Xigonzo 3

Kulaveka Ku Gonza Hi Nungungulu

Kasi kuva munghana wa Nungungulu, wena u fela ku gonza hi yena. Xana vanghana va wena va gi tiva a vito ga wena niku va gi tirisa? Ina. Nungungulu i lava lezaku na wenawo u tiva ni ku tirisa vito gakwe. A vito ga Nungungulu hi Jehova. (Tisimu 83:18; Mateu 6:9) Kambe wena u lava ku gonza lezi a zi ranzako ni lezi a nga zi ranziko. U lava ku tiva a ku vamani vanghana ni valala vakwe. Zi teka xikhati kasi ku tiva wo kari. A Biblia gi ngalo wutlhari ku siya xikhati kasi ku gonza hi Jehova. — Va Le Efesusi 5:15, 16.

Vanghana va Nungungulu va maha lezi zi mu xalalisako. Alakanya vanghana va wena wutsumbu. Loku u va onhela ni ku maha lezi va zi nyenyako, xana va ta simama kuva vanghana va wena ke? Ahihi! Hi ndlela leyo, loku u lava lezaku Nungungulu a hi munghana wa wena, u fela ku maha lezi zi mu xalalisako. — Johani 4:24.

A hi gontlhe wukhongeli gi yisako wunghaneni na Nungungulu. Jesu, loyi a nga munghana wa laha kusuhani nguvu na Nungungulu, i wulawulile hi tindlela timbiri. Yinwe ya tona yi anamile niku yi tele hi vanhu. Yona yi yisa kulobyisweni. Yinwani ndlela yi hlonganile niku vatsongwani va fambako ha yona. A ndlela leyo yi yisa wutomini ga pinzukelwa. Lezi zi wula ku, loku u lava kuva ni wunghana ga Nungungulu, u fela ku gonza a ndlela yi nene ya ku mu khozela. — Mateu 7:13, 14.