Xigonzo 5

Vanghana Va Nungungulu Va Ta Hanya Paradiseni

A Paradise yi nga ta kota a tiko legi makunu hi hanyako ka gona. Cima Nungungulu a nga lavangi lezaku Misava yi tele hi zikarato, hlomulo, kubayisa ni kuxaniseka. Xikhatini xitako, Nungungulu i ta hunzulusa Misava yiva paradise. Yi ta tshamisa kuyini Paradise leyi? A hi cuwukeni lezi a Biblia gi wulako.

Vanhu va nene. Paradise yi tava muti wa vanghana va Nungungulu. Vona va ta mahelana zi nene. Va ta hanya maringano ni tindlela ta kululama ta Nungungulu. — Mavingu 2:21.

Kutala ka zakuga. Ku nga tava ni ndlala Paradiseni. A Biblia gi ngalo: “A mavele [kutani zakuga] ma ta pfuna nguvu tikweni.” — Tisimu 72:16.

Tiyindlu ti nene ni ntiro wu xalalisako. Misaveni ya paradise, ngango ni ngango wu tava ni muti wa wona. Vontlhe va ta tira mitiro yi ta nga va nyika litsako la lisine. — Isaya 65:21-23.

Kurula tikweni gontlhe. A vanhu va nga ta halwa ge hambu kufa hi tiyimpi. A Mhaka ya Nungungulu yi ngalo: “[Nungungulu] i maha a tiyimpi ti khawula.” — Tisimu 46:8, 9.

Wutomi gi nene. A Biblia ga tsumbisa: “A ku na muaki ni munwe [wa lomu Paradiseni] a ta ngaku: Nza babya!” (Isaya 33:24) Kambe ku nga tava ni zilema, zikhumu, ziwiri, ge hambu timbeveve. — Isaya 35:5, 6.

Kubayisa, hlomulo ni kufa zi ta mbhela. A Mhaka ya Nungungulu yi ngalo: “Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:4.

A vakubiha va ta ngha va nyamalele. Jehova wa tsumbisa: “Kanilezi a vakubiha va ta susiwa laha misaveni. Ni vakanganyisi va ta tsuwulwa ka yona.” — Mavingu 2:22.

A vanhu va ta ranzana niku va tava ni xichawo. Ku nga ha ta va kona kungalulami, khinyavezo, makangwa ni livengo. A vanhu va ta zwanana niku va ta hanya hi kuzwanana ni tindlela ta kululama ta Nungungulu. — Isaya 26:9.