungungulu wutsumbu i tava navo . . . I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:3, 4.

Kuhambana na Satani ni madimoni, Jehova cima a nga hembi. Zontlhe lezi a zi tsumbisako zi ta maha lisine. (Luka 1:36, 37) Jehova wa ku ranza niku i lava lezaku u hanya Paradiseni leyi a to yi maha. Hikwalaho wonana ni Timboni ta Jehova kasi ku gonza zinwani xungetano hi zinene zo tsakisa zi kumekako Mhakeni ya Nungungulu. Loku u tirisa a zinene wutomini ga wena, u ta tlhatlheka ka wukhumbi ga mawunwa, wukholwa ga hava ni kuvumaleni ka wutivi. Hi kufamba ka xikhati u ta tlhatlheka wukhumbini ga xionho ni kufa. Jesu i te ngalo: “Mu ta tiva zinene, ni zinene zi ta mu tlhatlhisa.” — Johani 8:32.