Wukhongeli ga lisine gi ta ku vuna kala kupinzuka!

1. Zini zi to maheka loku hi ‘tshinela ka Nungungulu’?

JEHOVA i ranza lava va mu tirelako. Loku wena u khozela Jehova, yena i ta ku katekisa makunu ni xikhatini xi tako. A Biblia gi ngalo: “Tshinelani ka Nungungulu, na yena i ta tshinela ka nwina.” — Jakobe 4:8.

2. Hi nga tshinelisa kuyini ka Nungungulu niku kona ku nga khumbisa kuyini mikhongelo ya hina?

² Kasi wa tshinela ka Nungungulu, wena u fanele ku gonza ni ku tirisa Mhaka yakwe. Loku u khongela maringano ni kuranza kakwe, Jehova i ta ingisela mikhongelo ya wena ni ku yi hlamula. Johani, mupostoli wa muKristu, i tsalile: “A kutsumba loku hi nga nako ka [Nungungulu] hi loku, kaku i ta hizwa loku hi kombela nchumu lowu wu yelanako ni kuranza kakwe. Loku hina hi zi tiva lezaku wa hizwa, kani hi xihi lexi hi xi kombelako, zonake ha zi tiva lezaku hi sina hi hi nazo lezi hi zi kombelileko ka yena.” — 1 Johani 5:14, 15.

3-7. Hi nga kumisa kuyini wutlhari gi tako hi ka Nungungulu niku gona gi nga hi vunisa kuyini?

³ Kambe, laha u tshinelako ka Nungungulu, yena i ta ku nyika wutlhari ga ku lwisana ni zilo za kuhanya za siku ni siku. A Biblia gi ngalo: “Loku munwani wa nwina a vumala wutlhari, a kombele ka Nungungulu.” — Jakobe 1:5.

⁴ Gi nga ku vunisa kuyini a wutivi gi tako hi ka Nungungulu? Xo sangula, gona ga zi kota a ku ku vuna ku tiva lezi zi nga xalalisiko Jehova. Kambe u ta zi tiva aku hikuyini zilo lezo zi nga lulamangiko ni lezi u faneleko ku maha kasi wa zi potsa. Wutivi lego ga zi kota a ku ku vikela zikarato zinyingi lezi zi xanisako vanhu vanyingi. Hi xikombiso, a ku ingisa zileletelo za Nungungulu za ku hlazeka hi tlhelo ga mahanyela ka vuna ku vikela malanza ya Nungungulu lezaku va nga vangi tinyimba ti nga lavekiko, va nga kumi mababyi yo thapeliswa hi ziro za wubeleki kutani wukati gi nga xalalisiko hambu gi hohlokako.

⁵ Zini kambe a wutlhari gi tako hi ka Nungungulu gi zi kotako a ku ku nyika? Ga zi kota a ku ku nyika mano kasi wa vuneka nguvu hi kuhanya. Ga zi kota a ku ku vuna ku tsema timhaka ta wutlhari zilweni zi tirako, zo kota a ndlela ya ku tirisa khwatsi a mali ya wena. U ta zi kota ku chikelela mixuvo ya chukwana ni ku ala leyi yi nga hiko na lisima la simasima.

⁶ A wutlhari gi tako hi ka Nungungulu ga zi kota kambe a ku ku vuna kuzwananeni ka wena ni vanwani. Wa zi kota kuva ni wutomi ga ngango go xalalisa nguvu. Wa zi kota ku aka wunghana go mbhelela ni ga simasima ni vanwani, niku wa zi kota ku kuma xichawo hambu hi ka lava va nga tireliko Nungungulu.

⁷ Kambe, a kuva ni wutlhari gi tako hi ka Nungungulu ku ta chukwatisa a mawonela ya wena hi kuhanya. Ku ta ku vuna ku hlula zikarato ni zikhunguvanyiso za kuhanya. U tava kambe ni mawonela ma nene ni ya kuringaniselwa hi wumanziko. A mawonela ma nene, hi tlhelo ga wona, ma ta hlengela lezaku kasi wa kuma ni ku hlayisa wutomi gi nene ga miri ni kupima. — Mavingu 14:30; Isaya 48:17.

8. Zini u to kala ku zi chava loku u tirela Nungungulu?

⁸ Loku u tirela Nungungulu wa lisine, u ta tlhatlheka ka wutoya legi gi xanisako lava va nga mu tireliko. U nga ta chava vafileko hakuva wa zi tiva lezaku vona a va na wutomi xilahleni. U nga ta chava kufa hakuva wa kholwa xitsumbisweni xa Nungungulu xa ku vuxa vafileko. Kambe u nga ta chava wuloyi ni wungoma hakuva wa zi tiva lezaku Nungungulu ngwa ntamu-wontlhe. — Johani 8:32.

