Himani a mahileko zilo zontlhe?

NZI tiva a nchumu wo kari wo tsakisa. Wa zi lava ku wu tiva? — Cuwuka a canja ga wena. Petsa titiho. Zezi tlakula nchumu wo kari. A canja ga wena gi nga maha zilo zo tala, niku gi nga zi maha khwatsi. Wa zi tiva ku himani a nga maha mandla ya hina? — 

Ina, hi loyi a nga maha a nomu wa hina, ni nhovu ni matihlo ya hina. Hi Nungungulu a Papai wa Mugonzisi wa Hombe. Ha tsaka hi lezi Nungungulu a nga hi nyika matihlo, a hi zona? — Hi nga zi kota ku wona zilo zo tala hi wona. Hi nga wona zitsangi, byanyi go nyuka ni tilo ga Azuli. Hi nga tlhela hi wona a mavinyani ma zwako ndlala, yo fana ni lawa hi ma wonako laha ka mufota. Hakunene za hlamalisa a ku wona zilo zo fana ni lezi, a hi zona? — 

Kanilezi, himani a nga maha a zilo lezi? Xana munhu wo fana na hina a nga zi maha? Ahihi. A munhu a nga zi kota ku aka yindlu. Kanilezi, a ku na munhu a zi kotako ku maha byanyi gi kulako. A munhu a nga zi koti ku maha a mavinyani ya tinyanyani, zitsangi, kutani zilo zinwani zi hanyako. U wa zi tiva lezo? — 

Nungungulu hi yena a nga maha zilo lezi zontlhe. Nungungulu i mahile tilo ni misava. A tlhela a maha ni vanhu. I vangile wanuna wo sangula ni wasati wo sangula. Jesu Mugonzisi wa Hombe, i gonzisile lezo. — Mateu 19:4-6.

Xana Jesu i zi tivisile kuyini lezaku hi Nungungulu a nga maha wanuna ni wasati? I lo mu wona na a va maha? — Ina, i mu wonile. Jesu i wa hi zinwe na Nungungulu a xikhati lexi Nungungulu a nga maha a wanuna ni wasati. Jesu hi yena a nga sangula ku mahiwa hi Nungungulu. Jesu i wa hi ngelosi, niku i hanyile zinwe ni Papai wakwe.

A Biblia gi hi byela lezaku Nungungulu ite: “A hi vange munhu.” (Genesisi 1:26, Tradução do Novo Mundo) Wa zi tiva a ku Nungungulu i wa wulawula na mani? — I wa wulawula ni N’wana wakwe. I wa wulawula ni loyi a nga gumesa ata laha misaveni, a ta vitaniwa ku hi Jesu.

Lezo za tsakisa, a hi zona? Hi nga zi alakanyela! Loku hi ingisela Jesu, ho gonzisiwa hi loyi a nga hi na Nungungulu a xikhati lexi a nga maha misava ni zilo zontlhe zi nga kona. Jesu i gonzile zotala a xikhati lexi a nga tira ni Papai wakwe le tilweni. A zi hlamalisi lezi Jesu a nga Mugonzisi wa Hombe!

U alakanya lezaku Nungungulu i wazwa xiwunza a xikhati lexi a nga hi yece, na a nga se maha Jesu? — Ahihi. Loku ku hi ku i wa ngazwi xiwunza, hikuyini a nga maha a zivangwa zinwani zi hanyako? — I mahile a zilo zinwani zi hanyako hakuva i Nungungulu wa liranzo. I wa lava vanwani lezaku va hanya ni kuva vazwa kunanziha ka wutomi. Hi fanele ku mu bonga Nungungulu hi lezi a hi nyikileko wutomi.

Zontlhe lezi Nungungulu a zi mahileko zi kombisa a liranzo lakwe. Nungungulu i mahile gambo. A gambo gi hi nyika kuwonekela ni ku kufumela. Loku ku wa nga hi na gambo, a zilo zontlhe zi wa ta titimela niku ku wa nga ta hanya nchumu laha misaveni. A wu tsaki hi lezi Nungungulu a nga maha gambo? — 

Nungungulu i tlhela a nisa vula laha misaveni. A zikhati zinwani a wu tsaki loku kuna vula hakuva a wu zikoti ku tshama lahandle u hlakana. Kanilezi a vula yi kulisa zitsangi. Hikwalaho, loku hi wona a zitsangi zo saseka, u alakanya lezaku himani hi faneleko ku mu bonga? — Hi zona, hi Nungungulu. Ahati loku higa mihanzu ni matsawu yo nanziha ke, himani hi faneleko ku mu bonga? — Hi fanele ku bonga Nungungulu hakuva hi yena a humesako gambo ni ku nisa vula kasi zi kula.

