Himani Nungungulu wa wena?

HIKUYINI a xiwutiso lexi xaku himani Nungungulu wa wena, xi nga xa lisima? — Xa lisima hakuva a vanhu va khozela a vanungungulu vo tala. (1 Va Le Korinte 8:5) A xikhati lexi mupostoli Paule a nga nyikiwa ntamu hi Jehova wa ku hanyisa a wanuna loyi a nga kala a nga se tshuka a famba, a vanhu va lo banguleka vaku: ‘A vanungungulu va relele ka hina na va hi ni mimiri ya vanhu!’ A vanhu lavo va wa lava ku khozela Paule ni munghana wakwe Barnabasi. Va lo byela Paule lezaku hi yena Merkure, zonake Barnabasi vaku hi Jupiteri. Lawo ma wa hi mavito ya vanungungulu vabye va mawunwa.

Kanilezi, Paule na Barnabasi a va tsikangi vanhu lavo lezaku va va khozela. Va lo tsutsumela xidlenwini, va banguleka vaku: ‘Tsikani lezi zi nga nyawuliko, muta ka Nungungulu a hanyako.’ (Mitiro 14:8-15) Himani a ‘Nungungulu a hanyako,’ loyi a vangileko zilo zontlhe? — Ina, hi Jehova, “loyi a Hunzeleleko Kutlakuka misaveni yontlhe.” Jesu i te Jehova i “Nungungulu munwe wa lisine.” Makunu, himani loyi a faneleko ku khozelwa? — Ina, hi fanele ku khozela Jehova basi! — Tisimu 83:18; Johani 17:3; NM; Kuvululelwa 4:11.

A vanhu vo tala va khozela a vanungungulu vanwani wutshanwini ga “Nungungulu munwe wa lisine.” Ka zikhati zo tala va khozela zilo va zi mahileko hi tisinya, maribye, kutani tisimbi. (Eksodusi 32:4-7; Levi 26:1; Isaya 44:14-17) Hambu a vavanuna ni vavasati va nga ni ndhuma a zikhati zinwani va woniwa ku khwatsi vanungungulu. Xana zi nene a ku va nyika wudzunzo a vanhu lavo? —

Anzhako ka kuva Saule a mahile mupostoli Paule, i lo tsala lezi: “A nungungulu wa misava leyi i pfhupelisile a kupima ka lava va nga kholwiko.” (2 Va Le Korinte 4:4) Kasi himani a nungungulu loye? — Hi zona, hi Satani Diabolusi! Satani i maha lezaku a vanhu va khozela vanwani ni zilo zo tala.

A xikhati lexi Satani a nga zama ku maha lezaku Jesu a mu khizamela ni ku mu khozela, zini lezi Jesu a nga byela Satani? — I mu byelile lezi: “U ta khozela Jehova Nungungulu wa wena, hi yena yece u to mu tirela.” (Mateu 4:10, NM) Hikwalaho, Jesu i lo zi veka kubaseni lezaku hi Jehova ntsena loyi a nga ni fanelo ya ku khozelwa. A hi gonze hi majaha yo kari lawa ma nga tiva lezo. A mavito yabye hi Xadrake, Mexake, na Abed-nego.

A majaha lawo ya Maheberu ma wa hi ya tiko ga Nungungulu ga Israeli niku ma lo tekiwa ma yisiwa tikweni ga Babuloni kota tikhumbi. Na va hi kwaseyo, a hosi yo kari, a vito ga yona ku nga hi Nebukadnezzare, yi lo maha xifananiso xa hombe xa nzalama. Ka siku go kari yi lo laya lezaku a xikhati lexi a wucenje gi to sangula, a vanhu vontlhe va wa fanele ku khizamela xifananiso lexo. I lo tlharihisa lezi: ‘Ni wihi a to kala a nga khizami lahasi a xi khozela, i ta tekela ku hoxiwa nzhimbyeni wa pingo ga nzilo.’ Loku ku wa hi wena na u mahile yini? —

Xadrake, Mexake, na Abed-nego va wa tolovela a ku maha zontlhe lezi a hosi yi nga va byela lezaku va maha. Kanilezi va lo ala ku khizamela a xifananiso lexo. Wa zi tiva ku hikuyini? — Hi kota ya lezi a nayo wa Nungungulu wu nga kari wu wula lezi: ‘A wu faneli kuva ni vanungungulu vanwani mahlweni ka mina. U nga ti maheli xifananiso xi vatlilweko ni ku xi khizamela.’ (Eksodusi 20:3-5) Hikwalaho, Xadrake, Mexake, na Abed-nego va lo ingisa nayo wa Jehova wutshanwini ga ku ingisa a xileletelo xa hosi.

