Va alile ku khizamela cifananiso

Andzhako ka cikhati co kari hosi Nebhukadnezare na a lorile cifananiso, i no maha cifananiso ca hombe ca ouro. I no ci veka le livaleni la Dhura, a vitana vanhu vo tala va lisima va lomu tikweni — a ku patsa na Xadrake, Mexake, na Abhed-Nego — lezvaku va ta tlhangana laha ka cona. A hosi yi no laya, yiku: ‘Zvalezvi mu tozwa mimpundzu, zvitende ni mimpundzu ya hombe, khizamelani cifananiso! Ni wihi a to kala ku khizama i ta hoxiwa lomu nkeleni wa ndzilo’. Xana a vaHebheru lava va vanharu va wa ta khizamela cifananiso leco, kutani va wa ta khozela Jehovha basi?

Loku a vanhu va tlhangene, a hosi yi no laya lezvaku ku chayiwa muzka. Vontlhe va no khizama va khozela cifananiso leco. Kanilezvi, Xadrake, Mexake na Abhed-Nego a va ci khizamelangi. A vavanuna vo kari va no va wona va ya byela hosi, vaku: ‘A vaHebheru lavayani va vanharu va ala ku khozela cifananiso ca wena’. Nebhukadnezare i no va vitanisa a ta va byela lezvi: ‘Ndza mu nyika khati legi kambe kasi mu khozela cifananiso. Loku mu nga ci khozeli, ndzi ta mu hoxa lomu nkeleni wa ndzilo. A ku na Nungungulu a to zvi kota ku mu ponisa ka mina’. Vona vaku: ‘U ngazi u hi nyika khati gin’wani. A Nungungulu wa hina a nga zvi kota ku hi ponisa. Kanilezvi, hambu loku a nga hi ponisi, wena hosi tiva lezvaku hi nga ta khozela cifananiso ca wena’.

Nebhukadnezare i no zangara nguvhu, a byela vavanuna vakwe, aku: ‘Hlanganyetani ndzilo lomu nkeleni wu hisa 7 wa makhati ku hundza lezvi wu nga ha zvona’! I no gumesa a ruma masochwa yakwe, aku: ‘Va boheni mu va hoxela lomo’! A nkele wa ndzilo wu wa hisa nguvhu laha ka ku a cikhati leci a masochwa ma nga tshinela kusuhani, ma no tekela kufa. A vaHebheru lava va vanharu va no wela lomu ndzilweni. Kanilezvi, a cikhati leci Nebhukadnezare a nga cuwuka lomu nkeleni wa ndzilo, i no wona 4 wa vavanuna na va fambafamba, na ku nga hi vanharu basi. I no chava nguvhu a wutisa tihosana takwe, aku: ‘Kasi a hi hoxelangi vavanuna vanharu lomu ndzilweni ke? Ndzi wona 4 wa vona. Loyi mun’wani i fana ni ngilozi’!

Nebhukadnezare i no tshinela kusuhani, a vitana aku: ‘Malandza ya Nungungulu a Tlakukileko ku Hundza Vontlhe, humani’! Vontlhe va no hlamala hi ku wona Xadrake, Mexake na Abhed-Nego na va huma hi lomu nkeleni wa ndzilo na va nga swangi. A miri wabye, a misisi yabye, ni tinguwo tabye zvi wa nga swangi ne ku nuha musi.

Nebhukadnezare aku: ‘A Nungungulu wa Xadrake, Mexake na Abhed-Nego wa hombe. I rumele ngilozi yakwe yi ta va ponisa. A ku na nungungulu wo fana ni loyi wabye’.

A ku fana ni vaHebheru lava va vanharu, wenawu u ti yimisele ku tsumbeka ka Jehovha hambu loku ku humelela ni cihi ke?