U nga kuyini loku a wokari a ku wutisa ku, ‘Hi Nungungulu a nga maha vanhu ni zihari ke?’ U ta kuyini? — U nga ha wula lezi: “Ina, hi Nungungulu a nga maha vanhu ni zihari.” Kanilezi, ahati loku a wokari a nga kholwi lezaku hi Nungungulu a nga maha vanhu; kutani aku: A vanhu va sukela ka zihari? A Biblia a gi gonzisi lezo. Gi wula lezaku Nungungulu hi yena a nga vanga zilo zontlhe zi hanyako. — Genesisi 1:26-31.

Kanilezi a munwani a nga ha ku byela lezaku a nga kholwi ka Nungungulu. U ta kuyini? — U nga ha mu komba yindlu. U mu wutisa lezi: “Himani a nga maha a yindlu leyi?” A vanhu vontlhe va zi tiva lezaku a yindlu leyo yi mahilwe hi munhu wo kari. Kunene, a yindlu a yi nge ti mahi ha yoce! — Maheberu 3:4.

U nga gumesa u famba naye ka simu ga zitsangi u mu komba xitsangi. U mu wutisa lezi: “Himani a nga maha a xitsangi lexi?” A ku na munhu a zi kotako ku maha xitsangi xa ku hanya. Hikwalaho, kota lezi a yindlu liyani yi nga kala ku ti maha ha yoce, a xitsangi lexi xonawu a xi ti mahangi ha xoce. Ku na ni wokari a xi mahileko. Hi Nungungulu.

Mu byele a nyima a ingisela a kuyimbelela ka xinyanyani. Zonake uku: “Himani a nga maha zinyanyani a tlhela a zi gonzisa ku yimbelela?” Hi Nungungulu. Nungungulu hi yena a nga maha tilo ni misava ni zilo zontlhe zi hanyako! Hi Yena a nyikako wutomi.

Hambulezo, a munwani a nga ha wula lezaku i kholwa lezi a zi wonako ntsena. A nga ha wula lezi: ‘Loku a nchumu nzi nga wu woni, a nzi kholwi a ku wu kona.’ Hikwalaho, a vanhu vo kari va wula lezaku a va kholwi ka Nungungulu hakuva a va zi koti ku mu wona.

Lisine lezaku a hi nge zi koti ku wona Nungungulu. A Biblia gi ngalo: ‘A ku na munhu a nga wonako Nungungulu.’ A ku na wanuna, wasati, kutani nwanana laha misaveni a zi kotako ku wona Nungungulu. Hikwalaho, a ku na munhu a faneleko ku zama ku maha xithombe kutani mufananiso wa Nungungulu. Nungungulu i tlhela a hi byela lezaku hi nga tshuki hi maha a mufananiso wakwe. Hikwalaho, zi wa nga ta mu tsakisa Nungungulu loku hi wo tshama ni zilo zo fana ni lezo lomu ndlwini ya hina. — Eksodusi 20:4, 5; 33:20; Johani 1:18.

Kanilezi, loku ku hi lezaku a hi nge zi koti ku wona Nungungulu, hi zi tivisa kuyini lezaku hakunene i kona? A hi ehlekete hi lezi zi lanzelako. U nga zi kota ku wona moya? — Ahihi. A ku na munhu a zi kotako ku wona moya. Kanilezi u nga zi kota ku wona zilo zi mahiwako hi moya. U nga wona matluka na ma ninginika a xikhati lexi a moya wu djudjako maravi ya tisinya. Hikwalaho, wa kholwa lezaku ku na ni moya.

U nga wona zilo lezi Nungungulu yenawu a zi mahileko. A xikhati lexi u wonako a xitsangi xo hanya kutani xinyanyani, u wona zilo zo kari lezi Nungungulu a zi mahileko. Hikwalaho, wa kholwa lezaku hakunene Nungungulu i kona.

A wokari a nga ha ku wutisa lezi: ‘Himani a mahileko gambo ni misava?’ A Biblia gi ngalo: “Nungungulu i lo vanga tilo ni misava.” (Genesisi 1:1) Ina, Nungungulu hi yena a nga maha zilo zontlhe lezi zo hlamalisa! U ti zwisa kuyini hi lezo? — 

Xana a zi tsakisi a ku hanya? Hi nga hazwa a kuyimbelela ko saseka ka zinyanyani. Hi nga ha wona zitsangi ni zilo zinwani lezi Nungungulu a zi mahileko. Niku ha zi kota kuga zakuga lezi Nungungulu a hi nyikako.

Ka zontlhe zilo lezi, hi fanele ku bonga Nungungulu. Kanilezi a ku hunza zontlhe, hi fanele ku mu bonga nguvu hi lezi a hi nyikileko wutomi. Kasi ku komba lezaku hakunene ha mu bonga Nungungulu, hi fanele ku maha zokari. Zini hi faneleko ku maha? — Hi fanele ku ingisa Nungungulu, hi tlhela hi maha lezi a hi byelako lomu ka Biblia. Loku hi maha lezo, hi komba lezaku ha mu ranza Loyi a mahileko zilo zontlhe.