Longoloko Wa Siku Ga Mutlhangano Wo Hlawuleka Wa 2010
1. (a) Hi tihi a tihloko ta mhaka ta lomu Mitsalweni leti ti tlhamuselweko ka masiku ya mutlhangano wo hlawuleka leyi ya ha hi ku mahiwako? (b) Xana ku na ni timhaka-tshinya to kari u ti kumileko ka masiku ya mutlhangano wo hlawuleka lawa ma hunzileko, leti ti ku vunileko wutirelini ga wena?
1 “Hlawulani Lezi Zi Nga Za Lisima Nguvu,” “Yimani Muku Nde Kota Ntlhambi Munwe,” “Simamani Mu Kustumunya A Zinene,” ni “Hina Hi Wumba — Jehova Muwumbi Wa Hina.” (Fil. 1:9, 10, 27; Joh. 18:37; Isa. 64:8) Leti kova tihloko ta mhaka to kari ntsena ka leti to tala ti tlhamuselweko ka masiku ya mitlhangano yo hlawuleka lawa ma hunzileko. Xana wa xuva a ku wona a siku ga mutlhangano wo hlawuleka ga lembe ga ntiro ga 2010? A mutlhangano lowo wu ta tlhamusela a hloko ya mhaka leyi: “A Xikhati Xi Seleko Xi Komile,” yi susilweko ka 1 Va Le Korinte 7:29.
2. Zini mu nga mahako kasi mu langutela mutlhangano lowu hi mahlo yo pswhuka?
2 Zalezo a siku ga mutlhangano wo hlawuleka gi tivisiwako laha bandleni ga nwina, sangula ku bhula hi ndlela yi ta nga mu maha mu wu langutela hi mahlo yo pswhuka. A vapswali vo kari va vuna vana vabye a ku langutela a mutlhangano hi ku funga a siku ga kona laha ka kalendari ga ngango, zinwe ni xaxameto wa zilo lezi a munwe ni munwani a faneleko ku famba nazo mutlhanganweni lowo, zonake va sangula ku hlayela masiku a xikhati lexi ma hungukako kala ku chikela a siku ga mutlhangano. Ka Wukhozeli ga nwina ga Ngango ga ni gambo, mu nga ha lava ku vuxeta a timhaka-tshinya leti mu nga tsalatsala ka masiku ya mutlhangano wo hlawuleka lawa ma hunzileko. Wa zi kota kambe a ku longisela a mbilu ya wena ka ximaho lexi hi ku vuxeta a Beneficie-se da Escola do Ministério Teocrático, maphajina13-16, kasi ku vuna wena zinwe ni ngango wa wena a ku ‘tlharihela lezi u zwisako zona.’ — Luka 8:18.
3. Hi nga xi susisa kuyini a xivuno xa hombe ka lezi zi to kanelwa?
3 Tirisani Lezi Mu Gonzako: Anzhako ka mitlhangano ya hombe, a vamakabye va tolovela ku wula a magezu yo kota lawa, “A mutlhangano lowu a wu no ku tsakisa!” Lezo lisine xontlhe xikhati, kota lezi lego gi nga ginwe ga malulamiselo yo tala ya ma nene nguvu ma tako hi ka Jehova. (Mav. 10:22) Kasi a timhaka leti u ti zwileko ti pswala mihanzu, u fanele ku ti alakanyela u tlhela u ti khoma. (Luka 8:15) A xikhati lexi mu wuyako hi mutlhanganweni, bhulani hi longoloko kota ngango, kutani ni lava mu hlengelako navo a mova. Bhulani hi mixuvo ya munwe ni munwani wa nwina kutani timhaka ti to mu vuna wutirelini ga nwina. A ku maha lezo zi ta mu maha mu vuneka nguvu hi lezi mu zi zwileko hi xikhati xo leha nguvu anzhako ka mutlhangano. — Jak. 1:25.
4. Hikuyini a mutlhangano lowu wu tova wo hlawuleka ka hina?
4 Xontlhe xikhati hi amukelako a xinyikiwo xi nga ni xivuno ka hina hi tizwa na hi hi vanhu vo hlawuleka. Xana a hi xuvi nguvu a ku wona lezi Jehova a hi longiseleleko zona ka siku ga mutlhangano wa hina wo hlawuleka legi gi lanzelako? Ha tiyiseka lezaku hi ta vuneka hi tindlela tontlhe. Ha zi kota ku rinzela a ku amukela hi ka Dadani wa hina wa le tilweni, Jehova, a xinyikiwo xwalexo hi xi lavako, ku nga kutiyiswa ni gonziselelo lezaku hi yisa mahlweni a ntiro lowu a hi nyikileko a ku wu maha. — 2 Tim. 4:2; Jak. 1:17.