A hosi yi lo zangara nguvu, hikwalaho, yi lo vitanisa a majaha lawo ya manharu ya maHeberu lezaku mata ka yona. I lo ma wutisa lezi: ‘Xana mo maha ha womu a ku kala mu nga khozeli a vanungungulu va mina? Nzi ta tlhela nzi mu nyika xikhati. Makunu ni xihi xikhati mu zwako a wucenje khizamelani a xifananiso lexi nzi nga xi maha. Kanilezi loku mu nga mahi lezo, mu ta tekela ku hoxiwa xikari ka nkele wa nzilo wa hombe. Himani nungungulu a to zi kota ku mu tlhatlhisa mandleni ya mina ke?’

Ma wa ta kuyini a majaha lawo? Loku ku wa hi wena na u mahile yini? — Ma lo hlamula hosi maku: ‘A Nungungulu wa hina loyi hi mu khozelako i na ni ntamu wa ku hi ponisa. Kanilezi hambu loku a nga hi ponisi, a vanungungulu va wena hi nga ta va khozela. Hi nga ta khizamela a xifananiso xa wena xa nzalama.’

A hosi yi lo kwata, yi laya lezi: ‘Mahani a nzhimbo wa nzilo wu hisa ku hunza a tolovelo wa wona hi ntlhanu wa zikhati ni zimbiri!’ I lo gumesa a ruma tinhenha takwe lezaku ti khoma Xadrake, Mexake, na Abed-nego ti va hoxela lomu ka nkele lowo wa nzilo! A nkele lowo wa nzilo wu wa hisa nguvu laha ka kuza a vavanuna vakwe va dawa hi malangavi ntsena! Ahati a majaha lawo ya manharu ya maHeberu ke?

Xadrake, Mexake, na Abed-nego va lo wela lomu xikari ka nzilo. Kanilezi, va lo tekela ku suka va yima! Va wa nga bayisiwangi. Ne va wa nga ha bohiwangi. Zi kotekisile kuyini zalezo? — A hosi yi lo cuwuka lomu nkeleni wa nzilo, niku yi lo chava nguvu hi lezi yi nga zi wona. Yi lo wutisa lezi: ‘A hi hoxangi a vavanuna vanharu lomu xikari ka nzilo ke?’ A malanza yakwe ma lo hlamula lezi: ‘Hi zona, hosi.’

Zonake a hosi yi lo wula lezi: ‘Wonani! Nzi wona mune wa vanhu va tlhatlhilweko, na va fambafamba lomu xikari ka nzilo, kanilezi a va bayisiwi.’ Wa zi tiva lezaku ku wa himani a wanuna loye wa wumune? — Yi wa hi ngelosi ya Jehova. Yi lo vikela a vaHeberu lavo va vanharu lezaku va nga bayisiwi.

A xikhati lexi a hosi yi nga wona lezo, yi lota laha nyangweni wa nkele wa nzilo zonake yi vitana hi gezu go tlakuka yiku: “Xadrake, Mexake, na Abed-nego, nwina malanza ya Nungungulu a Hunzeleleko Kutlakuka, humani, tanani leno!” A xikhati lexi va nga huma, vontlhe va lo wona lezaku va wa nga swangi. Ne va wa nga zwali masema ya nzilo. Zonake a hosi yiku: ‘A khesiwe a Nungungulu wa Xadrake na Mexake na Abed-nego, loyi a rumeleko a ngelosi yakwe a ku ta tlhatlhisa malanza yakwe hakuva va lo ala ku khozela a nungungulu munwani ahandle ka Nungungulu wabye.’ — Danieli, xipimo 3.

Hi nga gonza xo kari ka lezi zi nga gumesa zi humelela. Hambu nyamutlha a vanhu va maha zifananiso kutani zithombe, kasi ku zi khozela. A bhuku go kari gi ngalo: “A mujeke wu basile, a ku fana ni xihambano.” (The Encyclopedia Americana) A zifananiso zo kari zi mahiwa hi tisinya, maribye, tisimbi, kutani tinguwo. A vapizani vo sangula va Jesu va wa nga khozeli a hosi ya mufumo wa Roma. Daniel P. Mannix, a tlhari yo kari ya matimu, i fananisile lezo ni “ku ala ku bayethela mujeke kutani ku phinda xihlambanyo xo kombisa kutsumbeka.”

U alakanya lezaku mahlweni ka Nungungulu ku na ni kuhambana loku a xifananiso xa wukhongeli xi mahilwe hi nguwo, sinya, ribye, kutani hi simbi ke? — Xana zi wa tava zi nene a kuva a nanza ga Jehova gi khizamela kutani ku khozela a xifananiso xo fana ni lezo? — Xadrake, Mexake, na Abed-nego a va vumelangi a ku xi khozela, niku Jehova i lo tsaka hi vona. U nga xi pimanyisisa kuyini a xikombiso xabye? —