A Mhaka ya Nungungulu yi na ni ntamu

1. Yi le yini a hloko ya mhaka ya mutlhangano wo hlawuleka wa lembe ga ntiro ga 2014?

¹ A ku hambana ni zilo zi tako hi ka vanhu va nga mbhelelangiko, a Biblia gi na ni ntamu wa ku hi cica, gi maha a kupima ka hina ni mahanyela ya hina zi zwanana ni kuranza ka Jehova. Xana a Mhaka ya Nungungulu yi na ni ntamu wo kota kwihi? Hi nga wu tirisisa kuyini hi kumbhelela wutomini ga hina? Hi yihi ndlela ya ku wu tirisa khwatsi kasi ku vuna vanwani? Ha tsumba lezaku hontlheni hi ta tiyisiwa hi tlhelo ga moya a xikhati lexi a timhaka leti ti to tlhamuselwa ka siku ga mutlhangano wo hlawuleka wa lembe ga ntiro ga 2014. A hloko ya mhaka ya mutlhangano lowu yi le, “A Mhaka ya Nungungulu yi na ni ntamu,” yi susilweko ka Maheberu 4:12.

2. Ziwutiso muni hi faneleko ku ingisela a mihlamulo ya zona?

² Lava mihlamulo ya ziwutiso lezi: Loku u kari ingisela a mutlhangano lowu, tsala a mihlamulo ya ziwutiso lezi zi lanzelako.

• Hikuyini hi faneleko ku tsumba a Mhaka ya Jehova? (Tis. 29:4)

• Hi nga maha yini kasi hizwa a ntamu wa Mhaka ya Nungungulu wutomini ga hina wutsumbu? (Tis. 34:8)

• U nga vunisa kuyini vanhu wutirelini lezaku vazwa a ntamu wa Mhaka ya Nungungulu? (2 Tim. 3:16, 17)

• Hi nga potsisa kuyini ku phasiwa hi kukhohlisa ka tiko ga Satani? (1 Joh. 5:19)

• Kota muswa, u nga humelelisa kuyini hi tlhelo ga moya ke? (Jer. 17:7)

• Hi nga wu kumisa kuyini ntamu hambu loku hi hi ni gome? (2 Kor. 12:10)

• Zini zi lavekako kasi hi simama ku cica lezi zi lavekako wutomini ga hina, hambu loku ku hi lezaku hilwa ni mahanyela ya hava hi xikhati xo leha? (Efe. 4:23)

3. Ahandle ka ku ingisela tikanelo, hi tihi tindlela tinwani ta ku vuneka hi mutlhangano wo hlawuleka?

³ Hakunene, hi ta vuneka nguvu hi kuzwa zilo lezi za lisima! Ahandle ka lezo, a ku fana ni mutlhangano wa xipanze ni gotsovanyano, a mutlhangano wo hlawuleka wu ta hi nyika lungelo ga ku maha vanghana ni ku ti buza ku bhula ni vamakabye va hina va mabandla manwani. (Tis. 133:1-3; 2 Kor. 6:11-13) Hikwalaho, ti nyike xikhati xa ku bhula ni vanghana va kale u tlhela u maha vanghana va vaswa. Loku mu enzelwa hi mukaneli wo kari, wo kota muwoneleli wa muganga kutani makabye a tako hi Beteli, a hi chukwana u ti nyika xikhati xa ku bhula naye zinwe ni sati wakwe ke? Kunene, hi na ni zigelo zo zwala za ku gi rinzela hi mahlo yo pswhuka a siku legi ga mutlhangano wo hlawuleka!