Longoloko Wuswa Wa Siku Ga Mutlhangano Wo Hlawuleka
A hloko ya mhaka ya longoloko wa siku ga mutlhangano wo hlawuleka wa lembe ga ntiro ga 2009 yi ngalo ‘Chela Kota Hi Wutireli Lezaku U Gi Tatisa,’ na yi seketelwa ka Va Le Kolosi 4:17, Tradução do Novo Mundo. Kota maKristu, hi chela nguvu kota hi kululeka loko. A kungo ga hina ku tatisa a wutireli ga hina hi kutsumbeka, a ku fana ni lezi Jesu a nga maha. (Joh. 17:4) Mupostoli Paule yenawu i wa hi xikombiso xa xi nene nguvu mhakeni leyi. I wa ti yimisele a ku mbheta a kufamba kakwe wutirelini. — Miti. 20:24.
A kanelo wa muwoneleli wa xipanze wu ta komba lezi a vahuweleli vo tsalangana va hlulisako zona a zikarato wutirelini gabye. Zonake a kanelo “Hlakulela Lezi U Zi Byalileko” wu ta dlunyatisa lezi hina hi nga va vunisako zona khwatsi lava ‘va ti yimiseleko wutomi ga pinzukelwa.’ (Miti. 13:48) A mukaneli a enzelako a ku sangula i ta kambisisa 2 Va Le Korinte 6:1-10, hi vesi ni vesi ka kanelo wu nge ngalo “Lezi Hi Kombisako Zona Lezaku Hi Vatireli.” Ni gambo, i ta yisa kupima ka lava va nga kona ka hloko ya mhaka, “Nyika Nguvu Lisima A Wutireli Ga Wena.” Handle ko kanakana u ta tiyiswa hlana hi tikanelo ti nge “A Vanhu Vaswa Ni Vahombe Va Tsakela A Wutireli” ni “Vanhu Vaswa Lava Va Tatisako A Wutireli.” Lava va tsakelako ku kombisa a kutihendleleta kabye hi ku bapatizwa matini ka munwe wa mitlhangano leyi yi tako ya xipanze, va fanele ku tivisa a muwoneleli loyi a rangelako bandla na ka ha hi ni xikhati. A xinwe xa zipanze za lisima ka mitlhangano ya hina yontlhe leyi ya hombe zinwe ni migotsovanyano xigonzo xa A Sentinela. Tana ni revista ga wena legi gi to gonziwa ka viki ga siku ga mutlhangano wo hlawuleka.
A xikhati lexi hi chelako kota kasi hi tatisa a wutireli ga hina, hi ti karatela lezaku a mitiro ni zilo zinwani zi nga tlimbi lezi Jehova a hi nyikileko. A kutiyiswa-hlana ka lomu Mitsalweni loku hi nyikiwako hi kutiriswa ka longoloko lowu wa siku ga mutlhangano wo hlawuleka ku fanele ku vuna hina hontlhe a kuva hi tiva lezi hi faneleko ku maha kasi hi simama ku veka kupima ka hina ka lezi zi nga zi nene hi tlhela hi ehleketa khwatsi xungetano hi lezi hi zi mahako wutirelini kasi hi gi tatisa hi kumbhelela.