A Mufumo lowu wu to fumela a misava yontlhe

Xana u nga dumba lezaku hi wulawula hi Mufumo wihi? — Ina, Mufumo wa Nungungulu, a Mufumo lowu wu to maha misava yiva paradise. Xana wa zi tsakela a ku gonza zinwani xungetano hi Mufumo lowo? — 

A mifumo yontlhe yi na ni tihosi. Niku a hosi yi fumela vanhu va tiko ga yona. Xana wa yi tiva a Hosi ya Mufumo wa Nungungulu? — Hi Jesu Kristu. Yena i hanya le tilweni. Zezanyana yena i tava Hosi ya vanhu vontlhe misaveni! Xana u alakanya lezaku hi tava ni litsako a xikhati lexi Jesu a to fumela misava yontlhe? — 

Hi tava ni litsako la hombe nguvu! Le Paradiseni, a vanhu va nga ta halwa kutani kuya yimpini kambe. Vontlhe va ta ranzana. A ku na munhu a to babya kutani kufa. A zikhumu zi ta wona, a ziwiri zi tazwa, niku lava va nga zi kotiko ku famba va ta tsutsuma va tlhela va tlulatlula. Vontlhe va tava ni zilo zo tala nguvu kasi kuga. Niku a zihari zi ta zwanana zi tlhela ziva vanghana va hina. A vanhu lava va fileko va ta vuxiwa. A vavanuna ni vavasati vo tala lava u gonzileko hi vona lomu ka broxura legi, vo kota Rebeka, Rahabi, Davida na Elija, vonawu va ta vuxiwa! Xana wa zi lava a ku wonana navo a xikhati lexi va to vuxiwa? — 

Jehova wa ku ranza niku i lava lezaku u tsaka. Loku u gonza xungetano hi yena u tlhela u mu ingisa, u ta hanya kala kupinzuka paradiseni go saseka misaveni! A hi zona lezi u zi lavako ke? —