A valulamileko va taga tshomba ya tiko

9-11. Vamani va to hanya Paradiseni niku vamani va to kala ku hanya kona?

⁹ Loku wena u tshinela ka Nungungulu, u nga ta chava wumanziko. Kota lezi hi zi wonileko, a Biblia gi sina gi wulile hi mahlweni hi zikarato zinyingi lezi hi zi wonako nyamutlha Misaveni. Jehova i hi byela lezaku zilo lezo za xikhatanyana; lokuloku a Mufumo wa Nungungulu wu ta hunzulusa Misava leyi yiva paradise. — Luka 21:10, 11, 31; 23:43.

¹⁰ Ntsena lava va tshinelako ka Jehova ni ku mu tirela va ta hanya Paradiseni. A Biblia gi ngalo: “Ka ha hi xikhatanyana, zonake a wakubiha a nga ta kuva kona, loku u languta wutshamu gakwe i tava hava. Kanilezi lava va rulako va taga tshomba ya tiko, va ta xalaliswa hi kurula ka hombe.” — Tisimu 37:10, 11.

¹¹ Lava va ti nonohisako va ala ku ingisa milayo ya kululama ya Nungungulu va ta luza wutomi gabye kala kupinzuka. (2 Va Le Tesalonika 1:8, 9) Va nga ha ta va kona. Vona va ta patswa na Satani ni madimoni yakwe kufeni ka pinzukelwa. (Kuvululelwa 20:10, 14) Kanilezi lava va tivako Jehova ni ku mu tirela va ta kuma kurula ka hombe Paradiseni ya Misava.

Wumanziko go hlamalisa!

12. Gi wula yini a Biblia hi wumanziko?

¹² Jehova i vekele zo saseka lava va mu ranzako! Wona lezi a Mhaka yakwe yi wulako hi wutomi Paradiseni ya Misava:

• Kutala ka zakuga: “A mavele [kutani zakuga] ma ta pfuna nguvu tikweni ni lomu hehla ka zitsunga.” — Tisimu 72:16.

• Tiyindlu ti nene: “Loku va aka tiyindlu va ta tshama ka tona.” — Isaya 65:21.

• Ntiro wu xalalisako: “Ni vahlawulilweko va mina va ta tsakela mitiro ya mandla yabye. Va nga ta ti karatela mahala.” — Isaya 65:22, 23.

• Ku nga ha ta va kona mababyi: “A ku na muaki ni munwe a ta ngaku: Nza babya!” — Isaya 33:24.

• A kungambhelelangi ka miri ku nga ha ta va kona: “A mahlo ya zikhumu ma ta vululiwa, ni tindleve ta ziwiri ti ta vululeka. A zilema zi ta tlula khwatsi i hlangu, ni tirimi ta timbeveve ti ta yimbelela.” — Isaya 35:5, 6.

• Ku nga ha ta va kona kubayisa, kuxaniseka ni kufa: “[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:4.

• Ku nga ha ta va kona yimpi: “[Nungungulu] i maha a tiyimpi ti khawula kala magumelweni ya misava.” — Tisimu 46:9.

• Wutomi ga pinzukelwa: “A valulamileko va taga tshomba ya tiko, va aka ka gona kala kupinzuka.” — Tisimu 37:29.

13. Himani ntsena a zi kotako ku hunzulusa Misava leyi yiva paradise, hikuyini?

¹³ A vanhu cima va wa nga ta maha zilo lezo, kanilezi Jehova i na ni ntamu wa ku maha ni xihi lexi a nge ngalo i ta xi maha. Xi hava xi mu beletelako ku maha lezi a zi lavako ku maha. A Biblia gi ngalo: “A ku na xilo xi nga mu tsanzako Nungungulu.” — Luka 1:37.

14. U nga kumisa kuyini a ndlela yi yako wutomini ga pinzukelwa?

¹⁴ Hi ku tirisa Timboni takwe, Jehova i nyika xikhati ka vanhu matlhelweni wontlhe xa ku ‘enghena hi nyangwa yo hlongana’ ni ku famba hi ndlela yi yisako wutomini ga pinzukelwa. Ngha u va xikari ka vanhu vo xalala va vumelako xirambo lexi. Tirisa wukhongeli ga lisine u amukela xikatekiso xa Jehova kala kupinzuka! — Mateu 7:13, 14.