Nungungulu A Sangula Ku Maha Zilo

ZONTLHE zilo za zi nene hi nga nazo zita hi ka Nungungulu. Yena i lo maha a gambo kasi ga hi nyika kuwonekela laha hlikanhini, a hweti ni tinyeleti kasi hiva ni kuwonekela ko kari ni wusiku. Nungungulu kambe i lo maha misava kasi hi hanya ka yona.

Kanilezi a gambo, hweti, tinyeleti ni misava a hi zona zo sangula ku mahiwa hi Nungungulu. Wa zi tiva lezi zi nga sangula? Hi kusangula Nungungulu i mahile vanhu vo fana na yena. A hi zi koti ku va wona vanhu lavo kota lezi hi nga zi kotiko ku wona Nungungulu. Lomu ka Biblia a vanhu lavo va vitwa a ku tingelosi. Nungungulu i mahile tingelosi kasi ku hanya na yena le tilweni.

A ngelosi yo sangula ku mahiwa hi Nungungulu yive yo hlawuleka nguvu. Kuve N’wana wo sangula wa Nungungulu, a nga tira ni Dadani wakwe. Yena i lo vuna Nungungulu ku maha zontlhe zinwani zilo. I lo vuna Nungungulu ku maha a gambo, hweti, tinyeleti ni misava ya hina kambe.

Yi wa tshamisile kuyini misava xikhatini lexo? Kusanguleni ni munwe ngha a nga zi kotangi ku hanya misaveni. Ku wa nga hi na nchumu, ahandle ka bimbi ga hombe gi nga hi hehla ka misava. Kanilezi Nungungulu i wa lava lezaku vanhu va hanya misaveni. Hizalezo i lo sangula ku hi longiselela zilo. Zini a nga maha?

Xo sangula, a misava yi wa lava kuwonekela. Hizalezo Nungungulu i lo maha kuwonekela ka gambo kasi ku woningela misava. Yena i mahile lezo kasi kuva kona wusiku ni hlikanhi. Anzhako Nungungulu i mahile lezaku misava yi huma hehla ka mati ya bimbi.

Kusanguleni ku wa nga hi na nchumu misaveni. Yi wa kota mufananiso lowu u wu wonako laha. Ku wa nga hi na zitsangi, tisinya hambu zihari. Hambu ni tinjhanjhi ti wa nga hi kona lomu mabimbini. Nungungulu i wa hi ni ntiro wunyingi kasi ku maha lezaku a misava yi tsakisa hakunene na a fela ku a zihari ni vanhu va hanya ka yona.