“Zakuga Hi Xikhati Xi Faneleko”

1. Xana a mutlhangano wo hlawuleka wa lembe legi wu ku vunisile kuyini wena ni vanwani?

¹ Anzhako ka kuva kona ka mutlhangano wa hina wo hlawuleka, a kutala ka zikhati hi ngalo, “Hakunene wu chikele hi xikhati xi faneleko!” A muwoneleli wo kari wa xipanze i bikile lezaku anzhako ka kuzwa a longoloko wa lembe legi, a vokari xipanzeni xakwe va kombisile a kunavela ku engetela a ntiro wabye wo xumayela. A muwoneleli munwani a fambafambako i te ngalo: “Wu hi vunile a ku ehleketa khwatsi xungetano hi xikhati lexi hi hanyako ka xona, ni ku hlolisisa lezi hi zi hlawulako wutomini ga hina.” A munwani i te ngalo, “A vahuweleli vo hlaya va te ngalo a mutlhangano lowu wu vile xitlharihiso kabye kasi va hisekela khwatsi lezi zi nga za lisima ku hunza zontlhe, ku nga wutireli.” Xana a mutlhangano wo hlawuleka wu ku vunisile kuyini?

2. Zini zi to kambisiswa ka longoloko wa lembe ga ntiro gi tako?

² A longoloko wa lembe ga ntiro legi gi tako wonawu wu ta chikela hi xikhati xi faneleko. A hloko ya mhaka yi ngalo, “Tsutsumela Ka Jehova,” yi susilweko ka Tisimu 118:8, 9. A tihloko ta mhaka to kari ti to tlhamuselwa hi leti: “Xana Jehova I Khokhola Zikhatini Za Zikarato Hi Ndlela Muni?” “Vuna Vanwani Lezaku Va Kuma Wuchavelo Tipapeni Ta Jehova,” “Pimanyisa Jehova Hi Ku Nyika Wuchavelo,” “Vanhu Vaswa, Tsumbani Jehova!” ni “Paradise Ga Hina Ga Moya — ⁠Lulamiselo Ga Jehova Ga Ku Chavela Ka Gona.”

3. Hi nga vunekisa kuyini hi kumbhelela hi mutlhangano?

³ Kasi Hi Vuneka: Zalezo a siku gi tivisiwako, maha malulamiselo yo tiya ya lezaku u nga wu luzi, u tlhela u ramba a zigonzani za wena za Biblia. Kasi hi “pswala mihanzu hi kutimisela,” hi fanele ku nga rivali lezi hi zi zwako. (Luka 8:15) Hikwalaho, ingisela khwatsi a longoloko, u tlhela u tsala a timhaka-tshinya zinwe ni zileletelo lezi u lavako ku zi tirisa wutomini ni wutirelini ga wena. Anzhako ka mutlhangano, ti nyikeni xikhati xa ku bhulisana hi longoloko kota ngango, mu tlhela mu alakanyela a tindlela to kongoma ta ku tirisa a mahungu lawo.

4. Hikuyini hi faneleko a ku wu rinzela hi mahlo yo pswhuka a mutlhangano wo hlawuleka?

⁴ A ku fana ni zakuga zo nanziha ni zi tiyisako marambu, a mutlhangano wo hlawuleka wa lembe legi wu longiselwe hi liranzo la hombe ni kukhatala. Ngha Jehova a katekisa a mizamo ya wena ya kuva kona u tlhela u vuneka hi zakuga lezi zi longiselweko hi xikhati xi faneleko kasi ku gisa a vatireli va maKristu hi tlhelo ga moya. — Mat. 24:45.