Xigonzo 4

U Nga Gonzisa Kuyini Hi Nungungulu

U nga gonza hi Jehova hi ku gonza Biblia. Kaleloko, Nungungulu i lo hlawula vanhu vokari kasi ku tsala maalakanyo Yakwe. Mitsalo leyo yi vitanwa aku i Biblia. Nyamutlha hi gonza hi Nungungulu hi ku gonza Biblia. Kota lezi a Biblia gi nga ni mhaka kutani mahungu ya Jehova, gona gi vitwawo aku i Mhaka ya Nungungulu. Ha zi kota ku kholwa lezi a Biblia gi wulako, hakuva Jehova cima a nga hembi. ‘Nungungulu a nga zi koti ku hemba.’ (Maheberu 6:18) A Mhaka ya Nungungulu yi na ni zinene. — Johani 17:17.

A Biblia xinwe xa zinyikiwo za lisima nguvu lezi Nungungulu a hi nyikileko. Gi fana ni papilo ga raru wa liranzo gi tsalelweko vana vakwe. Gona gi hi byela hi xitsumbiso xa Nungungulu xa ku hunzulusa Misava yiva wutshamu go hlamalisa ga ku hanya ka gona, paradise. Gi hi hlawutela lezi yena a zi mahileko xikhatini xi hunzileko, lezi a zi mahako makunu ni lezi a ta nga zi mahela vana vakwe votsumbeka xikhatini xitako. Kambe gi hi vuna a ku lamula zikarato za hina ni ku kuma litsako. — 2 Timote 3:16, 17.

A Timboni ta Jehova vanghana va Nungungulu; tona ti ta ku vuna ku pima lezi a Biblia gi gonzisako. Ku ti byela ntsena ku u lava ku gonza Biblia. A ti lonzi nchumu hi lezo. (Mateu 10:8) Ahandle ka lezo, wa zi kota kuya mitlhanganwini ya wukristu, yi mahiwako matshanwini ya kukhozela ma vitwako aku Masalawu ya Mufumo. Loku wena uya mitlhanganwini ya wukristu, u ta engetela hi xihatla a wutivi ga Nungungulu.

Wena wa zi kota ku gonza nchumu hi Nungungulu hi kota ya zilo lezi yena a zi mahileko. Hi xikombiso, a Biblia gi ngalo: “Nungungulu i lo vanga tilo ni misava.” (Genesisi 1:1) Laha Jehova a nga vanga a “tilo”, i lo maha a gambo. Makunu, zi hi byela yini lezo ha Jehova Nungungulu? Zi hi byela a ku yena i na ni ntamu wa hombe. Hi yena yece ntsena a nga wa ta zi kota ku maha nchumu wa ntamu wa hombe wo kota gambo. Kambe zi hi byela a ku Jehova ngwa wutlhari, hakuva ku wa laveka a kuva ni wutlhari kasi ku maha gambo, gi hi nyikako a kukufumela ni kuwonekela, niku cima a gi mbheli.

A zivangwa za Jehova zi komba ku yena wa hi ranza. Alakanya tontlhe tixaka ta mihanzu yi nga kona Misaveni. Jehova ngha a hi longiselele lixaka linwe ntsena — kutani ngha a nga hi longiselelangi ni linwe. Ahandle ka lezo, Jehova i hi nyikile tixaka tinyingi ta mihanzu, ya matshamela ma tsalangeneko nguvu, tipimo, mivala ni kunanziha. Lezi zi komba lezaku Jehova i Nungungulu wa mu nene ni wo khatalela, ahandle ka kuva wa liranzo. — Tisimu 104:24.