Nungungulu i vangile tilo ni misava

Jehovha Nungungulu hi yena a nga hi vanga. I vangile zvilo zvontlhe, lezvi hi zvi wonako ni zvin’wani hi kalako hi nga zvi woni. Na a nga se vanga zvilo lezvi hi zvi wonako, i vangile tingilozi to tala nguvhu. Wa zvi tiva ku zvini a tingilozi? A tingilozi zvivangwa zva moya lezvi Jehovha a nga zvi maha, niku ti fana na yena. A ku fana ni lezvi hi kalako hi nga zvi koti a ku wona Nungungulu, tonawu a hi zvi koti ku ti wona. A ngilozi yo sangula leyi Jehovha a nga yi vanga, yi gumesile yiva muvhuneteli wakwe. A ngilozi leyo yi mu vhunile ku vanga tinyeleti ni zvilo zvontlhe lezvi zvin’wani. A cin’we ca zvilo lezvo, kuve misava — ku nga wutshamu go saseka legi hi hanyako ka gona.

Hi kulandzela, Jehovha i no longisela misava kasi a zvihari ni vanhu va hanya kona. I no vanga gambo kasi gi woningela misava. A tlhela a vanga zvitsunga, mabimbi ni micongo.

Wa zvi tiva lezvi zvi nga maheka hi kulandzela? Jehovha ite: ‘Ndzi lava ku vanga byanyi ni tisinya’. Ku no sangula ku mila tisinya to hambanahambana to pswala mihandzu, matsawu, ni zvitsangi. Jehovha i no gumesa a vanga zvihari zvontlhe — lezvi zvo puruma, lezvi zvo hlambela, lezvi zvo ndzundza, ni lezvi zva ku nonoka loku zvi famba. I no maha zvihari zva zvitsongwani zvo kota zvigwaja; ni zvahombe zvo kota tindlovhu. Cihari muni leci u ci randzako nguvhu?

Jehovha i no byela a ngilozi yakwe yo sangula, aku: “A hi mahe munhu”. A vanhu a va fani ni zvihari. Va zvi kota ku maha zvilo, ku wulawula, ku hleka ni ku maha mukhongelo. Va va mahile kasi va hlayisa misava ni zvihari. Wa zvi tiva a ku himani a munhu wo sangula va nga mu maha? A hi zvi wone ka cigondzo ci landzelako.