Gonziselelo ya Mufumo — wu gonzisa a malanza ya Hosi

U KARI u ingisela a kanelo zonake u nwayitela kasi ku tiyisa mukaneli. Makabye wa xinuna wa bandla ga nwina loyi a ha hiko jaha, niku o veka a kanelo yakwe yo sangula mutlhanganweni wa xipanze. A xikhati lexi u ingiselako a kanelo yakwe, u hlamala nguvu a gonziselelo leyi a vanhu va Nungungulu va yi kumako. U alakanya a tikanelo to sangula ta jaha legi — u tlhela u wona a kuhambana ka hombe ni lezi a nga zona zezi! I kulile nguvu hi tlhelo ga moya anzhako ka ku gonza Xikola xa Ntiro wa Wuphayona. Zezanyana, yena ni sati wakwe va gonzile a Xikola xa Vavangeli va Mufumo. Na mu kari mu mu bela mandla loku a mbhetile a kanelo yakwe yo saseka, u cuwuka seno ni seno u alakanyela a gonziselelo leyi a vanhu vontlhe va Nungungulu va nga na wena mutlhanganweni va yi kumako.

A Biblia gi profetile hi xikhati lexi a vanhu va Nungungulu va nga wa ta “maha vapizani va Jehova” kutani ku gonzisiwa hi yena. (Isa. 54:13) Zalezi hi hanya xikhatini lexo. A hi gonzisiwi hi mabhuku ya hina ntsena kanilezi hi tlhela hi kuma gonziselelo mitlhanganweni ya hina ya bandla, mitlhanganweni ya hombe, migotsovanyanweni, ni zikoleni zo hambanahambana lezi zi mahelweko ku hi longiselela a ziavelo zo kari hlengeletanweni ya Jehova. Ka xipanze lexi, hi ta wulawula hi lezi a gonziselelo yontlhe leyo yi nyikisako zona a xikombiso xa lezaku a Mufumo wa Nungungulu hakunene wa fuma nyamutlha.